சிலந்தியின் உதவி!

**சிவா** · **சிவா** Wed 3 Feb 2010 - 3:07

சிலந்திகளை சாதாரணமாக வீட்டில் பார்த்திருப்போமே தவிர, அவற்றைப் பற்றி அதிகமாக அறிந்திருக்க மாட்டோம். பூச்சிகளைக் கட்டுப்படுத்துவதில் சிலந்திகள் உதவப் போகின்றன. சென்னையில் உள்ள `இந்திய அறிவு அமைப்புகள் மையம்', அதற்கான ஆராய்ச்சியில் ஈடுபட்டுள்ளது. அந்த மையத்தினர், சிலந்திகளைக் கொண்டு இயற்கைக் கட்டுப்பாட்டு முறையில் பூச்சிகளைக் கட்டுப்படுத்துவதற்கான ஆய்வில் ஈடுபட்டுள்ளனர்.

சிலந்தியைப் பார்க்கும்போதே பலருக்குப் பயம் ஏற்படும். அவசரமாக விலகிச் செல்வார்கள். ஆனால் உண்மையில், பெரும்பாலான இந்தியச் சிலந்திகள் அபாயமற்றவை. நஞ்சு கொண்ட சில சிலந்திகளும் அதிகமாக அபாயத்தை ஏற்படுத்தாது.

`ஓநாய் சிலந்தி' போன்றவை விவசாயிகளின் தோழர்களாகி வருகின்றன. அவை, பயிர்களை நாசம் செய்யும் பழுப்பு தாவர வெட்டுக்கிளிகளை விருப்பமான உணவாகக் கொள்கின்றன.

`பெரிய நண்டுச் சிலந்தி' மற்றொரு இயற்கையான பூச்சிக்கொல்லியாகும். இந்த சாம்பல் கலந்த பழுப்பு நிறச் சிலந்தி, கரப்பான்பூச்கிகளை வேட்டையாடி உண்கிறது. இது வலை ஏதும் பின்னுவதில்லை. மாறாக, சமையலறை `சிங்க்' மற்றும் வீட்டுக் குப்பைகளில் மறைந்திருக்கிறது. இரவில் மட்டும் வெளிப்பட்டு கரப்பான்பூச்சிகளை வேட்டையாடுகிறது. இந்தச் சிலந்தியால் மனிதர்களுக்கு எந்தத் தீங்கும் கிடையாது.

சென்னை இந்திய அறிவு அமைப்புகள் மையமானது நிறைய `பெரிய நண்டுச் சிலந்திகளை' உருவாக்குகிறது. கரப்பான்பூச்சிகளை வேட்டையாடும் அளவுக்குப் பெரிதாகும் வரை அவற்றை வளர்க்கிறது. பின்னர், கரப்பான்பூச்சித் தொந்தரவு அதிகமுள்ள பகுதிகளில் அவற்றை விடுகிறது.

ஒருகட்டத்தில் இந்தச் சிலந்திகளின் எண்ணிக்கையே அளவுக்கதிகமாக அதிகரித்து ஒரு தொந்தரவாகிவிடுமா? கிடையாது. இந்தச் சிலந்திகளின் ஆயுட்காலம் 3 ஆண்டுகள். ஒரே பாலினத்தைச் சேர்ந்த சிலந்திகளை ஒரு பகுதியில் அதிகமாக விடும்போது அவை பெருகாமல் போய்விடுகின்றன.

பெரிய கிட்டங்கிகள், கூடங்கள் ஆகியவற்றில் இந்தச் சிலந்திகள் மிகவும் பயனுள்ளவையாக இருக்கும். நமது வீட்டில் கரப்பான்பூச்சித் தொந்தரவை ஒழிக்க இனி மருந்து டப்பாக்களை வாங்க வேண்டியதில்லை (அவை மனிதர்களுக்கும் அபாயமானவை), ஒன்றிரண்டு `பெரிய நண்டுச் சிலந்திகளை' வாங்கினாலே போதும்!