ஒற்றுமை தேசம் உருவாகட்டும்!

**ayyasamy ram** · **ayyasamy ram** Tue Oct 01, 2024 10:23 pm

--
தேவைகளுக்கும், திருப்திகளுக்கும்
மனம் விட்டு பேசும்
மந்திரம் இருக்கும் போது
திரைமறைவில் புரையோடும்
தீவிரவாதம் எதற்கு!
–
விருட்சத்தின் விளைச்சலில்
விருந்து உண்டு
வேர்களுக்கு விஷம் விதைக்கும்
விந்தை இதயம் படைத்த
வினோத மனிதர்களே…
–
புறமிருந்து சிரம் சாய்க்க
பேடியின் அஸ்திரங்களை பிரயோகிக்கும்
பிள்ளைப்பூச்சிகளா நீங்கள்!
–
வாழ்க்கையெனும் நந்தவனம் வழங்கும்
வசந்தத்தின் சுகந்தத்தை
சுவாசிக்காதவரா நீங்கள்!
–
நட்பெனும் நவரசம் நல்கும்
அறுசுவையின் அடித்தளம் அறியாமல்
வழித்தடம் தவறியவர்களா நீங்கள்!
–
அப்படியானால்
வாருங்கள் கற்றுத் தருகிறோம்!
–
முறம் பிடித்து புலி துரத்திய எம்
வீரமங்கையிடம் வினவிப் பாருங்கள்…
மரணமே எனினும் மார்பில் தாங்கும்
மரபை கற்றுத் தருவாள்!
–
சிறகடித்துச் செல்லும்
எம் சிட்டுக்குருவிகளை
கேட்டுப் பாருங்கள்…
சிதறியே கிடந்தாலும்
கூடி கொத்தி தின்னும்
கொள்கையை கற்றுத்தரும்!
–
முற்றத்தில் முளைத்து நிற்கும்
எம் முல்லைப் பூக்களை
கேட்டுப்பாருங்கள்…
மற்றவர் வாழ்க்கையில் வாசம் வீசும்
வழியை கற்றுத்தரும்!
–
எறும்புக்கும் இரை போடும்
என் இளவல் இதயங்களில்
இரும்புத் துண்டை எறியும்
இறுகிய மனம் படைத்த
எந்திர மனிதர்களே…
–
ஆயிரமாயிரம் அணு குண்டுகளையும்
அள்ளித் தெளித்துப் பாருங்கள்
அத்தனையும் அடி பணியும்
அகிம்சையெனும் எங்கள்
ஒற்றை ஆயுதத்தின் முன்!
–
ஆகவே உங்கள்
முள்வேலி முகாமை
முடக்கிவிட்டு
நல்வழிப் பூங்காவில்
நடைபயில முயலுங்கள்…
நாளைய நம் தலைமுறைகள்
நட்புறவுடன் வாழ
ஒற்றுமை தேசம் உருவாகட்டும்!
–
———————————
— க.திருவழகர், கொச்சி.
நன்றி-வாரமலர்

ஒற்றுமை தேசம் உருவாகட்டும்!

ஒற்றுமை தேசம் உருவாகட்டும்!

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக