பருவகாலக் காய்ச்சல்

திடீரென சிறுதூறல், சில்லெனக் காற்று. அடுத்த நிமிடம் சுள்ளென வெயில், புழுக்கம். பருவநிலை இப்படி மாறி மாறி பரதம் ஆடிக் கொண்டிருக்க, நம் உடம்புக்கு ஒரே குழப்பம்.

இருமல் தும்மல் என ஆரம்பித்து தலைவலி, காய்ச்சல் என தடுமாறுகிறது..

ஆம்; தமிழகத்தில் இப்போது காய்ச்சல் காலம். வழக்கமாக, மழைக்காலத்தில் பரவும் ஃபுளூ எனும் பருவகால காய்ச்சலோடு, டெங்கு, டைபாய்டு, மலேரியா எனப் பலதரப்பட்ட காய்ச்சல் வகைகள் இஷ்டத்துக்கும் பரவி வருகின்றன.

பருவகாலம் மாறும்போது அதுவரை உறங்கிக் கிடந்த பாக்டீரியாக்களும் வைரஸ்களும் விழித்தெழுந்து, உருமாறி, வீரியம் பெற்று, மக்களைத்தாக்கப் புறப்படுவதுதான் இந்தமாதிரியான காய்ச்சலுக்கு அடிப்படைக் காரணம்.

காய்ச்சல் வகைகளில் எது எப்படித் தோன்றும் என்பதைப் பொதுமக்கள் தெரிந்து கொண்டால் காய்ச்சலுக்குச் சரியான சிகிச்சை பெறவும் அச்சம் தவிர்க்கவும் உதவும்..

ஃபுளூகாய்ச்சல் இப்போது பரவுகிற காய்ச்சல் வகைகளில் ‘இன்ஃபுளூயன்சா’ எனும் ஃபுளூ காய்ச்சல்தான் அதிகமாகக் காணப்படுகிறது.

இது இன்ஃபுளூயன்சா உள்ளிட்ட பலதரப்பட்ட வைரஸ் கிருமிகளால் ஏற்படுகிறது. கடுமையான காய்ச்சல், தலைவலி, உடல்வலி, தும்மல், மூக்கு ஒழுகுதல், சளி, இருமல், தொண்டைவலி போன்றவை இதற்குரிய அறிகுறிகள்.

இந்தக் காய்ச்சலுக்கு 'பாராசிட்டமால்' மாத்திரையும் .'ஹிஸ்டமின் எதிர்ப்பு மருந்து’களும் பலனளிக்கும். உடலில் நோய் எதிர்ப்பு சக்தி சரியாக இருந்தால், 90 சதவீதம் பேருக்கு ஒருவாரத்தில் இது தானாகவே சரியாகிவிடும். சிலருக்கு மட்டுமே நிமோனியா எனும் தீவிர நுரையீரல் நோயை ஏற்படுத்தும்..

டெங்கு காய்ச்சல்

கொசுக்கடி மூலம் 'டெங்கு' (Dengue) எனும் வைரஸ் நமக்குப் பரவும்போது டெங்கு காய்ச்சல் வருகிறது.

நோயின் ஆரம்பத்தில் காய்ச்சல், தலைவலி, உடல்வலி, மூட்டுவலி, கண்வலி, வாந்தி, களைப்பு, இருமல் ஆகிய மிதமான அறிகுறிகள் மட்டுமே காணப்படும். நான்காம் நாளில் காய்ச்சல் கடுமையாகும். தாங்க முடியாத அளவுக்குத் தலைவலி, கண்ணுக்குப் பின்புறம் கடுமையான வலி, எலும்புகளை முறித்துப் போட்டது போல் எல்லா மூட்டுகளிலும் வலி ஆகியவை டெங்குவுக்கே உரித்தான அறிகுறிகள்.

அத்தோடு உடலில் அரிப்பும், சிவப்புப் புள்ளிகளும் தோன்றும். விரல்களால் முன்கையைப் பிடித்தால் அங்கே விரல் தடம் விழும்..

டைபாய்டு காய்ச்சல்

டைபாய்டு பாக்டீரியாவால் இது ஏற்படுகிறது .அசுத்தமான குடி நீரும் உணவும் தான் இது பரவுவதற்குக் காரணம். முதலில் காய்ச்சல், தலைவலி, உடல்வலியுடன் நோய் தொடங்கும். ஒவ்வொரு நாளும் காய்ச்சல் படிப்படியாக அதிகரித்து இரவில் கடுமையாகும்.

பசி குறையும். குமட்டல், வாந்தி, வயிற்றுவலி எனப் பல தொல்லைகள் தரும். உடல் சோர்வடையும் .இதைக் குணப்படுத்த நவீன மருந்துகள் பல உள்ளன. தொடக்கத்திலேயே சிகிச்சை பெற்றுக் கொண்டால் நோய் விரைவில் குணமாகும்.

உணவுச் சுத்தமும், குடிநீர் சுத்தமும் இந்தக் காய்ச்சலைத் தடுக்கும். அரண்கள்..

எலிக் காய்ச்சல்

தெருக்களில் தண்ணீர் தேங்கும் போது, எலி, பெருச்சாளி போன்றவையும் அந்தத் தண்ணீரில் புழங்கும். அப்போது அவற்றின் சிறுநீர்க் கழிவும் அதில் கலக்கும். அந்தக்கழிவுகளில் 'லெப்டோஸ்பைரா' எனும் கிருமிகள் இருந்தால் எலிக் காய்ச்சலைப் (Leptospirosis) பரப்பும்.

கடுமையான தலைவலி, காய்ச்சல், தொட்டாலே தாங்கமுடியாத தசைவலி, உடல்வலி, மஞ்சள்காமாலை, கண்களில் ரத்தக்கசிவு, சிறுநீரிலும் மலத்திலும் ரத்தம் போவது போன்றவை இதன் முக்கிய அறிகுறிகள்.

இந்த நோய்க்கும் நவீன மருந்துகள் நிறைய உள்ளன. நோயின் தீவிரத்தைப் பொறுத்து சிகிச்சை அமையும். தெருக்களில் நடக்கும் போது கணுக்கால் மூடும்படி செருப்பு அணிந்து கொள்வதும், வீட்டுக்கு வந்ததும் வெதுவெதுப்பான தண்ணீரில் கால்களைக் கழுவுவதும் இந்த நோயைத் தவிர்க்க உதவும்..

நிமோனியா காய்ச்சல்

இன்ஃபுளூயன்சா வைரஸ் மட்டுமல்லாமல் நியூமோக்காக்கஸ் எனும் பாக்டீரியா நுரையீரலைக் கடுமையாகப் பாதிப்பதாலும் நிமோனியா ஏற்படலாம். பெரும்பாலும் 5 வயதுக்கு உட்பட்ட குழந்தைகளையும், முதியோரையும் இது அதிகமாகப் பாதிக்கிறது. இந்தநோயுள்ள குழந்தை சாப்பிட மறுக்கும். கடுமையான காய்ச்சல், இருமல், சளி, வேகமாக மூச்சுவிடுதல், மூச்சுத்திணறல் போன்ற அறிகுறிகளும் தோன்றும். குழந்தை எந்தநேரமும் உறக்கத்திலேயே இருக்கும் அல்லது அழுது கொண்டிருக்கும்; மிகவும் சோர்வாகக்காணப்படும். சிறுநீர் பிரியாது. இந்தக் குழந்தைகளை அவசரப் பிரிவில் அனுமதித்து சிகிச்சை வழங்க வேண்டும்..

என்ன செய்ய வேண்டும்?·

காய்ச்சல் பாதிப்பு உள்ளவர்கள் நிறைய நீராகரங்களை எடுத்துக் கொள்ள வேண்டும். முக்கியமாக, காய்கறி சூப் மற்றும் பழச்சாறுகள் நீரிழப்பைத் தவிர்க்க உதவும்.·

காய்ச்சல் பாதிப்பு உள்ளவரிடம் இருந்து விலகி இருக்க வேண்டும்.·

கை, கால், முகத்தை அடிக்கடி சோப்புப் போட்டுக் கழுவவேண்டும்.·சளி, இருமல் இருப்பவர்கள் இருமும் போதும் தும்மும் போதும் வாயைக் கைக்குட்டையால் மூடிக்கொள்ள வேண்டும்.

முகக்கவசம் அணியலாம்.·

தெருக்களிலும் பொது இடங்களிலு ம்எச்சில் / சளியைத் துப்பக் கூடாது.·

காய்ச்சல் பரவும் காலத்தில் மக்கள் கூடும் பொது இடங்களுக்குத் தேவையில்லாமல் செல்ல வேண்டாம்.·

10 நிமிடங்களுக்குக் கொதிக்க வைத்து ஆறவைத்து வடிகட்டிய தண்ணீரைக் குடிப்ப துநல்லது.·

திறந்து வைக்கப்பட்ட உணவுகள், ஈக்கள் மொய்த்த உணவுகள் வேண்டாம்.

வீட்டையும், தெருக்களையும்சுத்தப்படுத்திபிளீச்சிங்பவுடர்தூவினால்ஈக்கள் வராது.·கொசுக்கடியிலிருந்து தப்பிக்க
உடல் முழுவதும் மறைக்கும் ஆடைகளை அணியலாம்;

கொசுவலை, கொசுவிரட்டிகள், களிம்புகளைப் பயன்படுத்தலாம்.·

எந்தவகை காய்ச்சல் என்றாலும் ஆரம்பத்திலேயே முறையான சிகிச்சைக்கு ஏற்பாடு செய்வது நல்லது..·

சுய சிகிச்சை வேண்டாம்.

தடுப்பூசி உதவும்!

இன்ஃபுளூயன்சா வைரஸுக்கு எதிராகத் தடுப்பூசி இருக்கிறது. மருத்துவரின் பரிந்துரையின் பேரில் குழந்தைகள் மற்றும் முதியோர்கள் வருடத்துக்கு ஒருமுறை மழைக்காலம் ஆரம்பிக்கும் முன்பு இதைச் செலுத்திக் கொள்ளலாம்.

நிமோனியாவைத் தடுக்கவும் ‘பிசிவி’ (PCV) தடுப்பூசி இருக்கிறது. இதை எல்லோரும் செலுத்திக் கொள்ளலாம்.