சாதிப்பதற்கே வாழ்க்கை

by VIJIVIJAY Wed Dec 06, 2023 5:29 pm

*1. மனச் சிதைவினால் பாதிக்கப் பட்டிருக்கிறேன்.*

*2. பழையதையே நினைத்துக் கொண்டிருக்கிறேன்.*

இது போன்று கூறுபவர்களுக்கு, இதே போன்ற நிகழ்வுகளை சந்தித்த என் அனுபவத்தில் கண்டறிந்ததில் இருந்து கூறுகிறேன்:-

இவை இரண்டையும் மறந்திருங்க. நீங்க இப்படி இருக்கீங்க என்று யாராவது சொன்னார்களா? அப்படி என்றால் அதுதான் உங்கள் மனசிதைவிற்கு காரணமாக இருக்கக்கூடும்.

கழுத்தளவு தண்ணீரில் மூழ்கி விட்டேன். இனி ஜான் போனால் என்ன முழம் போனால் என்ன? என்று நினைத்து, நீங்களும் மனம் தளர்ந்து விட்டீர்களா? அப்படி என்றால் அது உங்களுக்கு வந்திருக்கும் சுயநல கோளாறாக மட்டும்தான் இருக்க முடியும்!!

நான் பலவீனமாக இருக்கிறேன். மனநிலை பாதிக்கப் பட்டிருக்கிறேன். என்பதெல்லாம் சுய பச்சாதாபத்தின் (self sympathy) விளைவு. உங்களை மட்டுமே எண்ணிக் கொண்டிருப்பது மிக மிக தவறு.
*நீங்க வாழனும்! நீங்க ஜெயிக்கணும்!*எல்லோரையும் போல சிரிக்கணும்*எல்லோரையும் போல மிகச் சிறப்பாக வாழ்க்கையில் முன்னேறனும்!*

என்று உங்களுக்காக எண்ணி, ஏங்கி தவிக்கும், உங்களை மிகவும் நேசிக்கின்ற உள்ளங்களை நினைத்துப் பார்த்தால்.. கழுத்தளவு தண்ணீரில் இருக்கின்ற போதும் உங்களை தலையைப் பிடித்து தண்ணீரில் அழுத்தினாலும்.. மீண்டு வர உங்களால் முடியும்!!

பெற்றோருக்காக, குடும்பத்திற்காக, நம்மை சார்ந்தோருக்காக, நான் வாழத்தான் வேண்டும்! வாழ்ந்து காட்டுவேன்! இத்தகைய வீம்பும், வீரியமும், உங்களுக்குள் வந்துவிட்டால்.. இதை மட்டுமே நீங்கள் நினைத்துக் கொண்டிருந்தால்.

இப்போது நீங்கள் சொல்லுகின்ற மன சிதைவிற்கான காரணம் உங்களாலேயே அறிய முடியும்! அதிலிருந்து மீள்வதற்கான உபாயம் உங்களாலேயே உணர முடியும்!!

நான் என் மனச் சிதைவை விட, என் மனைவியை எவ்வாறு அந்த மீளா துக்கத்திலிருந்து மீட்பது என்று எண்ணி, அதை நோக்கியே பயணப்பட்டதால், என்னுடைய மனச்சிதைவு அதனுள் மறைந்து போனது. அடுத்து என் மகனின் எதிர்காலம் பற்றிய சிந்தனையும், அதற்கான போராட்டங்களும், துக்கங்களை ஓரளவு மறக்க செய்தது. காலம் நகர நகர, நானும் நகர்ந்தேன்.

ஆனால், என்னை பெரிதும் மீட்டெடுத்தது, அடுத்தவர்களுக்கு உதவும் போது கிடைக்கும் ஒரு மன நிறைவு மற்றும் பேரானந்தமே. ஆகவே யாராவது நம்மால் உதவி பெற்று அகமகிழ்ந்தால், அதில் கிடைக்கும் சுகத்திற்கு ஈடு, இணை, இவ்வுலகில் எதுவும் கிடையாது.

சுய பச்சாதாபத்தை விட்டு வெளியில் வாருங்கள்!! ஆக வேண்டிய விஷயத்தை சிந்தியுங்கள்! ஆக வேண்டியதை செய்யுங்கள்.

வெளியில் வாங்க.. மரம், செடி, கொடி,மலை, சோலை, இயற்கை காட்சிகள் எல்லாம் நல்லா ரசிங்க. அனைவரிடமும் கலகலப்பாக மனம் விட்டு பேசுங்க. நல்லா வாய்விட்டு சிரிங்க. நல்லா சாப்பிடுங்க, தூங்குங்க. நம்பிக்கையோடு இருங்க!

இந்த சமூகத்திற்காக, நாம் என்ன செய்தோம், என்ன செய்ய முடியும் என்று சிந்தித்து, நம்மால் முடிந்ததை செய்தாலே, போதுமானது.

*நம்மால் கண்டிப்பாக சாதிக்க முடியும்!!*

*

விஜயகுமார்

*