சென்னை லுலு மால் ​சிக்கல்: தொடங்கவே இல்லை... அதுக்குள்ள எண்டு கார்டு போட்டுருவாங்க போல!

கோவையில் ஹைப்பர் மார்க்கெட் தொடங்கியது மூலம் தமிழ்நாட்டில் முதன்முறையாக லுலு நிறுவனம் கால்பதித்துள்ளது. அதன் தொடர்ச்சியாக, சென்னையில் லுலு மால் அமைக்கப்பட இருக்கிறது. இதற்கு வணிகர்கள் தரப்பில் கடும் எதிர்ப்புகள் கிளம்பியுள்ளன. முதற்கட்ட பணிகளே தொடங்கப்படாத சூழலில், சென்னை லுலு மால் திட்டம் கைவிடப்படுகிறதா என்ற கேள்வி எழுந்துள்ளது.


முதலமைச்சர் ஸ்டாலின் கடந்த ஆண்டில் ஐக்கிய அரசு அமீரகத்திற்கு சுற்றுப்பயணம் மேற்கொண்டபோது, லுலு நிறுவனத்திடம் 3,500 கோடி ரூபாய் ஒப்பந்தம் கையெழுத்தானது. பெங்களூரு, திருவனந்தபுரம் உள்ளிட்ட நகரங்களில் லுலு நிறுவனம் ஏற்கனவே தடம் பதித்த நிலையில், இந்த ஒப்பந்தம் மூலம் தமிழ்நாட்டிற்குள் கால் பதித்தது லுலு நிறுவனம்.

கோவை லுலு ஹைப்பர் மார்க்கெட்

முதலாவதாக, கோயம்புத்தூரில் லுலு ஹப்பர் மார்க்கெட் அமைப்பதற்கான பணிகள் கடந்த ஆண்டே தொடங்கப்பட்டன. கோவை லக்‌ஷ்மி மில்ஸ் வளாகத்தில் மிகவும் பிரம்மாண்டமாக 1.20 லட்சம் சதுரடியில் ஹைப்பர் மார்க்கெட் அமைக்கப்பட்டது. சென்னைக்கு அடுத்தபடியாக தொழில் நகரமாக கோவை பார்க்கப்படுகிறது.

கோவை மக்கள் வரவேற்பு

அந்த வகையில், விறுவிறுப்பாக ஹைப்பர் மார்க்கெட் அமைக்கும் பணிகள் நடைபெற்றன. எப்போது திறக்கப்படும் என கோவை மக்களும் லுலு ஹைப்பர் மார்கெட்டை எதிர்பார்த்து காத்திருந்தனர். அந்த வகையில், கடந்த 14ஆம் தேதி ஹைப்பர் மார்க்கெட் திறக்கப்பட்டது. அனைத்து பொருட்களும் ஒரே இடத்தில் பெறும் வகையில் ஹைப்பர் மார்க்கெட் அமைக்கப்பட்டிருந்தது. மேலும், திறப்பு விழா சலுகையாக பொருட்கள் மலிவு விலையில் விற்பனை செய்யப்பட்டதால் கோவை மக்களிடம் வரவேற்பை பெற்றது.

சென்னையில் லுலு மால்

கோவையை தொடர்ந்து சென்னையில் லுலு மால் அமைக்கப்பட உள்ளது. இதற்காக, நிலம் கையகப்படுத்தும் பணிகள் தொடங்கி நடைபெற்று வருகிறது. அந்த பணிகள் நிறைவுபெற்ற பின்னர், கட்டுமான பணிகள் விரைவில் தொடங்கும் என எதிர்பார்க்கப்படுகிறது. கோவையை வரவேற்பை பெற்றதை அடுத்து சென்னைவாசிகளுக்கு லுலு மாலுக்காக காத்திருக்கின்றனர்.

லுலு மாலுக்கு வணிகர்கள் எதிர்ப்பு

கோவையில் லுலு ஹைப்பர் மார்க்கெட் திறக்கப்பட்டபோதே வணிகர் சங்கங்களின் பேரமைப்பு தலைவர் விக்கிரம ராஜா எதிர்ப்பு தெரிவித்தார். லுலு நிறுவனத்தால் உள்ளூர் வணிகர்கள் பாதிக்கப்படுவதாக அவர் குற்றஞ்சாட்டிருந்தார். இந்த நிலையில், சென்னையில் லுலு மால் அமைப்பதற்கும் அவர் தனது எதிர்ப்பை பதிவு செய்துள்ளார்.

தொடங்கும் முன்னரே எண்டு கார்டு!

அதன்படி, சென்னையில் லுலு மால் திறக்க உள்ளதை அதன் உரிமையாளர் கைவிட வேண்டும் என விக்கிரமராஜா வலியுறுத்தியுள்ளார். இல்லையெனில் தமிழ்நாடு வணிகர் சங்கங்களின் பேரமைப்பு சார்பில் கடுமையான போராட்டத்தை கையில் எடுக்க வேண்டிய சூழல் உருவாகும் என்றும் அவர் எச்சரிக்கை விடுத்துள்ளார்.

கைவிடப்படுகிறதா சென்னை லுலு மால்?

கோவையில் லுலு ஹைப்பர் மார்க்கெட் தொடங்கப்பட்ட பின்னரே அதற்கான எதிர்ப்புகள் அதிகமாயின. ஆனால், சென்னையில் லுலு மால் தொடங்குவதற்கு முன்பே வணிகர்களிடம் இருந்து கடுமையாக எதிர்ப்புகள் கிளம்பியுள்ளதால் திட்டமிட்டபடி லுலு மால் சென்னையில் அமைக்கப்படுமா என்ற கேள்வி எழுந்துள்ளது.

நன்றி சமயம்