சொர்க்கமும் நரகமும் நம்மிடமே! - கவிதை

by **ayyasamy ram** Mon Oct 09, 2023 4:33 pm

-
செய்த தவறுகளைச் சுட்டிக்காட்டி
மறுபடியும் அதே தவறுகளை
செய்ய விடாமல்
நல்ல பாடங்களையும்
அனுபவத்தையும் கற்றுக் கொடுத்து
அடுத்த வெற்றிப் பாதைக்கு
வழி காட்டும் ஆசானாய்
வரும் தோல்வியே வா!
-
பிறர் கேவலமாக பேசி
மட்டம் தட்டி ஒதுக்கிய நிலையில்
வைராக்கியம் கொடுத்து எழுந்து
தன்னம்பிக்கையாய் வாழ வழி செய்த
அவமானமே வா!
-
எனக்குள்ளிருக்கும் குறைகளையும்,
குற்றங்களையும் புதைந்திருக்கும்
திறமைகளையும் வெளிக் கொண்டு வந்த
எதிரியே வா!
-
பிரச்னைகளைக் கண்டு
பின் வாங்கிய என்னை
எதையும் சாதிக்கவும்
சமாளிக்கவும் முடியும் என்று
தன்னம்பிக்கையையும்
தைரியத்தையும்
கொடுத்த சவாலே வா!
-
உளி தரும் வலியால் கல் சிலையாகிறது
நெருப்பில் சுட்டத் தங்கம்
புதுப் பொலிவாய் ஜொலிக்கிறது!
-
தோண்டி சிதைக்கப்பட்ட
மண்விளை நிலமாகிறது
முள் செடியிலே ரோஜா மலர்கிறது...
-
துன்பங்களால் மனம் உறுதியாக்கப்படுகிறது
பிரச்னைகள் சாதனை படைக்கத் துாண்டுகிறது!
--
— எம். பாலகிருஷ்ணன், பசுமலை, மதுரை
நன்றி-வாரமலர்

by **சிவா** Mon Oct 09, 2023 5:53 pm

அவமானங்கள் கற்றுத் தரும் வாழ்க்கைப் பாடத்தை விட சிறந்ததாக இவ்வுலகில் வேறெதையும் கூறிவிட முடியாது.

by **T.N.Balasubramanian** Mon Oct 09, 2023 8:20 pm

உளி தரும் வலியால் கல் சிலையாகிறது

சிற்பியின் கையால் ஒரு கல் அழகிய மனித உரு பெற்றது.
பார்த்தவர் வியந்தனர். எப்பிடி இவ்வளவு தத்ரூபமாக உண்டாக்க முடிந்தது
என வினவ , சிற்பி, " நான் ஒன்றும் செய்யவில்லையே,
ஏற்கனவே இருந்த அழகிய உருவம்தான் உள்ளே இருந்தது.
இது.வேண்டாத பாகங்களை செதுக்கி வெளியேற்றினேன் என்றார்

இதில் ஒரு படிப்பினை அறிந்தேன்.
நாம் யாவரும் உள்ளத்தால் அழகானவர்களே .
விரும்பத்தகாத செய்கைகளால்
நாம் அரூபிகளாக இருக்கிறோம்.

நல்லதே நினைப்போம்
நல்லதே செய்வோம்.
அழகர் என நிரூபிப்போம்