நாட்டை துண்டாடியவர்களுக்கு பாடப்புத்தகத்தில் இடம் இல்லை

by **சிவா** Sun May 28, 2023 6:57 pm

நாட்டை துண்டாடியவர்களுக்கு பாடப்புத்தகத்தில் இடம் இல்லை :டில்லி பல்கலை துணைவேந்தர்

புதுடில்லி,-''நம் நாடு துண்டாடப்படுவதற்கு அடித்தளம் அமைத்தவர்களைப் பற்றிய விபரங்கள், பாடப்புத்தகத்தில் இடம்பெறக் கூடாது,'' என, டில்லி பல்கலை துணைவேந்தர் யோகேஷ் சிங் கூறினார்.

பாகிஸ்தானில் தேசிய கவிஞராக போற்றப்படுபவர் முகமது இக்பால். இவர், 1877ல், ஒன்றுபட்ட இந்தியாவில், தற்போது பாகிஸ்தானில் உள்ள சியால்கோட்டில் பிறந்தவர். மிகச் சிறந்த கவிஞரான இவர், 'சாரே ஜகான் சே அச்சா' போன்ற பாடல்களை எழுதியவர்.

இவரைப் பற்றிய பாடம் டில்லி பல்கலையில் இளங்கலை பட்டப்படிப்பில், 'நவீன இந்தியாவின் அரசியல் சிந்தனைகள்' என்ற புத்தகத்தில் இடம் பெற்றுள்ளது.

இந்நிலையில், பாடப்புத்தகத்தில் இருந்து, முகமது இக்பாலைப் பற்றிய பாடத்தை நீக்க வேண்டும் என, டில்லி பல்கலை அகாடமி கவுன்சில் சமீபத்தில் தீர்மானம் நிறைவேற்றியது.

இது குறித்து பல்கலை துணைவேந்தர் யோகேஷ் சிங் கூறியதாவது:

இந்தியாவில் இருந்து பாகிஸ்தான் பிரிய வேண்டும் என்ற கோஷத்துக்கு, முதல் முதலில் விதை போட்டவர் முகமது இக்பால் தான். பாகிஸ்தான் என்ற தனி நாடு உருவாக வேண்டும் என்ற கருத்துக்கு அடித்தளம் போட்டவர் இவர்.

முஸ்லிம் லீக், பாகிஸ்தான் தனி நாடு ஆகியவற்றுக்கு ஆதரவாக முகமது இக்பால் பாடல்களை எழுதியுள்ளார்.

நாட்டின் பிரிவினைக்கு காரணமானவர்களின் பாடங்களுக்கு பதிலாக, நம் நாட்டைச் சேர்ந்த தியாகிகளின் பெருமைகள் பாடப்புத்தகங்களில் இடம் பெற வேண்டும். நாடு துண்டாடப்படுவதற்கு காரணமானவர்களைப் பற்றிய பாடங்கள், நம் பாடப்புத்தகத்தில் இடம்பெறக் கூடாது.

டாக்டர் அம்பேத்கரின் தத்துவங்கள், மகாத்மா காந்தியின் தத்துவங்கள், சுவாமி விவேகானந்தரின் போதனைகள் பாடங்களாக இடம் பெற வேண்டும்.

நாடு விடுதலை அடைவதற்காக தங்கள் உயிரையே தியாகம் செய்த பலரைப் பற்றிய விபரங்கள் மக்களுக்கு தெரியாமல் உள்ளன. அவர்களைப் பற்றிய விபரங்களை மக்கள் தெரிந்து கொள்வதற்கு வாய்ப்பு ஏற்படுத்தி தர வேண்டும்.

பிரிவினையின் போது நடந்த பல துயர சம்பவங்கள் இன்னும் வாய்வழி பேச்சாகவே உள்ளன. அவை ஆராய்ச்சி செய்யப்பட்டு, ஆவணப்படுத்தப்பட வேண்டும்.

இவ்வாறு அவர் கூறினார்.