அஸ்லன் ஷா ஹாக்கி இந்தியா சாம்பியன்

ஈப்போ, ஏப். 13: சுல்தான் அஸ்லன் ஷா ஹாக்கி இறுதிப் போட்டியில் மலேசியாவை வீழ்த்திய இந்தியா 13 ஆண்டுகளுக்குப் பின் கோப்பையை வென்று அசத்தியது.

இந்தியா, மலேசியா. நியூசிலாந்து, பாகிஸ்தான், எகிப்து ஆகிய 5 நாடுகள் பங்கேற்ற இப்போட்டி மலேசியாவில் (ஏப்.6&12) நடந்தது. லீக் முறையில் போட்டிகள் நடந்தன.

தொடக்க ஆட்டத்தில் எகிப்துடன் டிரா செய்து ஏமாற்றம் அளித்த இந்தியா, 2வது போட்டியில் மலேசியாவை வீழ்த்தி அசத்தியது. நியூசிலாந்துக்கு எதிராக கடைசி வரை முன்னிலை வகித்தும் போட்டி டிராவில் முடிந்தது.

கடைசி லீக் ஆட்டத்தில் பாகிஸ்தானை வென்றால் மட்டுமே இறுதிப் போட்டிக்கு தகுதி பெறும் என்ற நிலையில், களம் இறங்கிய இந்தியா 2&1 என்ற கணக்கில் வென்று சாதித்தது.

லீக் சுற்று முடிவில் 2வது இடத்தைப் பிடித்த மலேசியாவும் இறுதிப் போட்டிக்கு முன்னேறியது. இந்தியா, மலேசியா அணிகள் மோதிய இறுதிப் போட்டி நேற்று நடந்தது. தொடக்கத்திலிருந்தே சிறப்பாக விளையாடிய இந்திய வீரர்கள் தொடர் தாக்குதலை நடத்தினர்.

பிரப்ஜோத் சிங், ஷிவேந்தர் சிங் இருவரும் தலா 1 கோல் போட்டு அசத்தினர். இதற்கு பதிலடியாக மலேசிய வீரர் அஸ்லான் மிஸ்ரன் ஒரு கோல் அடித்தார். முதல் பாதி முடிவில் 2&1 என்ற கணக்கில் இந்தியா முன்னிலை வகித்தது.

இரண்டாவது பாதியில் இந்திய வீரர்கள், ஆட்டத்தின் வேகத்தை அதிகரித்தனர். ஆட்ட முடிவில் அர்ஜூன் ஹாலப்பா போட்ட கோலால் இந்தியா 3&1 என்ற கோல் கணக்கில் வெற்றி பெற்று கோப்பையை கைப்பற்றியது.

தொடர்ந்து 18வது ஆண்டாக நடக்கும் இப்போட்டியில் இதுவரை 4 முறை மட்டுமே இந்தியா கோப்பையை வென்றுள்ளது குறிப்பிடத்தக்கது. இந்திய கேப்டன் சந்தீப் சிங் தொடர்நாயகனாக தேர்வு செய்யப்பட்டார்.

பெய்ஜிங்கில் கடந்த ஆண்டு நடந்த ஒலிம்பிக் போட்டிக்கு தகுதி பெறாததால் ரசிகர்களிடம் அதிருப்தியை சம்பாதித்த இந்திய அணி, அஸ்லன் ஷா கோப்பையை வென்று அசத்தியுள்ளது.

பாராட்டு: அஸ்லன் ஷா கோப்பையை வென்ற இந்திய அணிக்கு பிரதமர் மன்மோகன் சிங், குடியரசுத் தலைவர் பிரதிபா பாட்டீல், காங்கிரஸ் தலைவர் சோனியா காந்தி ஆகியோர் வாழ்த்து தெரிவித்துள்ளனர்.