பெல்ஜியம் தம்பதிக்கு தத்து கொடுக்கப்பட்ட பெண்: 28 ஆண்டுகளுக்குப் பின் தாயை கண்டுபிடித்தார்

சென்னை
: பெல்ஜியம் தம்பதியினருக்கு 28 ஆண்டுகளுக்கு முன் தத்துக் கொடுக்கப்பட்ட
தமிழக பெண், மீண்டும் சென்னை வந்து, தனது தாயை கண்டுபிடித்து அவரோடு
சேர்ந்தார்.


பெல்ஜியத்தைச் சேர்ந்த
மாரீஸ், மேட்லின் தம்பதியினரின் வளர்ப்பு மகள் எஸ்தர்(33). இவர் தனது தோழி
டெல்பின்னுடன் கடந்த ஆண்டு டிசம்பர் 17ம் தேதி, தமிழகத்திற்கு சுற்றுலா
வந்தார். சென்னை சேப்பாக்கம் வாலாஜா சாலையில், ஸ்ரேயன்ஸ் பவுண்டேஷனின்
பாவனேஷ் தியோராவை சந்தித்தனர். இருவரும் தங்குவதற்கு தேவையான உதவிகளை
செய்த தியோரா அவர்களோடு பேசிக் கொண்டிருந்தார். அப்போது எஸ்தர், "நான்
பெல்ஜியம் மற்றும் இந்தியாவைச் சேர்ந்தவள்' எனத் தெரிவித்தார்.


இதுகுறித்து
தியோரா விசாரித்தபோது, தமிழகத்தில் பிறந்த நான், பெல்ஜியம்
தம்பதியினருக்கு தத்துக் கொடுக்கப்பட்டதாக தெரிவித்தார். அப்போது, தனது
சிறு வயதில் கடற்கரையில் குடிசை அருகே வெளிநாட்டு பெண்ணுடன் எடுத்துக்
கொண்ட புகைப்படத்தையும் காண்பித்தார். சிறுவயதில் சென்னை அடையாறில்
வசித்ததாக எஸ்தர் கூறினார். இதையடுத்து, எஸ்தரின் பெற்றோரைத் தேடி தியோரா,
அடையாறு சென்று விசாரித்தார். அங்கு கிடைத்த தகவல்களின் அடிப்படையில்,
சென்னை பெரம்பூரில் குழந்தைகள் காப்பகம் நடத்திவரும் பாதிரியாரை தியோரா
சந்தித்து, எஸ்தரின் பெற்றோர் குறித்து விசாரித்தார். அப்போது, எஸ்தரின்
தாய் அம்பத்தூர் திருமுல்லைவாயலில் இருப்பது தெரிந்தது. இதையடுத்து, கடந்த
டிச., 22ம் தேதி இரவு 8 மணிக்கு, எஸ்தர் தனது தாய் சுசீலாவை சென்னை மெரீனா
கடற்கரையில் சந்தித்தார்.


இதுகுறித்து,
தியோரா கூறும்போது, ""ஐதராபாத்தில் உள்ள செல்லுலார் மற்றும் மாலிக்குலர்
பயாலஜி மையத்தில் எஸ்தர், சுசீலா இருவருக்கும் டி.என்.ஏ., சோதனை
நடத்தப்பட்டது. அதில், எஸ்தரின் தாய் சுசீலா தான் என்பது உறுதியானது,''
என்றார்.


எஸ்தரின் தாய் சுசீலா கூறியதாவது:
எனக்கும், எனது கணவர் சுப்ரமணிக்கும் 1974ம் ஆண்டு திருமணம் நடந்தது. எனது
கணவர் பால் வியாபாரம் செய்து வந்தார். திருவண்ணாமலை, சின்னக்கடைத்
தெருவில் வசித்து வந்தோம். எனக்கு 1976ம் ஆண்டு உமா என்ற பெண்ணும், 1978ம்
ஆண்டு கோமதி(எஸ்தர்) என்ற பெண்ணும் பிறந்தனர். எனது கணவர் மது அருந்தும்
பழக்கத்திற்கு அடிமையானவர். கணவரைப் பிரிந்து, எனது உடல் தீயில் எரிந்த
நிலையில், இரண்டு பெண் குழந்தைகளை வளர்க்க சிரமப்பட்டேன். இதனால், இரண்டு
குழந்தைகளையும் சென்னை பெரம்பூரில் குழந்தைகள் காப்பகம் நடத்தி வரும் ஒரு
பாதிரியாரிடம் ஒப்படைத்தேன். ஒரு வாரத்திற்கு பின், உமாவை மீண்டும்
என்னுடன் அழைத்து வந்து விட்டேன். பின் அவ்வப்போது குழந்தைகள் காப்பகம்
சென்று கோமதியை பார்த்து வந்தேன். ஒருநாள், கோமதியை படிப்பதற்காக
பெல்ஜியம் அனுப்புவதாகவும், 18 ஆண்டுகளுக்கு பின் திரும்பி வருவாள்
என்றும் பாதிரியார் கூறினார். இதை நம்பி ஒரு வெள்ளைத் தாளில் கையெழுத்துப்
போட்டுக் கொடுத்தேன். கோமதியை பெல் ஜியம் தம்பதியினருக்கு தத்துக்
கொடுப்பதாக முத்திரைத்தாளில் எப்போதும் கையெழுத்துப் போட்டுத் தரவில்லை.


கோமதி
பெல்ஜியம் சென்றபின், ஆண் டிற்கு ஒருமுறை அவளது போட் டோவை எனக்கு
வழங்கினர். நான்கு ஆண்டுகளுக்கு பின் போட்டோ வருவது நின்று விட்டது. எனது
மகளை கண்டுபிடித்துத் தருமாறு, சென்னை கலெக்டர் அலுவலகத்தில் உள்ள மாவட்ட
சமூகநல அலுவலகத்தில் புகார் செய்தேன். அவர்கள் எனது மகளை கண்டுபிடித்துத்
தருவதாக தெரிவித்தனர். தற்போது, என் மகள் கிடைத்திருப்பது
மகிழ்ச்சியளிக்கிறது. பாதிரியார் மீது புகார் அளிக்க விரும்பவில்லை.
இவ்வாறு சுசீலா கூறினார்.

எஸ்தர்
கூறும்போது, ""பாவனேஷ் தியோரா உதவியுடன் என் தாயாரை கண்டுபிடித்தது
மகிழ்ச்சியாக உள்ளது. இனி அதிகமாக சம்பாதித்து, அடிக்கடி சென்னை வந்து
எனது தாயாரையும், அக்காவையும் சந்தித்து விட்டு செல்ல முயற்சிப்பேன்,''
என்றார். எஸ்தருக்கு தமிழ் மொழி தெரியவில்லை. பிரெஞ்ச் மற்றும் ஆங்கிலம்
மட்டுமே பேசினார்.