கழுவேத்தி மூர்க்கன் - சினிமா விமர்சனம்

வழக்கமான கிராமத்து ஆக்‌ஷன் கதையாக இல்லாமல், அதில் சாதிக்கு எதிரான வாதத்தை முன் வைத்திருக்கும் புதுமைக்காக இயக்குநர் சை.கௌதமராஜைப் பாராட்டலாம்.

சாதி கடந்து நட்போடு பழகும் இரு நண்பர்களின் வாழ்வில் சாதி வெறி பிடித்த அரசியல்வாதிகள் ஆடும் சதுரங்க ஆட்டமே ‘கழுவேத்தி மூர்க்கன்.'

ராமநாதபுரத்து கிராமமொன்றில் ஆதிக்கச் சாதியைச் சேர்ந்த அருள்நிதியும், ஒடுக்கப்பட்ட சமூகத்தைச் சேர்ந்த சந்தோஷ் பிரதாப்பும் ஆருயிர் நண்பர்களாக இருக்கிறார்கள். இவர்களின் நட்புக்கு வில்லனாக வருகிறார் எதிர்க்கட்சியின் மாவட்டச் செயலாளர் ராஜசிம்மன். ஊருக்குள் தன் கட்சியின் போஸ்டரை ஒட்டவிடாமல் தடுக்கும் நண்பர்கள் இருவரையும் பழிவாங்க ராஜசிம்மன் கையாளும் தந்திரம் பலித்ததா, தன்மீது விழும் களங்கத்தையும் கொலைப்பழியையும் அருள்நிதி எப்படித் துடைத்தெறிகிறார் என்பதே மீதிக் கதை.

நாயகன் மூர்க்கனாக முறுக்கேறிய உடலோடும் வெட்டரிவாள் மீசையோடும் கம்பீரமாக வலம் வந்து ஸ்கோர் செய்கிறார் அருள்நிதி. நாயகி துஷாரா விஜயனுக்குக் கதையில் பெரிதாய் வேலையில்லை என்றாலும், கொஞ்சும் குறும்புப் பார்வையிலும், நக்கல் பேச்சிலும் வசீகரிக்கிறார். அருள்நிதியின் நண்பன் பூமி கதாபாத்திரத்தில் சந்தோஷ் பிரதாப் சாந்த சொரூபியாக வலம் வருகிறார். எதிரிகள் ‘சுத்துப்போடும்' காட்சியிலும் அதே சாந்தமுகத்தைக் காட்டுவதைத் தவிர்த்திருக்கலாம்.

வில்லன்களாக ‘யார்' கண்ணனும், ராஜசிம்மனும் பயமுறுத்துகிறார்கள். ‘உண்மை' என்ற பாத்திரத்தில் முனீஸ்காந்த், காவல் கண்காணிப்பாளர் முன் அதிகாரத்துக்கு எதிராக உண்மை யாக வசனம் பேசிவிட்டு நடக்கும் போது பின்னி எடுத்திருக்கிறார்.

‘மீசைன்றது வெறும் மயிர் தானே...', ‘நீங்க ஒருத்தன் தலைக்கு மேல இருக்கீங்கன்னு நினைச்சிட்டு இருக்கீங்கே, ஆனா நீங்களே இன்னொருத்தன் காலுக்கு அடியிலதான் இருக்கீங்கன்னு சொல்லிட்டுத் திரியுறாய்ங்கே!' எனப் படம் நெடுகிலும் பவர்ஃபுல் அரசியல் வசனங்கள் கவனிக்க வைக்கின்றன.

வழக்கமான கிராமத்து ஆக்‌ஷன் கதையாக இல்லாமல், அதில் சாதிக்கு எதிரான வாதத்தை முன் வைத்திருக்கும் புதுமைக்காக இயக்குநர் சை.கௌதமராஜைப் பாராட்டலாம். படத்தின் ஆரம்பத்தில் கழுமரம் குறித்த காட்சிகளில் எதிர்பார்ப்பைக் கூட்டுபவர், நடுவில் வழக்கமான பழிவாங்கல் கதையை, சுவாரஸ்யமில்லாத திரைக்கதையில் சொல்லியிருப்பதுதான் சறுக்கல்.

பின்னணி இசையில் அதிரடிக்கும் டி.இமான் ‘அவ கண்ணைப் பார்த்தா' பாடலில் மட்டும் ‘உள்ளேன் ஐயா' என்கிறார். தரின் ஒளிப்பதிவு ராமநாதபுர கிராமத்து வெக்கையை நமக்கும் கடத்துகிறது. அந்தக் காலத்து, பிரசாந்த், கார்த்திக் ரசிகர் மன்ற போர்டுகள், கிழிந்த அரசியல் பேனருக்குப் பின்னால் கம்பீரமாக நிற்கும் அம்பேத்கர் சிலை, கழுமரம் என கலை இயக்குநர் மகேந்திரன் பாண்டியன் கவனம் ஈர்க்கிறார். கே.கணேஷ் குமாரின் சண்டைப்பயிற்சி நன்றாக இருந்தாலும் யதார்த்தம் மீறியதால் திகட்டிவிடுகிறது. தேவைக்கேற்ப எடிட்டர் நாகூரான் ராமச் சந்திரனும் கத்திரி வைத்திருக்கலாம்.

பழைமைவாதத்தைத் தூக்கிப்பிடிக்காத கிராமத்துக் கதைக்கு நேர்த்தியான திரைக் கதையும் அமைத்து நியாயம் சேர்த்திருந்தால் இந்த மூர்க்கனை உச்சி மோந்திருக்கலாம்.

“வழக்கமான கிராமத்து ஆக்‌ஷன் கதையாக இல்லாமல், அதில் சாதிக்கு எதிரான வாதத்தை முன் வைத்திருக்கும் புதுமைக்காக இயக்குநர் சை.கௌதமராஜைப் பாராட்டலாம்.” -