44 நிகர்நிலை பல்கலைக்கழகங்களின் அங்கீகாரத்தை ரத்து செய்ய உச்சநீதிமன்றம் தடை

by nandaa Tue Jan 26, 2010 12:00 pm

நாட்டின் பல்வேறு பகுதிகளில் உள்ள 44 நிகர்நிலை
பல்கலைக்கழகங்களின் அங்கீகாரத்தை ரத்து செய்ய மத்திய அரசுக்கு உச்ச
நீதிமன்றம் தடை விதித்துள்ளது. இப்போதுள்ள நிலையே நீடிக்க வேண்டும் என்று
நீதிபதிகள் உத்தரவிட்டுள்ளனர்.
நாடு
முழுவதும் தனியார் நிர்வாகத்தில் 128 நிகர்நிலை பல்கலைக்கழகங்கள் உள்ளன.
இவற்றின் தரத்தை ஆய்வு செய்ய குழு அமைக்கப்பட்டது. இந்த குழுவின்
அறிக்கையில் பல்வேறு நிகர்நிலைப் பல்கலைக் கழகங்களின் கல்வி தரம் குறைந்து
காணப்படுவதாக தெரிவிக்கப்பட்டிருந்தது.
இது தொடர்பான பொதுநலன் வழக்கை
உச்ச நீதிமன்றம் விசாரித்து வந்தது. கடந்த 18ம் தேதி வழக்கு விசாரணைக்கு
வந்தபோது, ‘‘கல்வி தரம் குறைந்தது என்று அடையாளம் காணப்பட்டுள்ள 44
நிகர்நிலை பல்கலைக்கழகங்களின் அங்கீகாரத்தை ரத்து செய்ய மத்திய அரசு
முடிவு செய்துள்ளது’’ என்று மத்திய மனிதவள மேம்பாட்டு அமைச்சகம்
தெரிவித்தது.

இந்த 44 நிகர்நிலை பல்கலைக்கழகங்களில் 2 லட்சம்
மாணவர்கள் படிக்கின்றனர். அதில், 16 நிகர்நிலை பல்கலைக்கழகங்கள்
தமிழகத்தைச் சேர்ந்தவை.

இந்த நிலையில், நீதிபதிகள் தல்வீர்
பண்டாரி, ஏ.கே.பட்நாயக் ஆகியோர் முன் வழக்கு நேற்று மீண்டும் விசாரணைக்கு
வந்தது. அப்போது, நிகர்நிலை பல்கலைக்கழகங்களின் சார்பில் ஆஜரான
வக்கீல்கள், தங்களையும் வழக்கில் சேர்க்க வேண்டும் என்று கோரினர். அரசின்
ஒருதலைபட்சமாக முடிவுக்கு எதிராக வாதாட வாய்ப்பு தர வேண்டும் என்று
அவர்கள் வேண்டுகோள் விடுத்தனர்.

பின்னர் நீதிபதிகள் கூறுகையில்,
‘‘இது பல நிகர்நிலை பல்கலைக்கழகங்கள் தொடர்பான விஷயம் மட்டும் அல்ல. பல
லட்சம் மாணவர்களின் எதிர்காலம் தொடர்பான பிரச்னையும் கூட. இதில்,
பாதிப்புக்குள்ளாகும் நிகர்நிலை பல்கலைக்கழகங்களின் கருத்தை கேட்காமல்
உத்தரவு பிறப்பிக்க மாட்டோம்’’ என்றனர். அப்போது அரசு தரப்பில் ஆஜரான
வக்கீல் கூறுகையில், ‘‘உச்ச நீதிமன்றத்தின் ஒப்புதல் பெறாமல் நிகர்நிலை
பல்கலைக்கழகங்களின் அங்கீகாரத்தை ரத்து செய்ய மாட்டோம்’’ என்று வாக்குறுதி
அளித்தார்.

அதை ஏற்க மறுத்த நீதிபதிகள் தொடர்ந்து கூறுகையில்,
‘‘தரமற்றவை என்று அரசு கூறும், 44 நிகர்நிலை பல்கலைக்கழகங்களின்
அங்கீகாரத்தை ரத்து செய்யும் விவகாரத்தில் தற்போதைய நிலையே தொடர வேண்டும்.
புதிதாக எந்த நடவடிக்கையையும் அரசு எடுக்கக் கூடாது. பதில் மனு தாக்கல்
செய்யுமாறு 44 நிகர்நிலை பல்கலைக்கழகங்கள் மற்றும் அவை ஏற்கனவே
இணைக்கப்பட்டிருந்த பல்கலைக்கழகங்களுக்கும் நோட்டீஸ் அனுப்ப
உத்தரவிடுகிறோம்.

இவ்வாறு நீதிபதிகள் கூறினர்.

44 நிகர்நிலை பல்கலைக்கழகங்களின் அங்கீகாரத்தை ரத்து செய்ய உச்சநீதிமன்றம் தடை 173465