சௌ சௌ (சீமை கத்திரிக்காய்) துவையல்

BPL · BPL Wed Jan 27, 2010 5:36 pm

சௌ சௌ (சீமை கத்திரிக்காய்) துவையல்:

சௌ சௌ காய் மட்டும் தான் சமைப்பதற்கு உபயோகப்படுத்துவார்கள். அதன் தோலை வீசிவிடுவார்கள்.
இங்கு நாம் அதன் தோலை வைத்துத்தான் துவையல் செய்யப்போகிறோம்.

தேவையான பொருட்கள்:
சௌ சௌ தோல்
உளுத்தம் பருப்பு - தோலின் அளவுக்கேற்ப.
காய்ந்த மிளகாய் - தேவையான அளவு.
புளி - சிறிதளவு.
பெருங்காயம் - சிறிதளவு.
உப்பு - தேவையான அளவு.
கொத்தமல்லி தழை - சுவைக்கு.
கடுகு & நல்லெண்ணெய் - தாளிக்க.

செய்முறை:
ஒரு வாணலியில் சிறிது நல்லெண்ணெய் விட்டு காய்ந்தவுடன் சௌ சௌ தோலை போட்டு
சிறிது வதக்கி (நிறம் மாற வேண்டிய அவசியமில்லை). தனியே எடுத்துவைத்துக்கொள்ளவும்.
பிறகு காய்ந்த மிளகாயும், உளுத்தம் பருப்பும் போட்டு வறுத்து எடுத்துக்கொள்ளவும்.
மிக்சியில் வதக்கிய சௌ சௌ தோல், உளுத்தம்பருப்பு, காய்ந்த மிளகாய், உப்பு,
புளி, பெருங்காயம், கொத்துமல்லி தழை சேர்த்து அரைத்து கடுகு
உளுத்தம்பருப்பு தாளிக்கவும். சுவையான துவையல் ரெடி.
இது தோசை, இட்லி,உப்புமா போன்ற சிற்றுண்டிக்கு தொட்டுக் கொள்ளவும் சாதத்தில் பிசைந்து சாப்பிடவும் சுவையாக இருக்கும்.

இதே போல பரங்கிக்காயின் குடல்(உள்ளே விதையுடன் சேர்ந்திருக்கும் பகுதி) வைத்தும் இந்த துவையலை செய்யலாம்.

செய்து சுவைத்துதான் பாருங்களேன்.