மீண்டும் தலைதூக்கும் மின்வெட்டு... சுதாரிக்குமா தி.மு.க அரசு?

பெருநகரங்களில் புதைவடக் கம்பிகளின் தன்மையே பல ஆண்டுகள் நீடிப்பது போன்றுதான் அமைக்கப்பட்டிருக்கிறது. அதனால் தற்போதுவரை எந்த பாதிப்பும் இல்லை.

தமிழ்நாட்டில் கோடையின் தாக்கத்தோடு மின்வெட்டுப் பிரச்னையும் தலைதூக்கத் தொடங்கியிருக்கிறது. விருதுநகர், ராமநாதபுரம், புதுக்கோட்டை, கோவை, குமரி மாவட்டங்களில் தினமும் 30 நிமிடங்களும், சேலம், தூத்துக்குடி, விருதுநகர், வேலூர் ஊரகப் பகுதிகளில் நள்ளிரவில் 30 நிமிடங்கள் முதல் 4 மணி நேரம் வரையும் அறிவிக்கப்படாத மின்வெட்டு இருப்பதாக மக்கள் புலம்புகின்றனர். சென்னை, திருச்சி, திண்டுக்கல், திருப்பூர், ஈரோடு, தூத்துக்குடி, மதுரை, தென்காசி ஆகிய பகுதிகளில் அவ்வப்போது 5 நிமிடங்கள் முதல் 30 நிமிடங்கள் வரை மின்வெட்டு இருக்கிறது. புதுக்கோட்டை, சேலம் மற்றும் டெல்டா பகுதிகளில் விவசாயத்துக்குப் பயன்படுத்தப்படும் மும்முனை மின்சாரம் பல மணி நேரம் நிறுத்தப்படுகிறது.

இது குறித்து நம்மிடம் பேசிய தமிழ்நாட்டின் மின்வாரியத் தொழிலாளர் பொறியாளர் ஐக்கிய சங்கத்தின் பொதுச்செயலாளர் மு.சுப்பிரமணி, “தமிழகத்தின் முக்கிய நகரங்கள், குறிப்பாக சென்னையிலுள்ள புதைவட மின்சார வயர்கள் 40-50 ஆண்டுகளுக்கு முன்பு போடப்பட்டவை. அதிக மின் பயன்பாட்டால், மின் அழுத்தம் ஏற்படும்போது புதைவடங்களில் ஆங்காங்கே வெடித்து மின்தடை ஏற்படுகிறது. இதைத் தடுக்க உயர்தர ‘ஆர்.என்.யூ யூனிட் கேபிள்கள்’ மாற்றப்பட்டும் மீண்டும் பிரச்னை ஏற்படுகிறது. தற்காலிகமாக ஒட்டுப்போட்டுச் சரிசெய்தாலும், இதற்கு நிரந்தரத் தீர்வு காணப்படவில்லை. அதற்கு ஆட்கள் பற்றாக்குறையும் முக்கியக் காரணம்” என்றார்.

ஓய்வுபெற்ற மின்வாரியப் பொறியாளர் நீலகண்டனோ, “வெயில் காலங்களில் கூடுதல் மின் தேவை இருக்கும் என்பது அறிந்ததுதான். ஆனால், எங்கு தேவை இருக்கிறதோ, அங்கு மின் நிலையங்களை அமைக்காமல், தேவையில்லாத இடங்களில் அமைத்திருக்கின்றனர். சென்னை போன்ற பெருநகரங்களில் இடப்பற்றாக்குறையால் மின் நிலையங்கள் அமைப்பதிலும் சிக்கல் இருக்கிறது. ஆனால், அதற்கான திட்டமிடலை அரசுதான் செய்ய வேண்டும். கிராமங்களில் கடந்த ஓராண்டில் ஒரு லட்சம் மின் இணைப்புகள் கொடுத்ததாகச் சொல்கிறார்கள். அதற்கான கட்டமைப்பை உருவாக்கவில்லை. வெறும் இணைப்புகளை மட்டும் கொடுத்து என்ன பயன்... தற்போது மின்வெட்டால் அதிகம் பாதிக்கப்படுவது விவசாயிகள்தான்” என்றார்.

இது தொடர்பாக மின்சாரத்துறைச் செயலாளர் ராஜேஷ் லக்கானியிடம் விளக்கம் கேட்டோம். அவர், “பெருநகரங்களில் புதைவடக் கம்பிகளின் தன்மையே பல ஆண்டுகள் நீடிப்பது போன்றுதான் அமைக்கப்பட்டிருக்கிறது. அதனால் தற்போதுவரை எந்த பாதிப்பும் இல்லை. அதேவேளையில் தமிழகத்தில் ஒரு லட்சம் பில்லர் பாக்ஸுகள் இருக்கின்றன. அவற்றில் தினசரி 20-30 பாக்ஸுகளில் பழுது ஏற்படுகிறது. அதைப் பணியாளர்களைக்கொண்டு உடனுக்குடன் சரிசெய்துவிடுகிறோம். மின்துறையில் பணியாளர்கள் பற்றாக்குறை இருப்பது உண்மைதான். அதையும் சரிசெய்ய முயற்சிகள் எடுக்கப்பட்டுவருகின்றன. பலரும் இதை, `மின்வெட்டு’ எனக் கூறுகின்றனர். ஆனால், தமிழகத்தில் உற்பத்தியாகும் மின்சாரத்தை வெளிச் சந்தையில் லாபத்துக்கு விற்றுவருகிறோம். எனவே, மின்வெட்டு தமிழகத்தில் இல்லை. சிறு சிறு பிரச்னைகளால் `மின்தடை’ ஏற்படுகிறது. அதையும் விரைந்து சரிசெய்கிறோம். டெல்டா பகுதியில் லோ வோல்டேஜ் பிரச்னை இருக்கிறது. அதைச் சரிசெய்ய இரண்டு துணை மின்நிலையங்கள் அமைக்கும் பணிகள் முடியும் தறுவாயில் இருக்கின்றன. இனி அது போன்ற பிரச்னைகள் எழாது” என்றார்.