காதில் பூ சுற்றும் வேலை; ஸ்டாலினின் சிங்கப்பூர், ஜப்பான் சுற்றுலா ஃபெயிலியர்

``தமிழகத்தில் முதலீடு செய்யத் தயாராக இருந்த நிறுவனங்களை, வேறு மாநிலங்களுக்கு அனுப்பி தாரை வார்த்துவிட்டு, துபாய், சிங்கப்பூர், ஜப்பான் ஆகிய வெளிநாடுகளுக்குச் சுற்றுலா செல்கிறார்.'' - எடப்பாடி பழனிசாமி

தமிழ்நாடு முதல்வர் ஸ்டாலின் கடந்த சில தினங்களுக்கு முன்பு ஒன்பது நாள் பயணமாக ஜப்பான், சிங்கப்பூர் ஆகிய வெளிநாடுகளுக்குச் சென்றுவந்தார். 2024-ம் ஆண்டு நடைபெறவிருக்கும் உலக முதலீட்டாளர்கள் மாநாட்டுக்கு முதலீட்டாளர்களுக்கு அழைப்பு விடுக்கும் விதமாக இந்தப் பயணம் அமைந்தது எனத் தெரிவித்தார். இந்த நிலையில், வாய்ச் சவடால் விடியா தி.மு.க அரசின் முதலமைச்சருடைய சிங்கப்பூர், ஜப்பான் சுற்றுலா தோல்வியடைந்துவிட்டதாக எதிர்க்கட்சித்தலைவர் எடப்பாடி பழனிசாமி கடுமையாகச் சாடியிருக்கிறார்.

இது குறித்து அவர் வெளியிட்டிருக்கும் அறிக்கையில், "கள்ளச்சாராயம், விஷச்சாராய மரணங்கள், கனிம வளக் கடத்தலைத் தடுக்கும் அதிகாரிகள் கொல்லப்படுதல் போன்ற சட்டம்-ஒழுங்குப் பிரச்னைகளிலிருந்து தப்பிக்க முதலமைச்சர் ஸ்டாலின், சிங்கப்பூர், ஜப்பான் நாடுகளுக்குக் குடும்பத்துடன் சுற்றுலா சென்று வந்தார். இந்த நிலையில், இந்தச் சுற்றுலாவின் மூலம் 3,233 கோடி முதலீட்டை ஈர்த்ததாக சென்னை விமான நிலையத்தில் பேட்டியளித்து புலகாங்கிதம் அடைந்திருக்கிறார்.

பத்திரிகைகளில், `ஒன்பது நாள்கள் சிங்கப்பூர்-ஜப்பான் பயணத்தில், முதலில் 1,258 கோடி முதலீடுகள் ஈர்க்கப்பட்டிருக்கின்றன' என்று செய்திகள் வந்தன. பின்னர் 3,233 கோடி என்று வந்தது. மேலும் இதில், மிட்சுபிஷி நிறுவனத்துடன் 1,891 கோடி ரூபாய்க்கு சென்னையிலேயே ஒப்பந்தம் கையெழுத்தானது என்றும் கூறியிருக்கிறார். அப்போது, உண்மையில் வெளிநாடுகளுக்குச் சென்று திரட்டிய முதலீடு 1,342 கோடிதான். இதில் எது உண்மை... எதை நம்புவது?

விடியா அரசின் முதலமைச்சருடைய பேட்டியைப் பார்க்கும்போது, 'கேப்பையில் நெய் வடிகிறதென்றால், கேட்பாருக்கு புத்தி எங்கே போயிற்று' என்ற பழமொழிதான் நினைவுக்கு வருகிறது. முதலமைச்சர் ஸ்டாலின் புரிந்துணர்வு மேற்கொண்ட கொமாட்சு நிறுவனம் 2005-G0GILI முன்னாள் முதல்வர் ஜெயலலிதா அவர்களால் தமிழ்நாட்டுக்கு கொண்டுவரப்பட்டது. ஓம்ரான் நிறுவனம் ஏற்கெனவே உத்தரப்பிரதேசத்தில் இயங்கிவருகிறது. அவர்களின் இந்திய CEO-க்களை அழைத்து, அவர்களிடமே இந்த முதலீடுகளைச் சுலபமாகப் பெற்றிருக்கலாம். அதைச் செய்யாமல் முதலமைச்சர் சிங்கப்பூர்-ஜப்பான் வரை சென்றதைத்தான் தோல்வி என்கிறோம்.

காருக்குத் தேவையான செமி கண்டக்டரை உற்பத்தி செய்யும் ஃபாக்ஸ்கான் கூட்டு நிறுவனம் சுமார் 1.54 லட்சம் கோடி முதலீட்டில் தமிழகத்தில் தொழிற்சாலை ஒன்றை தொடங்கவிருந்த நிலையில், அந்த நிறுவனம் கோரிய நிலம் மற்றும் மானியம் வழங்க, இந்த விடியா தி.மு.க அரசு மறுத்ததன் காரணமாக, 25,000 பேருக்கு வேலைவாய்ப்பு அளிக்கக்கூடிய இந்தத் தொழிற்சாலை தற்போது குஜராத்துக்குச் சென்றுவிட்டது.

அதே ஃபாக்ஸ்கான் நிறுவனம் சுமார் 4,000 கோடி முதலீட்டில் 20,000 பேருக்கு வேலைவாய்ப்பு வழங்கும் வகையில் தொடங்கப்படவிருந்த ஆப்பிள் ஐ போன் தொழிற்சாலை விடியா தி.மு.க ஆட்சியின் பாராமுகத்தினால் கர்நாடகாவுக்குச் சென்றுவிட்டது. நமது மாநிலத்தில் பெரு முதலீடுகளைச் செய்திருக்கின்ற ஃபாக்ஸ்கான் நிறுவனத்தின் CEO வந்தபோதுகூட விடியா அரசின் முதலமைச்சர், அவர்களைச் சந்திக்காததன் விளைவாக, கிட்டத்தட்ட ஒரு லட்சம் இளைஞர்களுக்கான வேலைவாய்ப்பு மற்றும் முதலீடுகள் கர்நாடகாவுக்கும், தெலங்கானாவுக்கும் தாரைவார்க்கப்பட்டிருக்கிறது.

இவ்வாறு தமிழகத்துக்கு வரும் முதலீடுகளை இழந்தால், 2030-ல் தமிழ்நாட்டின் பொருளாதாரத்தை ஒரு ட்ரில்லியன் அளவுக்கு உயர்த்துவோம் என்று கூறியது வெறும் வாய்ச்சவடால்தானே. தமிழகத்தில் முதலீடு செய்யத் தயாராக இருந்த நிறுவனங்களை, வேறு மாநிலங்களுக்கு அனுப்பி தாரைவார்த்துவிட்டு, துபாய், சிங்கப்பூர், ஜப்பான் ஆகிய வெளிநாடுகளுக்குச் சுற்றுலா சென்று 6,000 கோடி மற்றும் 3,000 கோடி என்று சுமார் 9,000 கோடி ரூபாய் முதலீட்டை ஈர்த்ததற்கு, தன் முதுகைத் தானே தட்டிக்கொள்ளும் `திராவிட மாடல்' முதலமைச்சரின் வாய்ச் சவடால் திறமையை தமிழக மக்கள், குறிப்பாக இளைஞர்கள் நன்கு அறிந்திருக்கின்றனர்.

'கூரை ஏறி கோழி பிடிக்க முடியாதவர், வானம் ஏறி வைகுண்டம் போனாராம்’ என்பதுபோல், தமிழ்நாட்டில் தற்போது இயங்கும் பல நிறுவனங்களே தங்கள் முதலீடுகளை வேறு மாநிலங்களில் செய்துவருகின்றன. எனவேதான், இது முதலீட்டை ஈர்க்கும் பயணம் அல்ல, முதலீடு செய்யச் சென்ற சுற்றுலா என்ற சந்தேகம் வலுக்கிறது. தமிழக மக்களிடம் பொய்யான வாக்குறுதிகளை அளித்து, ஏமாற்றி ஆட்சிக்கு வந்த உடனேயே தன்னுடைய மனைவி, மகன், மருமகன் உள்ளிட்ட அனைத்துக் குடும்ப உறுப்பினர்கள், ஆடிட்டரோடு துபாய்க்குக் குடும்பப் பயணம் மேற்கொண்டார் விடியா அரசின் முதலமைச்சர் ஸ்டாலின்.

அங்கிருந்து திரும்பியதும் 6,000 கோடிக்கு முதலீடுகளை ஈர்த்ததாக வெற்று அறிக்கை ஒன்றை வெளியிட்டார். 'லூலூ மால்' உட்பட பல தனியார் நிறுவனங்கள் தொழில் தொடங்கி, பல ஆயிரம் பேருக்கு வேலைவாய்ப்பு கிடைக்கும் என்று மனம் போன போக்கில் அவிழ்த்துவிட்டார். துபாய் பயணம் முடிந்து பல மாதங்கள் ஆன பின்பும், சிறு முன்னேற்றம்கூட இல்லையே என்று நான் அறிக்கை வெளியிட்டதும், முன்னெடுப்புகள் நடந்து வருவதாக தொழில்துறை அமைச்சர் பெயரில் பசப்பு வார்த்தைகளால் அறிக்கை விடுகிறார்.

`தமிழகத்தைத் தலை நிமிரச் செய்வோம்' என்று கூறி ஆட்சியைப் பிடித்த விடியா அரசு, தாங்கள் அடிக்கும் பகல் கொள்ளையையும், தவறுகளையும் மறைக்க இதுபோல் முதலீட்டை ஈர்க்க வெளிநாடுகளுக்குப் பயணம் என்று தமிழ்நாட்டு மக்களின் காதில் பூ சுற்றும் வேலையை இத்துடன் நிறுத்திவிட்டு, அ.தி.மு.க ஆட்சியில் ஏற்கெனவே போடப்பட்ட முதலீட்டு ஒப்பந்தங்களையும், இங்கே ஏற்கெனவே தொழில் செய்துவரும் நிறுவனங்களையும், மற்ற மாநிலங்களுக்குச் செல்லவிடாமல் அவர்களது கோரிக்கைகளை நிறைவேற்றி, தொடர்ந்து அவர்கள் தமிழகத்திலேயே தொழில் தொடங்க வைக்குமாறு, திராவிட மாடல் என்று கூறிக்கொள்ளும் விடியா தி.மு.க அரசின் முதலமைச்சரையும், புதிதாகப் பொறுப்பேற்றிருக்கும் தொழில்துறை அமைச்சரையும் வலியுறுத்துகிறேன்" எனக் குறிப்பிட்டிருக்கிறார்.

விஜயங்கள் யாவும் முதலீடு சம்பந்தப்பட்டவையே !!!!!