தைப்பூசம்

by nandaa Wed 27 Jan 2010 - 22:08

சிவபெருமான் தனித்து நடராஜராக
நாட்டியமாடிய திருநாள் மார்கழி திருவாதிரை. அந்த நடனத்தை உமாதேவியான
சிவகாமி அருகில் இருந்து ரசித்துக் கொண்டிருப்பாள். அதே போல ஆனந்த
தாண்டவமாட உமாதேவிக்கும் ஆசை ஏற்பட்டது. அம்பிகை நடராஜருடன் சேர்ந்து ஆடிய
நாள் தைப்பூச நாளாகும். இவ்வகையில் தைப்பூசம், சிவனுக்குரிய நாளாகிறது.
ஆனால், முருகத்தலமான பழநியில் இவ்விழா சிறப்பாகக் கொண்டாடப்படுகிறது.
இதற்கொரு காரணம் இருக்கிறது. பழநியில் பெரியநாயகி அம்பிகை கைலாசநாதருடன்
அருள் செய்கிறாள். இருவரது சன்னதியின் நடுவிலும் முருகன் சன்னதி
அமைந்தது. இதை சோமாஸ்கந்த வடிவக் கோயில் என்பர். ÷சாமன் என்றால் "சிவன்.
"ஸ்கந்தன் என்றால் "ஆறுமுகங்கள் ஒன்று சேர்ந்த முருகன் எனப் பொருள்.
இக்கோயிலின் பிரதான வாசலும், கொடிமரமும் முருகன் எதிரிலேயே அமைந்தது.
கோயிலுக்குள் நுழைபவர்கள் முதலில் முருகனையே வழிபட்டனர். தங்களுக்கு
எடுக்கப்படும் தைப்பூச விழா, இங்கே முருகனுக்கானதாக அமைய வேண்டும் என
அவரைப் பெற்றவர்கள் திருவுளம் கொண்டார்களோ என்னவோ... தைப்பூச கொடியேற்றம்
முருகன் முன்னாலேயே இப்போதும் நடக்கிறது. தகப்பனை வழிபட வந்தவர்கள்,
தகப்பன் சுவாமியை வழிபட்டனர். இத்தல வரலாறு முருகனோடு சம்பந்தப்பட்டதாக
அமையவே, முருகனுக்கே தைப்பூசம் என்னும் நிலைமைக்கு மாறிவிட்டது.
பக்தர்களும் முருகனுக்குரிய காவடிகளுடன் வர ஆரம்பித்தனர். பிற்காலத்தில்
மலைக்கோயில் பிரபலமாகவே, மலைக்குச் சென்று விடுகின்றனர். பழநி வழிபாடு
குறித்த நூல்களில், முதலில் பெரியாவுடையார் கோயில், பின்னர் பெரியநாயகி
அம்மன் கோயில், அடுத்து திருஆவினன்குடி குழந்தை வேலப்பர் கோயில் ஆகியவற்றை
தரிசித்த பிறகே மலைக்கோயிலுக்குச் செல்ல வேண்டும் என
குறிப்பிடப்பட்டுள்ளது.

தைப்பூசம் எங்கு நடக்கிறது
பழநியில் தைப்பூச விழா, மலைக்கோயிலில் நடப்பதில்லை. பெரியநாயகி அம்மன்
கோயிலிலேயே நடக்கிறது. இங்குள்ள உற்சவர் முத்துக்குமாரசுவாமி தினமும்
புறப்பாடாகிறார். விழாவின் ஏழாம் நாளன்று இங்கிருந்தே தேர் புறப்படும்.
இங்கிருந்து 4 கி.மீ., தூரத்தில் சிவன் முருகனைத் தேடி வந்த தலம்
ஒன்றுள்ளது. இக்கோயிலில், சிவன் "பெரியாவுடையார் என்ற பெயரில் அருளுகிறார்.