தமிழ்நாட்டில் மூன்று அரசு மருத்துவக் கல்லூரிகள் அங்கீகாரம் ரத்து

சிசிடிவி கேமரா இல்லை, பயோமெட்ரிக் வருகைப் பதிவேட்டில் குறைபாடு எனச் சிறு சிறு குறைபாடுகளைச் சுட்டிக்காட்டியிருக்கிறது. அவை அனைத்தையும் விரைவில் சரிசெய்துவிடுவோம்.

தமிழ்நாட்டின் மிகப் பழைமையான ஸ்டான்லி மருத்துவக் கல்லூரி உட்பட மூன்று அரசு மருத்துவக் கல்லூரிகளின் அங்கீகாரத்தைத் திரும்பப் பெறுவதாக இளங்கலை மருத்துவக் கல்வி வாரியம் கடிதம் எழுதியிருப்பது மாணவர்கள் மத்தியில் குழப்பத்தை ஏற்படுத்தியிருக்கிறது.

தமிழ்நாட்டில் மொத்தம் 38 அரசு மருத்துவக் கல்லூரி மருத்துவமனைகள் செயல்பட்டுவருகின்றன. அவற்றில் 5,225 எம்.பி.பி.எஸ் மருத்துவப் படிப்புக்கான இடங்கள் இருக்கின்றன. இந்தச் சூழலில் அரசு ஸ்டான்லி மருத்துவக் கல்லூரி, திருச்சி அரசு கி.ஆ.பெ.விசுவநாதம் மருத்துவக் கல்லூரி, தருமபுரி அரசு மருத்துவக் கல்லூரி ஆகிய மூன்று மருத்துவக் கல்லூரிகளிலும், சிசிடிவி பொருத்துதல், பயோமெட்ரிக் வருகைப் பதிவேடு பராமரிப்பு ஆகியவற்றில் குறைபாடுகள் இருப்பதாகக் கூறி, இந்தக் கல்லூரிகளின் அங்கீகாரத்தை ரத்து செய்வதாகக் கடிதம் அனுப்பியிருக்கிறது இளங்கலை மருத்துவக் கல்வி வாரியம். மேலும், புதுச்சேரி அரசு மருத்துவக் கல்லூரியின் அங்கீகாரமும் ரத்துசெய்யப்படும் என்றும் கடிதம் அனுப்பப்பட்டிருக்கிறது.

உள்கட்டமைப்புக் குறைபாடுகளைக் காரணம் காட்டி, மருத்துவக் கல்லூரியின் அங்கீகாரத்தை ரத்துசெய்வதால் குறிப்பிட்ட மருத்துவக் கல்லூரிகளில் பயிலும், புதிதாகச் சேரவிருக்கும் ஆயிரக்கணக்கான மாணவர்களும், பொதுமக்களும், நோயாளிகளும் பாதிக்கப்படுவார்கள் எனப் பல்வேறு அரசியல் கட்சித் தலைவர்களும், மருத்துவ ஆர்வலர்களும் கண்டனம் தெரிவித்துவருகிறார்கள்.

இந்த நிலையில், வாரியத்தின் கடிதம் தொடர்பாகத் தமிழ்நாடு மருத்துவத்துறை சார்பில் என்னென்ன நடவடிக்கைகள் எடுக்கப்பட்டிருக்கின்றன என்று மருத்துவத்துறை அமைச்சர் மா.சுப்பிரமணியனிடம் கேள்வி எழுப்பினோம். அவர், “சிசிடிவி கேமரா இல்லை, பயோமெட்ரிக் வருகைப் பதிவேட்டில் குறைபாடு எனச் சிறு சிறு குறைபாடுகளைச் சுட்டிக்காட்டியிருக்கிறது. அவை அனைத்தையும் விரைவில் சரிசெய்துவிடுவோம். இந்தக் காரணங்களுக்காக மருத்துவக் கல்லூரி, மருத்துவமனைகளின் அங்கீகாரம் ரத்து என்பது ஏற்புடையதாக இல்லை. நாடாளுமன்றத் தேர்தலை மனதில்வைத்து இது போன்ற வேலைகள் நடக்கின்றன. அரசியல் ஆதாயத்துக்காக, தமிழ்நாட்டின் மருத்துவக் கட்டமைப்பைக் குறைசொல்லும் விதமாக இது போன்ற செயல்களில் ஈடுபடுவது கண்டிக்கத்தக்கது. முதல்வர் தமிழ்நாட்டுக்குத் திரும்பியதும் அவருடன் ஆலோசனை செய்துவிட்டு, நானும் துறைச்செயலரும் டெல்லிக்குச் சென்று சம்பந்தப்பட்ட ஒன்றிய அமைச்சர்களைச் சந்தித்து இது குறித்துப் பேசவிருக்கிறோம். இந்தக் காரணங்களால் மாணவர்கள் சேர்க்கையில் எந்த பாதிப்பும் ஏற்படாது. அப்படி எதுவும் முயற்சி நடந்தால், அதையும் சட்டப் போராட்டத்தின் வழி முறியடிக்கத் தயாராக இருக்கிறோம்” என்றார்.

தற்போது, தேசிய மருத்துவ ஆணையம் சுட்டிக்காட்டிய குறைபாடுகளைச் சரிசெய்து, மீண்டும் மருத்துவக் கல்லூரிக்கான அனுமதியைப் பெற விண்ணப்பித்திருக்கிறது தமிழ்நாடு அரசு.

புதிய மாணவர் சேர்க்கைக்கும், ஏற்கெனவே பயிலும் மாணவர்களின் கல்விக்கும் எந்த பாதிப்பும் வராத வகையில் நடவடிக்கைகளை விரைவுபடுத்துமா அரசு?