இந்தியா - (இந்திய தேசிய வளர்ச்சி ஒருங்கிணைந்த கூட்டணி) I.N.D.I.A - INDIAN NATIONAL DEVELOPMENTAL INCLUSIVE ALLIANCE

by **சிவா** Tue Jul 18, 2023 7:14 pm

பா.ஜ.,வுக்கு எதிரான எதிர்க்கட்சிகளின் கூட்டணிக்கு, ‛இந்தியா '- (இந்திய தேசிய வளர்ச்சி ஒருங்கிணைந்த கூட்டணி) (I.N.D.I.A.,-- INDIAN NATIONAL DEVELOPMENTAL INCLUSIVE ALLIANCE) என பெயர் சூட்டப்பட்டு உள்ளது.

பாட்னாவில் எதிர்க்கட்சிகளின் முதல் கூட்டம் நடைபெற்ற த்தசில வாரங்களுக்குப் பிறகு, பெங்களூருவில் எதிர்க்கட்சிகளின் கூட்டம் ஜூலை 17, 18 தேதிகளில் இரண்டு நாட்களாக நடைபெறுகிறது. வருகிற மக்களவைத் தேர்தலுக்கான எதிர்க்கட்சிக் கூட்டணிக்கு ‘இந்தியா’ ( INDIA – இந்திய தேசிய வளர்ச்சி உள்ளடக்கிய கூட்டணி) என்று பெயர் சூட்டப்பட்டுள்ளது.

2024 மக்களவைத் தேர்தலில், பிரதமர் நரேந்திர மோடி தலைமையிலான, மத்தியில் ஆளும் தேசிய ஜனநாயகக் கூட்டணியை (என்.டி.ஏ) எதிர்கொள்ள, நாடு முழுவதும் உள்ள, 26 எதிர்க்கட்சிகளின் உயர்மட்டத் தலைவர்கள், பெங்களூருவில், செவ்வாய்க்கிழமை கூடி ஆலோசனை நடத்தியதால் இந்த வளர்ச்சி ஏற்பட்டுள்ளது.

இந்தியன் எக்ஸ்பிரஸுக்கு கிடைத்த ஆவணத்தின்படி, “அரசியலமைப்புச் சட்டத்தில் பொதிந்துள்ள இந்தியா என்ற கருத்தைப் பாதுகாப்பதற்கான” 26 கட்சிகளின் தீர்மானத்தைக் குறிப்பிடுகிறது. “இந்திய அரசியலமைப்பின் அடிப்படைத் தூண்களான மதச்சார்பற்ற ஜனநாயகம், பொருளாதார இறையாண்மை, சமூக நீதி மற்றும் கூட்டாட்சி ஆகியவை முறையாகவும் அச்சுறுத்தும் வகையிலும் சிதைக்கப்படுகின்றன” என்று அந்த ஆவணம் கூறுகிறது.

அரசியல் போட்டியாளர்களுக்கு எதிராக மத்திய பா.ஜ.க அரசு “மத்திய முகமைகளை தவறாகப் பயன்படுத்துகிறது. பா.ஜ.க அல்லாத ஆளும் மாநிலங்களின் தேவைகளை புறக்கணிக்கிறது” என்று அந்த ஆவணம் கூறுகிறது. மேலும், மணிப்பூரில் மனிதாபிமான துயரம் மற்றும் அத்தியாவசியப் பொருட்களின் விலை எப்போதும் உயர்ந்து வரும் கடுமையான பொருளாதார நெருக்கடி மற்றும் வேலையில்லா திண்டாட்டம் பற்றிய கவலைகள் எழுப்பப்பட்டுள்ளன.

“சிறுபான்மையினருக்கு எதிராக உருவாக்கப்படும் வெறுப்பு மற்றும் வன்முறையைத் தோற்கடிக்க நாங்கள் ஒன்று சேர்ந்துள்ளோம்; பெண்கள், தலித்துகள் மற்றும் ஆதிவாசிகளுக்கு எதிராக அதிகரித்து வரும் குற்றங்களை நிறுத்த வேண்டும்; சமூகம், கல்வி மற்றும் பொருளாதாரத்தில் பின்தங்கிய அனைத்து சமூகங்களிடமும் நியாயமான முறையில் கோரிக்கைகளை கேட்பது, முதல் கட்டமாக, ஜாதிவாரி கணக்கெடுப்பை அமல்படுத்த வேண்டும்” என, ஆவணங்களில் கூறப்பட்டுள்ளது.

காங்கிரஸ், திரிணாமுல் காங்கிரஸ், திராவிட முன்னேற்றக் கழகம், ஆம் ஆத்மி கட்சி, ஐக்கிய ஜனதா தளம், ராஷ்டிரிய ஜனதா தளம், ஜார்கண்ட் முக்தி மோர்ச்சா, தேசியவாத காங்கிரஸ் கட்சி உள்ளிட்ட 26 எதிர்க்கட்சிகளின் தலைவர்கள், தனித்தனியாகவோ அல்லது கூட்டணியாகவோ டெல்லி மற்றும் 10 மாநிலங்களில் ஆட்சியில் உள்ளனர். உத்தவ் தாக்கரே பிரிவு சிவசேனா, சமாஜ்வாடி கட்சி, ராஷ்டிரிய லோக் தளம், அப்னா தளம் (காமராவாடி), ஜம்மு காஷ்மீர் தேசிய மாநாட்டு கட்சி, மக்கள் ஜனநாயகக் கட்சி, இந்திய கம்யூனிஸ்ட் கட்சி (மார்க்சிஸ்ட்), இந்திய கம்யூனிஸ்ட் கட்சி, இந்திய கம்யூனிஸ்ட் கட்சி (மார்க்சிஸ்ட்-லெனினிஸ்ட்) விடுதலை, புரட்சிகர சோசலிஸ்ட் கட்சி, அகில இந்திய பார்வர்டு பிளாக், மருமலர்ச்சி திராவிட முன்னேற்றக் கழகம், விடுதலைச் சிறுத்தைகள் கட்சி, கொங்குநாடு மக்கள் தேசியக் கட்சி, மனிதநேய மக்கள் கட்சி, இந்திய யூனியன் முஸ்லிம் லீக், கேரள காங்கிரஸ் (எம்), கேரள காங்கிரஸ் (ஜோசப்) ஆகிய கட்சிகள் இணைந்துள்ளன.

பெங்களூருவில் நடைபெற்ற எதிர்க்கட்சிகளின் ஒருங்கிணைப்பு மாநாட்டின் 2-வது நாள் நிகழ்வில் பேசிய காங்கிரஸ் தலைவர் மல்லிகார்ஜுன கார்கே, காங்கிரஸ் கட்சிக்கு அதிகாரத்திலோ அல்லது பிரதமர் பதவியிலோ ஆர்வம் இல்லை என்று கூறினார். மேலும், அவர் கூறினார், “மாநில அளவில் எங்களில் சிலருக்கு இடையே உள்ள வேறுபாடுகளை நாங்கள் அறிவோம்; இவை கருத்தியல் சார்ந்தவை அல்ல என்றும், மக்களின் நலனுக்காக ஒதுக்கி வைக்க முடியாத அளவுக்கு அவை பெரிய விஷயங்கள் இல்லை என்றும் கூறினார்.

மல்லிகார்ஜுன கார்கே மேலும் கூறுகையில், நாங்கள் 26 கட்சிகள், 11 மாநிலங்களில் ஆட்சியில் இருக்கிறோம். பா.ஜ.க தனித்து 303 இடங்களைப் பெறவில்லை, கூட்டணிக் கட்சிகளின் வாக்குகளைப் பயன்படுத்திக்கொண்டு அவற்றை நிராகரித்தது. இன்று நடைபெற உள்ள தேசிய ஜனநாயகக் கூட்டணிக் கூட்டம் குறித்து மல்லிகார்ஜுன கார்கே பேசுகையில், “பா.ஜ.க தலைவர் ஜே.பி. நட்டா மற்றும் அந்த கட்சித் தலைவர்கள் மாநிலம் விட்டு மாநிலம் ஓடி பழைய கூட்டாளிகளுடன் ஒட்டுப்போடுகிறார்கள்” என்றார். மேலும், எதிர்க்கட்சிகள் கூட்டம் அரசியலமைப்பு, ஜனநாயகம், மதச்சார்பின்மை, சமூக நீதி ஆகியவற்றை பாதுகாக்கும் நோக்கில் நடத்தப்பட்டது என்று கூறினார்.

இதனிடையே, பிரதமர் நரேந்திர மோடி எதிர்க்கட்சிகள் மீது கடுமையான தாக்குதலைத் செவ்வாய்க்கிழமை தொடங்கினார். பெங்களூருவில் நடந்து வரும் எதிர்க்கட்சித் தலைவர்களின் கூட்டத்தை ‘தீவிரமான ஊழல் மாநாடு’ என்று அழைத்தார். இந்த வாரிசு கட்சிகள் ‘குடும்பம் மற்றும் குடும்பத்திற்காக’ என்ற முழக்கத்தைப் பின்பற்றுகின்றன என்று அவர் கூறினார்.

by **T.N.Balasubramanian** Tue Jul 18, 2023 7:39 pm

இந்த பெயர் வங்க முதல்வர் மம்தா பெனெர்ஜி அவர்கள் சூட்டியது என செய்தித்தாள்கள் கூறுகின்றன.

by **சிவா** Tue Jul 18, 2023 7:44 pm

பா.ஜ.,வை வீழ்த்தும் வரை ஓய மாட்டோம்

பெங்களூரு: பா.ஜ.,வை வீழ்த்தும் வரை எதிர்க்கட்சிகள் கூட்டணி ஓயாது என காங்கிரஸ் முன்னாள் தலைவர் ராகுல் கூறியுள்ளார்.

பெங்களூருவில் நடந்த கூட்டத்திற்கு பிறகு எதிர்க்கட்சி தலைவர்கள் நிருபர்களை சந்தித்தனர்.

அப்போது அவர்கள் கூறியதாவது:

காங்கிரஸ் தலைவர் கார்கே

மோடிக்கு எதிராக இந்தியாவே உள்ளதை எடுத்து காட்ட கூட்டணிக்கு ‛இன்டியா' என பெயர் சூட்டப்பட்டு உள்ளது. எதிர்க்கட்சிகளின் அடுத்த கூட்டம் மும்பையில் நடக்கும். இதற்கான தேதி விரைவில் அறிவிக்கப்படும். கூட்டணிக்கு 11 ஒருங்கிணைப்பாளர்கள் நியமிக்கப்படுவார்கள்.

அரசியல் ரீதியாக வேறுபாடுகள் இருந்தாலும் நாட்டை காக்க ஒன்று சேர்ந்துள்ளோம். எதிர்க்கட்சிகளின் ஒற்றுமையால் பா.ஜ., அச்சத்தில் உள்ளது. அமலாக்கத்துறை, சிபிஐ ஆகியவை எதிர்க்கட்சிகளுக்கு எதிரான ஆயுதமாக பா.ஜ., பயன்படுத்துகிறது.

லோக்சபா தேர்தலில் பா.ஜ.,வை வீழ்த்துவது உறுதி. எதிர்க்கட்சிகள் ஒன்றிணைவதை பார்த்து, சிறிய கட்சிகள் ஒன்றிணைந்து வருகின்றன. பா.ஜ., கூட்டணியில் உள்ளதாக கூறப்படும் 38 கட்சிகளில் பலவற்றின் பெயர்களை கேள்வி பட்டது இல்லை.

மேற்கு வங்க முதல்வர் மம்தா

எதிர்க்கட்சி கூட்டம் பயனுள்ளதாகவும் ஆக்கப்பூர்வமாகவும் இருந்தது. எங்களுடன் சவால் விட்டால் தே.ஜ., கூட்டணி தோற்கும். இனம் மொழி மதம் கடந்து ஒன்று சேர்ந்துள்ளோம். ஐக்கிய முற்போக்கு கூட்டணி போல் தேசிய ஜனநாயக கூட்டணியும் காணாமல் போகும்.பா.ஜ.,வை அகற்றி நாட்டை காக்க வேண்டும். எதிர்க்கட்சிகள் கூட்டணி வெற்றி பெறும் .பா.ஜ., தோல்வியை சந்திக்கும்

டில்லி முதல்வர் கெஜ்ரிவால்

மோடி இந்தியாவில் யாரும் மகிழ்ச்சியாக இல்லை. அனைத்து துறைகளையும் பா.ஜ., அழித்துவிட்டது. மேலும் பல கட்சிகள் இணைந்து வருகின்றன. பா.ஜ., ஆட்சியில் அரசு துறைகள் தனியார் மயமாக்கப்பட்டு வருகின்றன.

கடந்த 9 ஆண்டில் நாட்டை வளர்ச்சி பாதைக்கு அழைத்து செல்ல மோடிக்கு வாய்ப்பு இருந்தது. ஆனால், ஒன்றும் நடக்கவில்லை. மண்ணில் இருந்து விண் வரைக்கும் அனைத்தையும் பா.ஜ., விற்று விட்டது.

மஹா., முன்னாள் முதல்வர் உத்தவ் தாக்கரே

சர்வாதிகாரத்திற்கு எதிராக நாங்கள் ஒன்று சேர்ந்துள்ளோம். தேசமே எங்களது குடும்பம். அதனை பாதுகாக்க போராடி வருகிறோம். நாட்டை பாதுகாப்பாக வைத்து இருப்போம்.

காங்கிரஸ் முன்னாள் எம்.பி., ராகுல்

பா.ஜ.,வின் கொள்கைகளுக்கு எதிராக எங்களது போராட்டம் இருக்கும். நாட்டின் குரலுக்காக இந்த போராட்டம் நடக்கிறது. மோடிக்கும், நாட்டுக்கும் இந்த போராட்டம் நடக்கிறது. பா.ஜ.,வின் தீய சிந்தனை மற்றும் சித்தாந்தத்திற்கு எதிராக நாம் ஒன்றிணைந்து உள்ளோம்.

பா.ஜ,விடம் இருந்து நாட்டை பாதுகாக்க நாம் ஒரு செயல் திட்டத்தை உருவாக்க வேண்டும். நாட்டில் ஒரு புறும் விலைவாசியும் மறுபுறம் வேலைவாய்ப்பின்மையும் அதிகரித்து வருகிறது. இந்த போராட்டம் இரண்டு கட்சிகளுக்கு இடையிலானது அல்ல.

இந்தியாவை கொள்கையை பாதுகாக்க போராட்டம். வரலாற்றை பார்த்தால், இந்தியாவின் வரலாற்றை எதிர்த்து யாரும் போரிட்டது கிடையாது. தற்போது, இந்தியாவின் கொள்கைகளுக்கும் மோடிக்கும் இடையே நடக்கும் போராட்டம் ஆகும். பா.ஜ.,வை வீழ்த்தும் வரை ஓயாது.

இவ்வாறு அவர்கள் கூறினர்.

by **சிவா** Tue Jul 18, 2023 7:59 pm

‘அது முழுக்கவே ஊழல்வாதிகள் மாநாடு’: பெங்களூரு கூட்டம் பற்றி மோடி

அந்தமான், நிக்கோபார் யூனியன் பிரதேசத்தின் தலைநகர் போர்ட் பிளேயரில் உள்ள வீர சாவர்க்கர் சர்வதேச விமான நிலையத்தின் புதிய ஒருங்கிணைந்த முனைய கட்டிடம் கட்டப்பட்டுள்ளது. இந்த கட்டிடத்தை பிரதமர் மோடி இன்று காணொலி காட்சி மூலம் திறந்து வைத்தார். இந்த புதிய முனையம் ஒரே நேரத்தில் 10 விமானங்களை நிறுத்தும் வகையில் கட்டப்பட்டுள்ளது. மேலும் ஆண்டுக்கு 50 லட்சம் பயணிகளை கையாளும் திறன் கொண்டது.

இந்நிலையில், இந்த நிகழ்ச்சியில் பிரதமர் நரேந்திர மோடி, பெங்களூருவில் நடைபெற்று வரும் எதிர்க்கட்சித் தலைவர்களின் கூட்டத்தை ‘அது முழுக்கவே ஊழல்வாதிகள் மாநாடு’ என்று எதிர்க்கட்சிகள் மீது கடுமையாக தாக்கி பேசினார்.

“இந்த ‘வாரிசு’ கட்சிகள் ‘குடும்பத்தால் மற்றும் குடும்பத்திற்காக’ என்ற தாராக மந்திரத்தை பின்பற்றுகின்றன. நாட்டின் ஏழைக் குழந்தைகளின் வளர்ச்சியில் அவர்களுக்கு (எதிர்க்கட்சிகள்) அக்கறை இல்லை. அவர்களது குடும்பத்திற்கு ஊழலை அதிகரிப்பதே அவர்களின் பொதுவான குறைந்தபட்ச திட்டமாகும்.

‘ஜனநாயகம்’ என்றால் ‘மக்களால் மக்களுக்காக மக்களே நடத்தும் ஆட்சி தான். ஆனால் இந்த வாரிசுக் கட்சிகள் ‘குடும்பத்தால், குடும்பங்களுக்காக, குடும்பத்திற்காக’ என்ற முழக்கத்தைக் கொண்டுள்ளன. அவர்களுக்கு, அவர்களின் குடும்பம் தான் முதன்மையானது, தேசம் என்றால் எதுவுமில்லை.

இன்று, நாட்டு மக்கள் 2024ல் மீண்டும் எங்களது அரசை கொண்டு வர முடிவு செய்திருக்கிறார்கள். அப்போதும் கூட, இந்தியாவின் மோசமான அவலத்திற்கு காரணமானவர்கள் தங்கள் சொந்த கடைகளை அமைத்துள்ளனர்.

அவர்கள் (எதிர்க்கட்சிகள்) வேறு ஏதாவது பாடலைப் பாடுகிறார்கள்.ஆனால் யதார்த்தம் வேறு ஒன்று. தயாரிப்பு ஒன்று தான். ஆனால், வேறு ஏதாவது ஒரு லேபிள் போடப்பட்டுள்ளது. இதுதான் அவர்களின் கடையின் உண்மை. அவர்களின் கடையில் இரண்டு பொருட்களுக்கு உத்தரவாதம் உள்ளது. ஒன்று, சாதிவெறி என்ற விஷத்தை விற்கிறார்கள். இரண்டு, அவர்கள் வரம்பற்ற ஊழல் செய்கிறார்கள். அவர்களின் தயாரிப்பு தான் 20 லட்சம் கோடி ரூபாய் ஊழல்.

இந்த நாட்களில், அவர்கள் பெங்களூரில் கூடுகிறார்கள். ஒரு காலத்தில், மிகவும் பிரபலமான ஒரு பாடல் உள்ளது: (ஒரே முகத்தில், மக்கள் பல முகங்களை வைக்கிறார்கள்). இவர்கள் ஒரே பிரேமில் கேமரா முன் தோன்றும் போது, அந்தக் காட்சியைப் பார்க்கும் நாட்டின் குடிமக்களின் மனதில் முதலில் தோன்றும் எண்ணம், ‘பல லட்சம் கோடி ஊழல்’ என்பதுதான்.

அது (பெங்களூருவில் எதிர்க்கட்சி கூட்டம்) முழுக்கவே ஊழல்வாதிகள் மாநாடு என நாட்டு மக்கள் சொல்கிறார்கள். இங்கே, கோடிக்கணக்கான ஊழல் வழக்கில் ஜாமீனில் இருக்கும் ஒருவர், அவர்கள் மிகவும் மரியாதையுடன் பார்க்கப்படுகிறார்கள். முழு குடும்பமும் ஜாமீனில் இருந்தால், அவர்கள் இன்னும் அதிகமாக மதிக்கப்படுகிறார்கள்.

ஊழலை ஊக்குவிப்பதற்காக இந்த கூட்டம் நடத்தப்படுவதாக மக்கள் கூறுகின்றனர். தமிழகத்தில் ஊழல் வழக்குகள் இருந்தும் தி.மு.க-வுக்கு எதிர்க்கட்சிகள் ஆதரவு கொடுத்துள்ளன. மேற்கு வங்கத்தில் நடந்த பஞ்சாயத்து தேர்தல் வன்முறைகள் தொடர்பாக இடதுசாரிகளும், காங்கிரஸும் மவுனம் காக்கிறார்கள். ” என்று பிரதமர் மோடி கூறினார்.

by **சிவா** Tue Jul 18, 2023 8:41 pm

அடுத்த கூட்டம் எந்த ஊரில் போடவேண்டும் என மிக முக்கிய‌ முடிவெடுக்க கூடிய பெங்களூர் எதிர்கட்சி கூட்டம், முடிவு எட்டப்படாமலேயே முடிந்தது என்கிறது பெங்களூர் செய்திகள்.

அதாவது கூட்டம் கூடிய ஓரே நோக்கம் அடுத்த கூட்டத்தை முடிவு செய்யத்தான். ஆறுதல்

ஆனால் அதுவும் பெரும் ஆலோசனைக்கு பின் முடிவெடுக்கப்படாமல் முடிந்தது.. கன்னத்தில் அறை

by **Dr.S.Soundarapandian** Wed Jul 19, 2023 1:01 pm

by **சிவா** Wed Jul 19, 2023 1:18 pm

ஆக இந்திய அரசியல் கோப்பை கால்பந்து அணிகள் தயாராகிவிட்டன‌

முதல் அணி இருமுறை சாம்பியன் பட்டம் பெற்று அசைக்கமுடியா இடத்தி இருக்கும் பாஜக அணி, அவர்களின் பெரும் பலன் கேப்டன் மோடி அவர்தான் கோல் கீப்பரும் கூட‌

அவரை மீறி கோல் அடிப்பது என்பதல்ல அவர் இருக்கும் பக்கம் பந்தை கொண்டு செல்வதே முடியாத விஷயம், அவர் ஒருவரே ஆயிரம் ஆட்டகாரருக்கு சமம்

இதுபோக தடுப்பு ஆட்டக்காரர் கட்காரி , ஜெய்சங்கர் என பலம் பெரிது

தாக்குதல் ஆட்டக்காரராக அமித்ஷா, யோகி என பலர் உண்டு இவர்கள் ஆட ஆரம்பித்தால் கோல் மழை தப்பாது

ஆக அனுபவம், கள நிலவரம், நாங்கள்முக்கியமல்ல வெற்றிதான் முக்கியம் என பந்தை கடத்தும் லாவகம் என அவர்கள் மிக மிக பலமானவர்கள்

எதிர்தரப்பில் ஒரு அணி திரள்கின்றது

அவர்கள் கோல் கீப்பர் ராகுலார், இவரின் பலவீனம் ஆட்டம் நடக்கும் போதே மைதானத்தில் ஐஸ் விற்றால் அங்கு ஓடி ஐஸை உறிஞ்சுவார், பாப்கான் எவனாவது சுட்டால் அவரும் சுடுவார், கூட்டத்தின் நடுவில் இருந்து சப்பாத்தி உண்பார் பின் கோல் போஸ்ட் என்னாகும்?

இதனால் அவரை தலைவர் என சொல்லமாட்டார்கள், யார் கேப்டன் என்பது அவர்களுக்கே தெரியாது

இது போக களத்தின் வீரர்களெல்லாம் எல்லையிட்டு ஆடுவார்கள், அதாவது கால்பந்து என்றால் ஓடி ஓடி ஆடவேண்டும், இவர்களோ வட்டமிட்டு கொண்டு என் எல்லைக்குள் நீ வராதே உன் எல்லைக்குள் நான் வரமாட்டேன் என அப்படியே சிலை போல் நிற்பார்கள்

எதிரணி புகுந்து அடிக்கும் போதும் இவர்கள் வட்டத்தை விட்டு வரமட்டார்கள் சக வீரன் அருகில் வந்தாலே "போ இது என் இடம், உன் இடம் அங்கே" என விரட்டுவார்கள்

உச்சமாக பந்து காலுக்கு வந்தால் சக ஆட்டகாரனுக்கு தரமாட்டார்கள் அப்படியே வைத்து சிரிப்பார்கள், எல்லோரும் ஓடுங்கள் நானே கோல் அடிக்க வேண்டும் என்பார்கள்

அதைவிட சர்ச்சையாக நீ ஒரு கோல் அடித்தால் நான் இன்னொன்று அவன் இன்னொன்று என மைதானத்திலே குழம்புவார்கள்

ஆக இவர்கள் இவர்களுக்குள் தனியாக‌ ஆடிகொண்டிருக்கும் நேரம் எதிரணி ஏகபட்ட கோல்களை அடித்துவிடும்

இவர்கள் முதலில் தங்களையே நம்பமாட்டார்கள் எதிரணியினை கண்காணிக்க சொன்னால் தங்கள் ஆட்டகாரனை அதிகம் கண்காணிட்து கட்டுபடுத்துவார்கள், அதுதான் அவர்களுக்கு முக்கியம்

இவர்களில் ராகுல் போக இன்னும் பலர் உண்டு, தமிழக ஸ்டாலினார் எனும் ஆட்டக்காரர் உள்ளூர் ஆட்டத்திலே பிரசாந்த் கிஷொர் என்பவர் சொன்னபடி ஆடியவர் அவராக ஆடியவர் அல்ல‌

அவர் இந்த முக்கியமான கட்டத்தில் எபப்டி ஆடுவாரோ தெரியாது

இதுபோக சரியான நேரம் பந்தை வெளியே அடிக்கும் மம்தா, முன்பு தன்னை கோல் அடிக்க விடாத காங்கிரஸை மனதில் வன்மம் வைத்திருகும் சரத்பவார், காங்கிரஸ் ஒழிந்தால்தான் தனக்கு நிம்மதி என கருதும் ஜெஜ்ரிவால் போன்றவர்கள் சக வீரனையே காலை தட்டிவிடுபவர்கள்

இனி பயிற்சி தொடங்கி களத்துக்கு வரும்போது காமெடிக்க பஞ்சமிராது என்பது மட்டும் நிச்சயம்

ஆக மோடி அணி எப்போதும் தயார் என களத்தில் நிற்க இவர்கள் இப்போதுதான் விளையாட்டு மேலுடை அணிந்து அதில் இந்தியா என எழுதிகொண்டிருக்கின்றார்கள்

ஆட்டத்துக்கான காலம் நெருங்க நெருங்க கூடுதல் சுவாரஸ்யங்களை காணலாம் , அவர்களின் முதல்சிக்கல் பேனரிலே எல்லார் படத்தையும் இடுவது அதற்கே உலகின் மிகபெரிய பேனர் வேண்டும்

அணி வீரர்கள் பெயரை எழுதினாலே சீனபெருஞ்சுவர் வேண்டும், இப்படி பெரும் சுவாரஸ்யம் இருப்பதால் ஆவலுடன் போட்டியினை எதிர்பார்க்கின்றது தேசம்

by **சிவா** Wed Jul 19, 2023 8:50 pm

INDIA - அரசியல் கூட்டத்தை ஏன் அரசு விழாவாக நடத்தினீர்கள்? - குமாரசாமி கேள்வி

பெங்களூருவில் நடந்த எதிர்க்கட்சித் தலைவர்களின் கூட்டம், அரசு விழாவாக நடந்திருக்கிறது. அரசியல் கட்சித் தலைவர்களை ஐ.ஏ.எஸ் அதிகாரிகள் வரவேற்று அழைத்து வந்தது அதிகார துஷ்பிரயோகம் என்று ஜனதா தளம் கட்சித்தலைவர் குமாரசாமி கண்டித்திருக்கிறார். பா.ஜ.க கூட்டணியில் குமாரசாமி சேருவார் என்று எதிர்பார்க்கப்பட்டு வரும் நிலையில் குமாரசாமியின் கருத்து, பெங்களூர் அரசியல் வட்டாரத்தில் பரபரப்பை ஏற்படுத்தியிருக்கிறது.

நாடு முழுவதுமிருந்து வந்த அரசியல் கட்சித்தலைவர்களுக்கு சேவை செய்ய கர்நாடக காங்கிரஸ் அரசு, ஐ.ஏ.எஸ் அதிகாரிகளை நியமித்திருக்கிறது. கர்நாடகத்தின் கௌரவத்திற்கு இதனால் இழுக்கு வந்திருக்கிறது. அரசியல் கட்சித் தலைவர்களுக்கு விருந்தோம்பல் கொடுக்கும் பொறுப்பை, அதிகாரிகளிடம் கொடுப்பது கன்னடத்து மக்களை கேவலப்படுத்தும் செயல். இது கர்நாடக மாநிலத்திற்கே பெரும் அவமானம் என்று குமாரசாமி பொங்கியிருக்கிறார்.

சட்டமன்றத் தேர்தலில் காங்கிரஸ் பெற்ற வெற்றிக்கு பின்னரே குமாரசாமி, காங்கிரஸ் குறித்து கடுமையான வார்த்தைகளில் விமர்சனம் செய்து வருகிறார். தன்னுடைய ஒட்டுவாங்கியாக இருந்த ஒக்கலிகர்கள் ஆதரவை காங்கிரஸ் அபகரித்தக்கொண்டதால் குமாரசாமி கோபத்தில் இருக்கிறார் என்றும், அதன் காரணமாக பா.ஜ.கவுடன் வரும் தேர்தலில் கூட்டணி சேர்வார் என்றும் எதிர்பார்க்கப்பட்டு வரும் நிலையில் இப்படியொரு விமர்சனம் வந்திருக்கிறது.

குமாரசாமியின் விமர்சனங்களுக்கு பதிலளித்துள்ள முதல்வர் சித்தாராமையா, இதில் தவறில்லை. கூட்டத்திற்கு வந்திருந்த பெரும்பாலான அரசியல் கட்சி தலைவர்கள், பல மாநிலத்தின் முதல்வர்களாக இருக்கிறார்கள். இன்னும் சிலர் முன்னாள் முதல்வர்களாகவும், முன்னாள் மத்திய அமைச்சர்களாகவும் இருந்திருக்கிறார்கள். விருந்தினர்களாக வருபவர்களை முறைப்படி அழைத்து மரியாதை செலுத்தவே அதிகாரிகள் நியமிக்கப்பட்டார்கள். இது கடந்த காலத்திலும் நடைமுறையில் இருந்திருப்பதாக குறிப்பிட்டுள்ளார்

by **Dr.S.Soundarapandian** Thu Jul 20, 2023 12:30 pm

”ஒக்கலிகர்கள் ஆதரவை காங்கிரஸ் அபகரித்தக்கொண்டதால் குமாரசாமி கோபத்தில் இருக்கிறார் ” - போச்சா !

by Sponsored content

இந்தியா - (இந்திய தேசிய வளர்ச்சி ஒருங்கிணைந்த கூட்டணி) I.N.D.I.A - INDIAN NATIONAL DEVELOPMENTAL INCLUSIVE ALLIANCE