கோயில் நிலங்களின் வருவாய், கோயிலுக்கு தரப்படுவதில்லை

சென்னை திரும்பிய பா.ஜ.கவின் தமிழக தலைவர் அண்ணாமலை, சிதம்பரம் கோயில் சர்ச்சை குறித்து விரிவான அறிக்கை வெளியிட்டிருந்தார். தமிழகம் முழுவதுமுள்ள கோயில்களுக்கு சொந்தமான பல ஏக்கர் நிலத்தை பராமரித்து வரும் தமிழக அரசு, அதற்குரிய வருவாயை கோயில்களில் செலுத்துவதில்லை என்கிற குற்றச்சாட்டை முன் வைத்திருந்தார்.

சிதம்பரம் கோயிலுக்கு செந்தமான 3500 ஏக்கர் நிலத்தை பராமரித்து வரும் தமிழக அரசு, கடந்த 15 ஆண்டுகளாக சம்பந்தப்பட்ட நிலங்களின் மூலமாக கிடைத்த வருவாயை கோயிலில் செலுத்த வேண்டும். குறைந்தபட்சம் கணக்கு பற்றிய விபரங்களையாவது கோயில் நிர்வாகத்திடம் சமர்ப்பிக்கவேண்டும் என்கிற நிலையில் இதுவரை அரசு தரப்பில் இருந்து விபரங்கள் சமர்ப்பிக்கப்பட்டதில்லை என்பது தெரிய வந்தது.

இதைத் தொடர்ந்து அறிக்கை வெளியிட்ட தமிழக பா.ஜ.க தலைவர் #அண்ணாமலை, சிதம்பரம் கோயிலுக்கு சொந்தமான நிலங்களிலிருந்து பெறப்பட்ட வருவாய் கணக்குகளை தெரிவிக்க வேண்டும் என்று கேட்டுக்கொண்டிருந்தார். சிதம்பரம் கோயில் மட்டுமல்ல இன்னும் பல கோயில்களின் வரவு செலவு கணக்குகள் கூட கோயில் நிர்வாகத்தில் சமர்ப்பிக்கப்பட்டதில்லை என்று பா.ஜ.க வட்டாரங்கள் தெரிவிக்கின்றன.

சமீபத்தில் வீரசோழபுரம் திருக்கோயில் தொடர்பாக சென்னை உயர்நீதிமன்றம் பிறப்பித்த உத்தரவை பா.ஜ.க வட்டாரங்கள் மேற்கொள் காட்டுகிறார்கள். நிலுவையில் உள்ள வாடகைத் தொகையான ரூபாய் 57 லட்சம் ரூபாயை தமிழக அரசு ஏன் செலுத்தவில்லை என்று விளக்கம் தருமாறு தமிழக அரசை சென்னை உயர்நீதிமன்றம் கேட்டிருக்கிறது.

வீரசோழபுரம் கோயில், கள்ளக்குறிச்சியிலிருந்து 9 கி.மீ தூரத்தில் மணிமுத்தாறு கரையோரம் அமைந்துள்ளது. அனுபாம்பிகை உடனான அர்த்தநாரீஸ்வரர் கோயில், 12வது நூற்றாண்டில் கட்டப்பட்டது. தற்போது முற்றிலும் சிதிலமடைந்துள்ள கோயில், இன்றும் வழிபாட்டில் உள்ளது. சோழர் காலத்தில் தானமாக தரப்பட்ட ஏராளமான நிலங்கள், கோயிலின் கட்டுப்பாட்டில் உள்ளன.

கள்ளக்குறிச்சி ஆட்சியர் அலுவலகம், கோயிலுக்கு சொந்தமான நிலத்தில் அமைக்கப்பட்டிருந்தாலும் தமிழக அரசு, கோயில் நிர்வாகத்திற்கு வாடகை பணம் எதுவும் கட்டுவதில்லை என்பது தெரிய வந்துள்ளது. கோயிலுக்கு சொந்தமான 35 ஏக்கர் சொந்தமான இடத்தில் ஆட்சியர் அலுவலகமும், காவல்துறை கண்காணிப்பாளர் அலுவலகம், மாவட்ட நீதிமன்றம் உள்ளிட்டவை கட்டப்பட்டுள்ளன.

இது குறித்து வழக்கு சென்னை உயர்நீதிமன்றத்தில் நிலுவையில் உள்ளது. மூன்று மாதங்களுக்கு முன்னர் வெளியான உத்தரவில் மாதந்தோறும் 1.6 லட்சம் ரூபாய் வாடகைத்தொகையாக கோயில் நிர்வாகத்திற்கு செலுத்தவேண்டும் என்று உத்தரவிட்டிருக்கிறது. இரண்டு மாதத்தில் பணத்தை செலுத்திவிடுவதாக தமிழக அரசு உறுதியளித்திருப்பதாக செய்திகள் வெளியாகின.

இந்நிலையில் கோயில் சிதலமைடைந்த நிலையில் இருப்பதால் புனருத்தருணம் செய்வதற்கான நடவடிக்கைகள் மேற்கொள்ளப்படவேண்டும். இது குறித்து அறநிலையத்துறை சார்பாகவும் எந்த நடவடிக்கையும் எடுக்கப்படவில்லை. கோயில் நிலங்களை அரசு அலுவலகங்கள் கட்டுவதற்காக கையகப்படுத்தும் அரசு. குறைந்தபட்சம் ஏன் கோயில்கள் பராமரிக்கக்கூடாது என்று பக்தர்கள் கேள்வி எழுப்புகிறார்கள். இதை முன்வைத்து பா.ஜ.க களமிறங்கும் என்று எதிர்பார்க்கப்படுகிறது.