கர்ப்ப கால ஸ்ட்ரெச் மார்க்குகள் எப்போது தோன்றும்? அதை தடுக்க முடியுமா?

பெரும்பாலான பெண்களுக்கு கர்ப்ப காலத்தில் ஸ்ட்ரெச் மார்க்ஸ் வரும். குழந்தைக்கு இடமளிக்கும் வகையில் வயிறு பெரிதாகும் போது தோல் நீண்டுள்ளது என்பதற்கான அறிகுறி தான் ஸ்ட்ரெச் மார்க்குகள். கர்ப்ப காலத்தில் ஸ்ட்ரெட்ச் மார்க்குகள் தோன்றுவதை நீங்கள் முற்றிலுமாகத் தடுக்க முடியாது, ஆனால் அது உண்டாவதற்கான வாய்ப்புகளைக் குறைக்கலாம்.

கர்ப்பகால ஸ்ட்ரெச் மார்க்ஸ் பிரவுன், இளஞ்சிவப்பு, சிவப்பு நிறத்தில் ஏற்படும் கோடுகள். ஸ்ட்ரை கிராவிடரம் (Striae Gravidarum) என்ற மருத்துவச் சொல்லில் இதனை அழைப்பார்கள். லத்தீனின் இதற்கு அர்த்தம் கர்ப்பக் கோடுகள். பொதுவாக வயிறு மட்டுமின்றி, மார்பகங்கள், தொடைகள், பிட்டம் மற்றும் மேல் கைகளில் கூட தோன்றும். இந்த ஸ்ட்ரெச் மார்க்ஸ் நீங்கள் பெறுவது மற்றும் அவை எந்தளவு வெளியே தெரியும் வகையில் அமையும் என்பதில் மரபியல் பங்கும் உண்டு.

வெளிர் நிறம் கொண்டவர்களுக்கு இவை அதிகமாகத் தெரியும். இளம் வயது கர்ப்பிணி, கர்ப்பக் காலத்தில் விரைவில் எடை அதிகரித்தால், இரட்டைக் குழந்தைகளை கொண்டிருந்தால் ஸ்ட்ரெச் மார்குகளை பெறுவதற்கான வாய்ப்பு அதிகம் என்கின்றனர் மருத்துவர்கள். கர்ப்ப காலத்தில் ஹார்மோன் அளவுகளில் ஏற்படும் மாற்றங்கள் சருமத்தை கொஞ்சம் மெல்லியதாக மாற்றும் இதனாலும் இந்த ஸ்ட்ரெச் மார்க் ஏற்படக்கூடும்.

எப்போது ஏற்படும்?

சில பெண்கள் 6 மாதங்களில் ஏற்படலாம் , சிலருக்கு 9வது மாதத்தின் கடைசி சில வாரங்களில் ஏற்படலாம், சில பெண்கள் அதிர்ஷ்டசாலிகள், அவர்களுக்கு ஸ்ட்ரெச் மார்க்கே ஏற்படாமல் போகலாம்.

எவ்வாறு தவிர்ப்பது?

முன்னரே கூறியது போல் ஸ்ட்ரெட்ச் மார்க்குகளை முற்றிலுமாகத் தடுக்க முடியாது. அதன் தோற்றத்தைக் குறைக்கலாம்.

கர்ப்ப காலத்தில் எடை அதிகரிப்பு விரைவானதாக இல்லாமல், படிப்படியானதாக இருக்க வேண்டும். அப்போது ஸ்ட்ரெச் மார்க் ஏற்படுவது குறையும்.

ஆன்டிஆக்ஸிடன்ட்கள் சருமத்திற்கு ஊட்டமளிக்கும் காய்கறிகள், உணவுகளை உண்ணுங்கள். கீரை, கேரட் மற்றும் சர்க்கரை வள்ளிக்கிழங்கு போன்றவற்றில் இவை உள்ளது.

வைட்டமின் இ சத்து நிரம்பிய நட்ஸ்கள், வெண்ணெய், ப்ரோக்கோலி போன்றவற்றையும் சேர்த்துக்கொள்ளுங்கள். நிறைய புரதச்சத்து உணவுகளை உட்கொள்ளுங்கள். சைவ உணவுப் பழக்கம் கொண்டவர்களுக்கு பருப்பு, தயிரில் புரதம் நிறைந்துள்ளது.

நிறைய தண்ணீர் குடிக்க வேண்டும்

மார்பகங்களில் ஸ்ட்ரெச் மார்க் ஏற்படுவதைக் தவிர்க்க நன்கு பொருந்தக் கூடிய, தாங்கிப் பிடிக்கக் கூடிய பிராவை அணிய வேண்டும்.