‘உஷார்! இந்தியாவில் தயாராகும் தரமற்ற மருந்துகள்’

தேசம்
‘உஷார்! இந்தியாவில் தயாராகும் தரமற்ற மருந்துகள்’
மத்திய மருந்து தரக்கட்டுப்பாட்டு வாரியம் எச்சரிக்கை!
மருந்து மாத்திரைகள்

ஆய்வின் அடிப்படையில் அடையாளம் காணப்பட்டிருக்கும், இந்தியாவில் தயாரகும் தரமற்ற மருந்துகள் குறித்து, மத்திய மருந்து தரக்கட்டுப்பாட்டு வாரியம் எச்சரிக்கை விடுத்துள்ளது.

அண்மைக்காலமாக இந்தியாவில் தயாரிக்கப்படும் மருந்துகளின் தரம் குறித்த சர்ச்சைகள் எழுந்து வருகின்றன. இருமல் உள்ளிட்ட குழந்தைகளுக்கான மருந்துகளை உண்டதில் ஆப்பிரிக்க நாடுகளில் உயிரிழிப்புகளும், கண் மருந்துகளை உபயோகித்ததில் அமெரிக்காவில் பார்வை இழப்பு ஏற்பட்டதுமாக, சர்வதேச அளவில் இந்திய மருந்துகளுக்கு எதிர்ப்பு எழுந்து வருகிறது.

இதனையடுத்து இந்தியாவில் தயாரிக்கப்படும் மருந்துகளின் தரம் தொடர்பான கட்டுப்பாடுகளை மத்திய அரசு அதிகரித்தது. மேலும், இந்தியாவில் பயன்பாட்டிலுள்ள மருந்துகளின் தரத்தை ஆராயும் பணிகளும் முடுக்கிவிடப்பட்டன. அந்த வகையில் கடந்த ஒரு மாதத்தில் மட்டும் சுமார் 1,500 மருந்துகள் மற்றும் மாத்திரைகளை, மத்திய மருந்து தரக்கட்டுப்பாட்டு வாரியம் ஆய்வுக்கு உட்படுத்தியது. ரத்த அழுத்தம், காய்ச்சல் மற்றும் பலவிதமான சத்து மாத்திரைகள் இவ்வகையில் ஆய்வுக்கு எடுத்துக்கொள்ளப்பட்டன.

இந்த ஆய்வின் முடிவில் இந்தியாவில் தயாரிக்கப்பட்டு இந்தியர்கள் மத்தியில் விற்பனை செய்யப்படும் மருந்து - மாத்திரைகளில் 48 ரகங்கள் தரமற்றவை என மருந்து தரக்கட்டுப்பாட்டு வாரியம் கண்டறிந்துள்ளது. இதனையடுத்து தனது ஆய்வினை விரிவுபடுத்த திட்டமிட்டுள்ள மருந்து தரக்கட்டுப்பாட்டு வாரியம், தொடர்புடைய நிறுவனங்கள் மீது நடவடிக்கை எடுப்பதோடு, அந்த தரமற்ற மருந்துகளை தனது அதிகாரபூர்வ இணையதளத்தில் அவ்வபோது அப்டேட் செய்தும் வருகிறது. https://cdsco.gov.in/opencms/opencms/en/Home/ என்ற பக்கத்தில் அவற்றின் பட்டியலை அறிந்து கொள்ளலாம்

நன்றி காமதேனு

குஜராத் நிறுவனம் வழங்கிய கண் சொட்டு மருந்துகளால், 30க்கும் மேற்பட்டோருக்கு கண் தொற்று ஏற்பட்டுள்ளதாக இந்திய அரசிடம், இலங்கை அரசு புகார் தெரிவித்துள்ளது.

குஜராத்தை சேர்ந்த இந்தியானா ஆப்தால்மிக்ஸ் என்ற நிறுவனம் வழங்கிய கண் சொட்டு மருந்துகளால், 30க்கும் மேற்பட்டோருக்கு கண் தொற்று ஏற்பட்டுள்ளதாக இந்திய அரசிடம், இலங்கை அரசு புகார் தெரிவித்துள்ளது.

இதுதொடர்பாக இந்தியானா ஆப்தால்மிக்ஸ் நிறுவனத்திற்கு, பார்மெக்சில் - வர்த்தகம் மற்றும் தொழில்துறை அமைச்சகம் சார்பில் நோட்டீஸ் அனுப்பப்பட்டது. இந்திய மருந்து ஏற்றுமதியில் சர்வதேச ஏஜென்சிகளின் நம்பிக்கையை பாதிக்க வாய்ப்புள்ளதாக பார்மெக்சில் இயக்குனர் தெரிவித்துள்ளார்.

இதைத்தொடர்ந்து, குஜராத் நிறுவனம் தயாரித்த கண் சொட்டு மருந்துகளின் தரம் குறித்து மத்திய மருந்துகள் தரநிலைக் கட்டுப்பாட்டு அமைப்பு விசாரணையை தொடங்கியுள்ளது.

முன்னெச்சரிக்கை நடவடிக்கையாக, கண் சொட்டு மருந்து தயாரிப்பை நிறுத்துமாறு அந்த நிறுவனத்திடம் கேட்டுக் கொள்ளப்பட்டுள்ளதாக, சுகாதார அமைச்சக வட்டாரங்கள் தெரிவித்துள்ளன.