"மதம் மாறிய இந்துக்களை அவமானப்படுத்திவிட்டார்" - திமுக புகாரில் ஸ்டன்ட் மாஸ்டர் கனல் கண்ணன் கைது

சினிமா ஸ்டன்ட் மாஸ்டர் கனல் கண்ணன் கன்னியாகுமரி மாவட்டத்தைச் சேர்ந்தவர். இந்து முன்னணியின் கலை, இலக்கிய அணி மாநிலத் தலைவராகவும் இருக்கிறார் கனல் கண்ணன். இவர் தனது ட்விட்டர் பக்கத்தில் கடந்த மாதம் 18-ம் தேதி ஒரு வீடியோவைப் பதிவேற்றம் செய்திருந்தார். அந்த வீடியோவில், கிறிஸ்தவ மத போதகர் ஒருவர் இளம்பெண்ணுடன் நடனம் ஆடுவது போன்ற காட்சி இடம்பெற்றிருந்தது. மேலும், "வெளிநாட்டு மத கலாசாரத்தின் உண்மை நிலை இதுதான்?!... மதம் மாறிய இந்துக்களே சிந்தியுங்கள்!!!! மனம் திரும்புங்கள்!!!" என்ற வாசகத்தையும் பதிவிட்டிருந்தார். இது குறித்து தி.மு.க ஐ.டி விக் கிழக்கு மாவட்டத் துணை அமைப்பாளர் ஆஸ்டின் பெனட் என்பவர் நாகர்கோவில் சைபர் க்ரைம் போலீஸில் புகார் அளித்திருந்தார்.

அந்தப் புகாரில், ``கிறிஸ்தவ பாதிரியார்களின் மாண்பை குலைக்கும் நோக்குடன், கிறிஸ்தவ மத உணர்வுகளை புண்படுத்தும் விதமாகவும், மதம் மாறிய இந்துக்களை அவமானப்படுத்தும் நோக்குடனும் அனைவரும் பார்க்கும் விதமாக வீடியோ பதிவேற்றம் செய்திருக்கிறார். கன்னியாகுமரி மாவட்டம் கடந்த சில ஆண்டுகளாக, மதரீதியாக பதற்றம் நிறைந்த பகுதியாக இருக்கிறது. மாவட்டத்தில் ஒற்றுமையாக வாழும் இந்துக்கள், கிருஸ்துவர்களிடையே பிரச்னையை ஏற்படுத்த வேண்டும் என்ற உள்நோக்கத்துடனும், இரு மதத்தினரிடையே பகைமையைத் தூண்டவேண்டும் என்ற உட்கருத்துடனும்... வேண்டும் என்றே அந்த வீடியோ மற்றும் கருத்துகளைப் பதிவிட்டிருக்கிறார். அவர்மீது சட்டப்படி நடவடிக்கை எடுக்க வேண்டும்" எனக் கூறியிருந்தார்.

இது குறித்து கடந்த மாதம் 29-ம் தேதி நாகர்கோவில் சைபர் க்ரைம் போலீஸார் வழக்கு பதிவுசெய்து, விசாரித்து வந்தனர். இந்த நிலையில், இன்று கனல் கண்ணனிடம் நேரடியாக விசாரணை நடத்த அவரை நாகர்கோவில் சைபர் க்ரைம் போலீஸார் அழைத்தனர். சுமார் 8 மணி நேரம் தொடர்ந்த விசாரணைக்குப் பிறகு கனல் கண்ணனை போலீஸார் கைதுசெய்தனர். விசரணைக்கு இடையே இந்து முன்னணி அமைப்பினர் சைபர் க்ரைம் போலீஸாரிடம் வாக்குவாதத்தில் ஈடுபட்டதால் பரபரப்பு ஏற்பட்டது.