ஜூனியர் ஆசிய கோப்பை ஹாக்கி தொடரில் இந்திய பெண்கள் அணி முதன்முறையாக சாம்பியன் பட்டத்தை கைப்பற்றியது

ஜூனியர் ஆசிய கோப்பை ஹாக்கி தொடரில் இந்திய பெண்கள் அணி முதன்முறையாக சாம்பியன் பட்டத்தை கைப்பற்றியது. பைனலில் 2–1 என தென் கொரியாவை வென்றது.

ஜப்பானில், ஜூனியர் பெண்களுக்கான ஆசிய கோப்பை ஹாக்கி 8வது சீசன் நடந்தது. இதன் பைனலில் இந்தியா, தென் கொரியா அணிகள் மோதின. ஆட்டத்தின் 21வது நிமிடத்தில் கிடைத்த ‘பெனால்டி ஸ்டிரோக்’ வாய்ப்பில் இந்தியாவின் அன்னு முதல் கோல் அடித்தார். இதற்கு, 24வது நிமிடத்தில் தென் கொரியாவின் பார்க் சியோயோன் ஒரு ‘பீல்டு’ கோல் அடித்து பதிலடி கொடுத்தார். முதல் பாதி முடிவு 1–1 என சமநிலையில் இருந்தது.

இரண்டாவது பாதியில் எழுச்சி கண்ட இந்திய அணிக்கு 40வது நிமிடத்தில் கிடைத்த ‘பெனால்டி கார்னர்’ வாய்ப்பில் நீலம் ஒரு கோல் அடித்து கைகொடுத்தார். கடைசி நிமிடம் வரை போராடிய தென் கொரிய வீராங்கனைகளால் கூடுதலாக கோல் அடிக்க முடியவில்லை.

ஆட்டநேர முடிவில் இந்திய அணி 2–1 என்ற கணக்கில் வெற்றி பெற்று, முதன்முறையாக ஆசிய சாம்பியன் பட்டத்தை தட்டிச் சென்றது. இதற்கு முன், 2012ல் தாய்லாந்தில் நடந்த தொடரின் பைனலில் சீனாவிடம் கோப்பையை பறிகொடுத்தது. இத்தொடரில் தென் கொரியா 4 (1992, 1996, 2000, 2008), சீனா 3 முறை (2004, 2012, 2015) கோப்பை வென்றுள்ளன.

ஜப்பான் வெண்கலம்

மூன்றாவது இடத்துக்கான போட்டியில் ஜப்பான், சீனா அணிகள் மோதின. அபாரமாக ஆடிய ஜப்பான் அணி 2–1 என்ற கணக்கில் வெற்றி பெற்று வெண்கலம் வென்றது. இதன்மூலம் சிலியின் சாண்டியாகோவில் நடக்கவுள்ள ஜூனியர் பெண்கள் உலக கோப்பை தொடருக்கு (நவ. 29 முதல் டிச. 10) நேரடியாக தகுதி பெற்றது. ஏற்கனவே இந்தியா, தென் கொரியா அணிகள் தகுதி பெற்றிருந்தன.

228 கோல்கள்

ஆசிய கோப்பையில் இம்முறை மொத்தம் 228 கோல்கள் பதிவாகின. இதில் அதிகபட்சமாக இந்தியாவின் அன்னு 9 கோல் அடித்தார். இந்தியா சார்பில் தீபிகா (7), மும்தாஜ் கான் (6), சுனேலிதா (5), தீபிகா சோரெங் (4), நீலம் (3), வைஷ்ணவி (3) கோல் அடித்து கைகொடுத்தனர்.

வாழ்த்துகள்