தேர்தல் பத்திரங்கள் லஞ்சத்திற்கு வழி வகுக்கும்...

**ayyasamy ram** · **ayyasamy ram** Thu 15 Feb 2024 - 17:55

-
தேர்தல் பத்திரங்கள் குறித்த வழக்கில் தேர்தல் பத்திரங்கள் சட்டத்தை மீறும் வகையில் உள்ளன என்று உச்ச நீதிமன்ற ஐந்து நீதிபதிகள் கொண்ட அரசியல் சாசன அமர்வு ஒருமித்த தீர்ப்பு வழங்கியுள்ளது.

அரசியல் கட்சிகளுக்கு அளிக்கப்படும் நன்கொடைகளில் வெளிப்படைத்தன்மையை கொண்டு வரும் வகையில், கடந்த 2018- ஜனவரி 2-ம் தேதி மத்திய அரசு தேர்தல் பத்திரங்கள் என்ற திட்டத்தைக் கொண்டுவந்தது. இந்த திட்டத்தின் கீழ் அரசியல் கட்சிகளுக்கு நிதி அளிப்பவர்கள் பாரத ஸ்டேட் வங்கிக்குச் சென்று ஆயிரம் ரூபாய் முதல் அதிகபட்சம் ரூ. 1 கோடி மதிப்பில் தேர்தல் பத்திரங்களை வாங்கிக் கொள்ள முடியும்.

தனி நபர்கள் நிறுவனங்கள் என தேர்தல் பத்திரங்களை வாங்கி தங்களுக்கு விருப்பமான அரசியல் கட்சிகளுக்கு நன்கொடையாக வழங்க முடியும்.ஒரு நபர் அல்லது நிறுவனம் சார்பில் எத்தனை பத்திரங்களை வேண்டுமானாலும் வாங்கிக் கொள்ளலாம்.

தேர்தல் பத்திரங்களை வாங்கும் தனி நபர், நிறுவனங்கள் யார் என்ற விவரங்கள் பொது மக்களுக்கோ அல்லது நன்கொடையை பெறும் அரசியல் கட்சிக்கு அளிக்கப்படாது. எனினும், அரசு மற்றும் வங்கி சார்பில் இந்த விவரங்களை சேகரித்துக் கொள்ளலாம்.

தேர்தல் பத்திரங்கள் திட்டத்தில் வெளிப்படைத்தன்மை இல்லை என்றும் இதனை ரத்து செய்ய வேண்டும் என்று வலியுறுத்தியும் உச்ச நீதிமன்றத்தில் பல்வேறு மனுக்கள் தாக்கல் செய்யப்பட்டன. இவற்றை தலைமை நீதிபதி சந்திரசூட் தலைமையிலான ஐந்து நீதிபதிகள் அடங்கிய அமர்வு விசாரித்து வந்தது.

கடந்த ஆண்டு நவம்பர் 2-ம் தேதி இந்த வழக்கின் தீர்ப்பு பின்னர் அறிவிக்கப்படும் என அறிவிக்கப்பட்டு இருந்தது இந்த நிலையில், தேர்தல் பத்திரங்கள் வழக்கில் உச்சநீதிமன்றம் இன்று தனது தீர்ப்பை வழங்கியுள்ளது. இதில் ஐந்து நீதிபதிகளும் ஒருமித்த தீர்ப்பை வழங்கியுள்ளனர்.

அரசை கணக்கு கேட்கும் உரிமை நாட்டு மக்களுக்கு உள்ளது என பல தருணங்களில் நீதிமன்றங்கள் கூறியுள்ளன. தகவல்களை வெளிப்படையாக தெரிவிக்காத தேர்தல் பத்திரங்கள் சட்டத்தை மீறும் வகையில் உள்ளன. தகவல் அறியும் உரிமைச் சட்டம் அரசியல் சாசன பிரிவு 19 (1) ஆகியவற்றை மீறும் வகையில் உள்ளது. கருப்பு பணத்தைத் தடுக்க தேர்தல் பத்திரங்களை அனுமதிக்கிறோம் என்ற கருத்து ஏற்கத்தக்கது அல்ல.

தேர்தல் பத்திரங்கள் லஞ்சத்திற்கு வழி வகுக்கும். கருப்பு பணத்தை தடுக்க தேர்தல் பத்திரங்கள் அனுமதிக்கிறோம் என்கிற வாதம் ஏற்புடையது அல்ல. அரசியல் கட்சிகளுக்கு யார் பணம் தருகிறார்கள் என்பதை தெரிந்து கொள்ள பொது மக்களுக்கு உரிமை உண்டு.

கருப்பு பணத்தை ஒழிக்க தேர்தல் பத்திரங்களைத் தவிரவேறு வழிகளும் உள்ளன என்று திட்டவட்டமாக கூறியுள்ள அரசியல் சாசன அமர்வு, தேர்தல் பத்திரங்கள் திட்டம் சட்ட விரோதமானது எனக்கூறி அதனை ரத்து செய்யப்பட உத்தரவிட்டனர்.

மேலும், நன்கொடை அளித்தவர்களிடம் விவரங்களை உடனடியாக வெளியிட உத்தரவிட்டனர். தேர்தல் பத்திரங்கள் விற்பனையை உடனடியாக நிறுத்த வங்கிக்கும் உத்தரவிட்டது.

-நன்றி-காமதேனு

தேர்தல் பத்திரங்கள் லஞ்சத்திற்கு வழி வகுக்கும்...

தேர்தல் பத்திரங்கள் லஞ்சத்திற்கு வழி வகுக்கும்...

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக