. இனி அமெரிக்காவிலும் களைக்கட்டும் தீபாவளி... பள்ளிகளுக்கு விடுமுறை அறிவித்த அரசு!

இந்தியர்களின் பாரம்பரிய பண்டிகைகளில் ஒன்றான தீபாவளிக்கு நியூயார்க்கில் பள்ளிகளுக்கு விடுமுறை அறிவித்துள்ளது அந்நாட்டு அரசு.

New York Diwali Holiday

தீபாவளி பண்டிகை ஒவ்வொரு ஆண்டும் தமிழ் மாதமான ஐப்பசி மாதத்தில் கொண்டாடப்படுகிறது. ஆங்கிர மாதங்களில் அக்டோபர் மற்றும் நவம்பர் மாதங்களில் தீபாவளி பண்டிகை கொண்டாடப்படுகிறது. தீபாவளி பண்டிகையை இந்துக்கள் மட்டுமின்றி சீக்கியர்கள், பவுத்தர்கள், சமணர்கள் என பலரும் ஒவ்வொரு காரணத்துடன் கொண்டாடி வருகின்றனர்.


தென்னிந்தியாவில் நரகாசுரனை, மகா விஷ்ணு வதம் செய்த நாளாக தீபாவளி பண்டிகை கொண்டாடப்படுகிறது. வட மாநிலங்களில் ராமர் வனவாசத்தை முடித்துவிட்டு ஊர் திரும்பிய நாளாக தீபாவளி பண்டிகை கொண்டாடப்படுகிறது. தீபாவளி பண்டிகை தீப ஒளி திருநாள் என்றும் அழைக்கப்படுகிறது.

தீபாவளி பண்டிகை நாளில் இந்துக்கள் வீட்டில் தீபம் ஏற்றியும், புத்தாடை அணிந்தும் இனிப்புகளை பரிமாறியும் பட்டாசு வெடித்தும் கொண்டாடி வருகின்றனர். உலகம் முழுவதும் உள்ள இந்துக்கள் தங்கள் வசிக்கும் இடங்களில் தீபாவளி பண்டிகையை கொண்டாடி வருகின்றனர். இந்நிலையில் தீபாவளி பண்டிகையை முன்னிட்டு நியூயார்க்கில் பள்ளிகளுக்கு விடுமுறை அறிவிக்கப்பட்டுள்ளது.

நியூயார்க்கில் 2 லட்சத்திற்கும் அதிகமான மக்கள் தீபாவளி பண்டிகையை கொண்டாடி வரும் நிலையில் நியூயார்க் நகர நிர்வாகம் பொது பள்ளி விடுமுறை பட்டியலில் தீபாவளி பண்டிகையை இணைத்துள்ளது. நியூயார்க் நகரில் தெற்காசிய மற்றும் இந்தோ-கரீபியன் சமூகங்களின் வளர்ச்சியை அங்கீகரிக்கும் வகையில், தீபாவளி பண்டிகை பொது பள்ளி விடுமுறையில் சேர்க்கப்படுவதாக அந்நகர மேயர் எரிக் ஆடம்ஸ் நேற்று அறிவித்தார்.

மேலும் இது தொடர்ச்சியாக மாறிவரும், உலகம் முழுவதிலுமிருந்து வரும் சமூகங்களை தொடர்ந்து வரவேற்கும் நகரம் என்றும் மேயர் எரிக் ஆடம்ஸ் தெரிவித்தார். இந்த மாத தொடக்கத்தில் நியூயார்க் மாநில சட்டமன்றத்தில் தீபாவளியை நியூயார்க் நகரில் பொதுப் பள்ளி விடுமுறையாக மாற்றும் மசோதா நிறைவேற்றப்பட்டது.

இந்த மசோதாவில் நியூயார்க் ஆளுநர் கேத்தி ஹோச்சுல் கையெழுத்திட்டால் புதிய விடுமுறை அதிகாரப்பூர்வமாக மாறும் என்பது குறிப்பிட்டது. நியூயார்க் நகரில் தீபாவளி பண்டிகையை முன்னிட்டு பள்ளிகளுக்கு அரசு விடுமுறை அறிவிக்கப்பட்டுள்ளது, அங்குள்ள இந்தியர்களிடையே பெரும் மகிழ்ச்சியை ஏற்படுத்தியுள்ளது.

நன்றி சமயம்

மலேசியாவில் தற்பொழுது ஒருநாள் பொது விடுமுறை தீபாவளிக்கு வழங்கபப்டுகிறது. அதை இரண்டு நாட்கள் விடுமுறையாக அறிவிக்க வேண்டும் என்று மலேசிய வாழ் இந்தியர்கள் கோரிக்கை வைத்துள்ளார்கள். விரைவில் இது சாத்தியமாகும்.