நானும், அழகிரியும் தி.மு.க.,வின்இரட்டைக்குழல் துப்பாக்கிகள்

நானும், அழகிரியும் தி.மு.க.,வின்இரட்டைக்குழல் துப்பாக்கிகள்:


துணை முதல்வர் ஸ்டாலின் பேச்சு




மதுரை:""மு.க.அழகிரியும், நானும் தி.மு.க.,வின் இரட்டைக்குழல் துப்பாக்கிகள்,'' என தமிழக துணை முதல்வர் ஸ்டாலின் பேசினார்.மத்திய ரசாயனம் மற்றும் உரத்துறை அமைச்சர் மு.க.அழகிரியின் 59வது பிறந்த நாளையொட்டி, தமிழ்நாடு தொழில் வர்த்தக சங்க முதுநிலை தலைவர் ரத்தினவேல் எழுதிய, "அப்பாவுக்கு தப்பாது பிறந்த பிள்ளை' புத்தக வெளியீட்டு விழா, மதுரை ராஜா முத்தையா மன்றத்தில் நேற்று நடந்தது.தமிழக வருவாய் மற்றும் வீட்டு வசதித் துறை அமைச்சர் பெரியசாமி தலைமை வகித்தார். தி.மு.க., நகரச் செயலர் தளபதி வரவேற்றார். புத்தகத்தை ரத்தினவேல் வெளியிட, தியாகராஜர் மில்ஸ் நிர்வாக இயக்குனர் கருமுத்து தி.கண்ணன் பெற்றுக்கொண்டார்.

திருச்சியிலிருந்து திடீரென இரவு 7.45 மணிக்கு, மதுரை விழா மேடைக்கு தமிழக துணை முதல்வர் ஸ்டாலின் வந்தார். மு.க.அழகிரியை வாழ்த்தி, ஸ்டாலின் பேசியதாவது:நாளை( இன்று) பிறந்த நாள் காணும் அழகிரியை, நான் முன்கூட்டியே வாழ்த்துவதில் பெருமைப்படுகிறேன். கடந்தாண்டு அவரது பிறந்த நாள், மாநாடு போல் நடந்தது. அதில், தி.மு.க.,வின் இரட்டைக்குழல் துப்பாக்கிகளாக நானும், அழகிரியும் இருப்போம் என உறுதி எடுத்துக் கொண்டோம். அன்று சொன்னதை, இப்போதும் நினைவுபடுத்துகிறேன். அழகிரி பல சிறப்புகளை பெற்று தி.மு.க.,விற்கும், சமுதாயத்திற்கும் பணியாற்ற வேண்டும். முதல்வர் கருணாநிதி ஆற்றும் பணிகளுக்கு அது வலு சேர்ப்பதாக அமைய வேண்டும்; அமையும். நான் முழுமையாக பங்கேற்க முடியவில்லை. விமானத்தைப் பிடித்து சென்னை செல்ல வேண்டும் என்றார்.பின், 7.55 மணிக்கு ஸ்டாலின் புறப்பட்டார்.

கனிமொழி எம்.பி., பேசியதாவது: நான் எனது தந்தை கருணாநிதியிடம், அழகிரி பிறந்த நாள் மற்றும் புத்தக வெளியீட்டு விழாவிற்கு செல்கிறேன் என்றேன். அவர், உன் அண்ணன்(அழகிரி), என்னிடமிருந்து எப்போதும் தப்பவே முடியாது என்றார். அன்பு, பாசம் மற்றும் கட்சியில் கொள்கை உறுதியுடன் இருப்போரிடம் அழகிரிக்கு நம்பிக்கை உண்டு. நகைச்சுவை உணர்வு மற்றும் அசாத்திய தன்னம்பிக்கை உடையவர். தந்தையிடமிருந்து அவருக்கு பல திறன்கள் வந்திருக்கிறது. விவசாயிகளுக்கு நேரடியாக உர மானியத்தை வழங்கும் திட்டத்தை, வெள்ளோட்டமாக தமிழகம் மற்றும் வடமாநிலம் ஒன்றில், தலா ஒரு மாவட்டத்தில் செயல்படுத்த திட்டமிட்டுள்ளார். எனவே, அவர் சாமானியர்களின் நம்பிக்கை நட்சத்திரம் என்றார்.

தமிழக அமைச்சர்கள் தங்கம் தென்னரசு, பெரியகருப்பன், சாத்தூர் ராமச்சந்திரன், சென்னை பல்கலை துணைவேந்தர் திருவாசகம், முதல்வர் கருணாநிதியின் மனைவி தயாளு, காந்தி அழகிரி, தயாநிதி அழகிரி, குன்றக்குடி பொன்னம்பல அடிகள், தொழில் வர்த்தக சங்க தலைவர் ஜெகதீசன் பங்கேற்றனர்.முன்னதாக, வேளாண் உணவுத் தொழில் வர்த்தக சங்கத்தை மு.க.அழகிரி துவக்கி வைத்தார். மூர்த்தி எம்.எல்.ஏ., நன்றி கூறினார்.