திரைப்படத்தில் நடிப்பது மட்டுமே ஒரு நாட்டை, ஒரு இனத்தை வழிநடத்த தகுதி எனக் கருதுவது அவமானம்

திரைப்படத்தில் நடிப்பது மட்டுமே ஒரு நாட்டை, ஒரு இனத்தை வழிநடத்த தகுதி எனக் கருதுவது அவமானம்: சீமான் கருத்து

தூத்துக்குடி: திரைப்படத்தில் நடிப்பது மட்டுமே ஒரு நாட்டை, ஒரு இனத்தை வழிநடத்த தகுதி எனக் கருதுவது அவமானம் என நாம் தமிழர் கட்சி ஒருங்கிணைப்பாளர் சீமான் தெரிவித்தார். தூத்துக்குடி மாவட்டம் எட்டயபுரத்தில் நடைபெற்ற நாம் தமிழர் கட்சி நிர்வாகிகள் ஆலோசனைக் கூட்டத்தில் அக்கட்சி தலைமை ஒருங்கிணைப்பாளர் சீமான் கலந்துகொண்டார். பின்னர் செய்தியாளர்களை சந்தித்து பேசிய அவர்; நடிகர் சூர்யா அகரம் பவுண்டேஷன் மூலம் பல ஆண்டுகளாக மறைமுகமாக உதவிகளை செய்து வருகிறார். ஆனால், நடிகர் விஜய் அரசியல் கட்சி ஆரம்பித்து, அரசியலுக்கு வர விரும்புவதால் உதவிகளை வெளிப்படையாக செய்து வருகிறார்.

படிக்கும் மாணவர்களை ஊக்கப்படுத்துவதை வரவேற்கலாம், பாராட்டலாம். வாக்கு செலுத்துவதற்கு பணம் கொடுக்கவும், வாங்கவும் கூடாது என்ற எனது கருத்துக்கு வலுசேர்க்கும் வகையில் விஜய் பேசியுள்ளார். அது வரவேற்க வேண்டிய விஷயம். நடிகர் விஜய் அரசியலுக்கு வருவதை வாழ்த்துவோம். அவர் அரசியலுக்கு வந்து மக்களுக்கு நல்லது செய்ய வேண்டும் என்று நினைக்கிறார். நல்லது செய்வதை தட்டிக் கொடுக்கலாம். தள்ளி விடக்கூடாது. இன்றைக்கு உள்ள அரசியல் தலைவர்களில் மூத்த தலைவர் நல்லகண்ணு சிறந்தவர். அவரை ஒரு வார்டு கவுன்சிலராக கூட நம்மால் ஆக்க முடியவில்லை என்பது தலைகுனிவு.

திரைப்படத்தில் நடிப்பது மட்டுமே ஒரு நாட்டை ஆள்வதற்கும், ஒரு இனத்தை வழி நடத்துவதற்கும் தகுதி என நினைப்பது அவமானகரமானது. இது மாறாது, எல்லோரும் சேர்ந்து தான் மாற்ற வேண்டும் தமிழ்நாட்டில் திரைக்கவர்ச்சி அதிகம் இருப்பது பேராபத்து. விஜய் கட்சி தொடங்கினால் இணைந்து செயல்பட வாய்ப்பில்லை என கூறினார். தொடர்ந்து பேசிய அவர்; ணிப்பூர் கலவரம் திட்டமிட்டு உருவாக்கப்பட்டது. மணிப்பூர் போல தமிழகத்தில் கலவரத்தை உருவாக்க பாஜக முயற்சிக்கிறது என்றும் குற்றம் சாட்டினார்.