கர்நாடக தேர்தல் ஜாதக கணிப்புகள்/

**T.N.Balasubramanian** · **T.N.Balasubramanian** Wed May 03, 2023 7:04 pm

கர்நாடகா சட்டசபை தேர்தல் 2023 முடிவுகள் வியக்கவைக்கும் விதத்தில் இருக்கும் என ஜோதிட கணிப்புகள் கூறுகின்றன. இதில் ஆளும் பாஜக மீண்டும் ஆட்சி தொடருமா?, காங்கிரஸ் ஆட்சியை கைப்பற்றுமா, ஜேடிஎஸ் ஆட்சியை அமைப்பதற்கான ராஜ தந்திரியாகச் செயல்படுமா என பல விஷயங்கள் கர்நாடகா மக்களிடையே ஓடிக்கொண்டிருக்கும்.
இந்த கர்நாடக சட்டமன்ற தேர்தலில் யாருக்கு வெற்றி வாய்ப்பு அதிகம். யார் ஆட்சியைப் பிடிக்க முக்கியக் காரணமாக அமைவார் என்பதன் ஜோதிட கணிப்புகளை இங்கு பார்ப்போம்.

கர்நாடக தேர்தல் 2023 எப்போது?

கர்நாடக தேர்தல் 2023 மே 10ம் தேதி நடக்க உள்ளது. இந்த தேர்தல் பாஜக, காங்கிரஸ், ஜேடிஎஸ் என அனைத்து கட்சிகளுக்கும் மிக முக்கியமானதாகக் கருதப்படுகிறது.

ஏனெனில் காங்கிரஸ் பல மாநிலங்களில் ஆட்சி இழந்து, சில மாநிலங்களில் ஆட்சி செய்கிறது. பாஜக சிறு சறுக்கல்கள் சந்தித்து வருகின்றது.
கர்நாடகாவைப் பொருத்தவரை பாஜக, காங்கிரஸ், ஜேடிஎஸ் என மூன்று கட்சிக்கும் வாக்கு வங்கி இருப்பதால் வாக்கு சிதறுவதோடு, ஆட்சியைப் பிடிக்க அறுதிப் பெரும்பான்மை எந்த ஒரு கட்சிக்கும் முழுவதுமாக கிடைக்க பல நேரங்களில் தடை ஆகிறது.

இதில் ஜேடிஎஸ் எனும் மதச்சார்பற்ற ஜனதா தளம் யார் ஆட்சி செய்ய வேண்டும் என்று தீர்மானிக்கும் கட்சியாக உள்ளது.

கர்நாடகாவில் மே 10-ம் தேதி நடைபெற உள்ள சட்டசபை தேர்தலுக்காக அனைத்து கட்சி தலைவர்களும் கடுமையாக உழைத்து வருகின்றனர்.

கர்நாடகா மாநிலத்தில் பாஜக, காங்கிரஸ் மற்றும் மதச்சார்பற்ற ஜனதா தளம் இடையே முக்கிய போட்டி நிலவுகிறது.

கடந்த 2018 சட்டமன்றத் தேர்தலில், மற்ற கட்சிகளை விட பாஜக அதிகபட்சமாக 104 இடங்களை வென்றது. ஆனால் எடியூரப்பாவால் பெரும்பான்மையை நிரூபிக்க முடியவில்லை, பின்னர் JDS தலைவர் குமாரசாமி காங்கிரஸ் கட்சியுடன் இணைந்து ஆட்சியை அமைத்தார்.

பின்னர் 2019 ஜூலை 23ல் எச். டி.. குமாரசாமி ஒரு வருடம் ஆட்சி செய்தார்.
2021 ஜூலையில் சில பிரச்னைகளுக்கு பின்னர் பாஜக எட்டியூரப்பா முதல்வர் ஆனார்.
தொடர்ந்து பாஜகவின் பசவராஜ் பொம்மை 2021 ஜூலை 28 முதல் தற்போது வரை ஆட்சி செய்து வருகிறார்.

ஜேடிஎஸ் கட்சியின் தலைவரான குமாரசாமி தேர்தல் யோகம் :

கர்நாடக சட்டப் பேரவையில் மூன்றாவது பெரிய கட்சியான ஜேடிஎஸ் கட்சியின் தலைவரான குமாரசாமி, 1959ஆம் ஆண்டு டிசம்பர் 16ஆம் தேதி மாலை பிறந்தார். இவருக்கு மிதுன ராசி.

குமாரசாமியின் தந்தை தேவகவுடா ஜூன் 1996 முதல் ஏப்ரல் 1997 வரை இந்தியாவின் பிரதமராக இருந்தார்.
குமாரசாமிக்கு இரண்டு முறை கர்நாடக முதல்வராக பதவியேற்கும் பாக்கியம் கிடைத்தது. ஆனால் அரசியல் பிரச்னைகளால் அவரால் ஒரு முறை கூட 5 வருடம் ஆட்சி செய்யும் அதிர்ஷ்டம் இல்லாமல் போனது.

இவரின் ஜாதகத்தில் மிதுன ராசியில் சந்திரன் அமைந்து, அவரின் தொழில் ஸ்தானமான 10ல் கேது அமர்ந்திருக்கிறார்.
6ல் குரு : எதிரிகளை வெல்லக்கூடிய இடத்தில் சுப கிரகமான குரு அமர்ந்துள்ளார். இருப்பினும் இவருக்கு கேது தசை, குரு புத்தி நடக்கிறது. அதனால் பெரியளவில் சாதகமான விஷயம் நடப்பதாக இருக்காது.

எடியூரப்பா ஜாதகம் : தேர்தல் வெற்றி யோகம் எப்படி?

பிப்ரவரி 27, 1943 அன்று கர்நாடக மாநிலம் மாண்டியா மாவட்டத்தில் அதிகாலை 2.35 மணிக்கு எடியூரப்பா பிறந்துள்ளார். இவருக்கு தனுசு லக்கினம், விருச்சிக ராசி. 80 வயதான எடியூரப்பா, 2008 ஆம் ஆண்டு முதல் முறையாக கர்நாடக முதல்வராக பதவியேற்றார், ஆனால் ஊழல் குற்றச்சாட்டுகளால் 2011 இல் ராஜினாமா செய்தார். செவ்வாய் கிரகத்தின் மஹாதசையில் இயங்கும் எடியூரப்பா, தற்போது லிங்காயத் சமூகத்தில் ஆதரவும் கர்நாடகாவில் மிகவும் பிரபலமான பாஜக தலைவர்களில் முக்கியமானவராகவும் உள்ளார்.

விருச்சிக ராசியான எட்டியூரப்பாவுக்கு 4ல் அர்த்தாஷ்டம சனி அமர்ந்துள்ளார். குருவும் 6ல் அமர்ந்துள்ளார். இதனால் இவருக்கு இந்த தேர்தலில் வெற்றி பெற பல தடைகள் சந்திக்க வேண்டியது இருக்கும். இவருக்கு வெற்றிக்கான வாய்ப்பு குறைவு என்று சொல்லலாம்.

பசவராஜ் பொம்மை தற்போதைய கர்நாடகா முதல்வர் ஜாதகம் :

பசவராஜ் பொம்மை 1960ஆம் ஆண்டு ஜனவரி 28ஆம் தேதி கர்நாடக மாநிலம் ஹூப்ளியில் மதியம் 12.6 மணிக்குப் பிறந்தார். தற்போது கர்நாடகா முதல்வராக உள்ளார்.
இவரின் தந்தை எஸ்.ஆர்.பொம்மை இறுதியில் சில காலம் அம்மாநில முதல்வராக இருந்தார்.

பசவராஜ் பொம்மைக்கு மேஷம் லக்னம், மகர ராசி. சூரியன், சந்திரன் மற்றும் புதன் ஆகியோர் மகர ராசியிலும், சுக்கிரன், சனி, செவ்வாய், குரு ஆகியோர் தனுசு ராசியில் ராகு கன்னியில், கேது மீனத்தில் என சஞ்சரிக்கின்றனர்.

பசவராஜ் பொம்மையின் ஜாதகத்தில் சனி, செவ்வாய், வியாழன் மற்றும் சுக்கிரன் சேர்க்கை அவரது தந்தையின் செல்வாக்கைக் காட்டுகிறது. பத்தாம், பதினோராவது (லாபம்) வீடுகளில் சனி இருந்த போது , 2008 முதல் 2013 வரை பாஜக மாநில அரசில் அமைச்சராக இருந்தவர். அவருக்கு தற்போது ராசிக்கு 2ல் சனி இருப்பதோடு, சனியின் தசாவும் நடக்கிறது. செவ்வாய் அதிபதியாக் கொண்ட மேஷம் லக்னமாக அமைந்துள்ளது.

சனி தசா, ராகு புத்தி நடக்கும் போது அரசு வழியில் அனுகூலம், அரச பதவி, பதவி உயர்வு, தாராள பண வரவு என பல விஷயங்கள் நடக்கும்.
இவருக்கு 1.7.2021ல் சனி தசாவில் ராகு புத்தி தொடங்கியது. ஜூலை 28, 2021 அன்று, பசவராஜ் பொம்மைக்கு முதல்வர் பதவி கிடைத்தது.
தற்போது இவருக்கு சிறப்பான தேர்தலாக அமைய வாய்ப்புள்ளது. ஆனால் உட்கட்சி பூசலை சமாளிக்க வேண்டியது இருக்கும்.

டி.கே.சிவகுமாரின் ஜாதக யோகம்

கர்நாடக பிரதேச காங்கிரஸ் தலைவராக டி.கே.சிவ குமார் உள்ளார். இவர் மே 15, 1961 அன்று கனகபுராவில் காலை 5.15 மணிக்கு பிறந்தார். மேஷ லக்னம், ரிஷப ராசி. 10ம் வீட்டு அதிபதி சனி, அங்கேயே சஞ்சரிக்கிறார்.

ஜாதகத்தில் மேஷ லக்னம் குரு பத்தாம் வீட்டில் அமர்ந்திருப்பதாலும், சனி நான்காம் வீட்டில் இருந்து வலுவிழந்த செவ்வாயின் பார்வையாலும் பிரபலமான தலைவராக இருப்பதோடு, அவரை அபரிமிதமான செல்வத்துக்குச் சொந்தக்காரராக்கி இருக்கிறார். 2018ஆம் ஆண்டு தேர்தல் பிரமாணப் பத்திரத்தின்படி, அவர் 840 கோடி சொத்துக்களுக்குச் சொந்தக்காரர் என கணக்கு காட்டியிருந்தார்.

மேஷ லக்னத்தின் டி.கே.சிவகுமாரின் ஜாதகத்தில் செல்வ ஸ்தானமான இரண்டாம் வீட்டில் சூரியன், சந்திரனும், புதனும் இணைந்திருப்பதாலும், 9ம் வீட்டில் குரு அமர்ந்து, இந்த கிரகங்களுக்கு 5ம் பார்வை கிடைக்கிறது.

கர்நாடக தேர்தலில் காங்கிரஸ் இப்படித்தான் இருக்கும்

ஜாதகத்தில் சுக்கிரன் பன்னிரண்டாம் வீட்டில் சனியின் பார்வையில் இருப்பதால், அவர் 2019 இல் வரி மற்றும் பண மோசடி வழக்குகளால் சிறைக்கு செல்ல வேண்டியிருந்தது.
தற்சமயம் டி.கே.சிவகுமாரின் ஜாதகத்தில், சனி தசா, சுக்கிரன் புத்தி நடக்கிறது. இது தேர்தலில் சிறப்பான பலனைத் தரும். இனிவரும் காலத்தில் இவருக்கு சாதகமான பலன் கிடைக்கும்.

குறிப்பு :
இந்த தேர்தல் கணிப்பு ஜோதிடர் சச்சின் மல்ஹோத்ராவின் கணக்கீடுகள் மற்றும் அனுபவத்தின் அடிப்படையில் கணிப்பு அமைந்துள்ளது. தமிழ் சமயம் இது தொடர்பாக எந்த உரிமையும் கோரவில்லை.
தேர்தல் என்பது மக்களின் முடிவே. ஜோதிட முடிவு கிடையாது. நாம் தேர்தல் நடந்து அதற்கான முடிவுகள் வெளியிடப்படும் வரை காத்திருப்போம்.

நன்றி சமயம்

**Dr.S.Soundarapandian** · **Dr.S.Soundarapandian** Thu May 04, 2023 1:04 pm

முழு விவரிப்பு - சோதிட விவரிப்பு!
கடைசியில் , “தேர்தல் என்பது மக்களின் முடிவே. ஜோதிட முடிவு கிடையாது. ”!

கர்நாடக தேர்தல் ஜாதக கணிப்புகள்/