பொதுச்செயலாளர் பதவி: எடப்பாடி பழனிசாமியை அங்கீகரித்த தேர்தல் ஆணையம்

அ.தி.மு.க. பொதுச் செயலாளராக எடப்பாடி பழனிசாமியை தேர்தல் ஆணையம் அங்கீகரித்துள்ளது. மேலும், கடந்த ஜூலை மாதம் 11 ம் தேதி கூட்டப்பட்ட அ.தி.மு.க. பொதுக்குழுவில் நிறைவேற்றப்பட்ட தீர்மானங்களுக்கும் தேர்தல் ஆணையம் ஒப்புதல் வழங்கியுள்ளது.

கடந்த ஆண்டு ஜூலை மாதம் நடந்த பொதுக்குழுவில் எடப்பாடி பழனிசாமி, அ.தி.மு.கவின் இடைக்கால பொதுச்செயலாளராக தேர்வு செய்யப்பட்டார். இதற்கு, முன்னாள் முதலமைச்சர் ஓ.பன்னீர்செல்வம் தரப்பில் சென்னை உயர் நீதிமன்றம் மற்றும் உச்ச நீதிமன்றத்தில் வழக்கு தொடர்ந்திருந்தார்.

இந்த நிலையில், சென்னை உயர் நீதிமன்றம் மற்றும் உச்ச நீதிமன்ற தீர்ப்புகள் அனைத்தும், எடப்பாடி பழனிசாமிக்கு சாதகமாகவும், ஓ.பன்னீர்செல்வத்திற்கு எதிராகவும் அமைந்தது. இதனைத் தொடர்ந்து, கடந்த மாதம் அ.தி.மு.கவின் பொதுச் செயலாளராக எடப்பாடி பழனிசாமி அறிவிக்கப்பட்டார். இதனையும் எதிர்த்து ஓ.பன்னீர்செல்வம் சென்னை உயர்நீதிமன்றத்தில் வழக்கு தொடர்ந்திருந்தார்.

இந்த நிலையில், எடப்பாடி பழனிசாமியை அ.தி.மு.க. பொதுச் செயலாளராக அங்கீகரிக்க கூடாது என தேர்தல் ஆணையத்திற்கு கடந்த சில நாட்களுக்கு முன்னர் ஓ.பன்னீர்செல்வம் தரப்பு கோரிக்கை மனு அளித்தது.

ஆனால், அ.தி.மு.கவின் பொதுச் செயலாளர் எடப்பாடி பழனிசாமி என தேர்தல் ஆணையம் தெரிவித்துள்ளது. இந்த அறிவிப்பு மூலம் அ.தி.மு.க. கட்சி மற்றும் இரட்டை இலை சின்னம் ஆகிய இரண்டும் எடப்பாடி பழனிசாமி வசமானது.

இது தொடர்பாக தேர்தல் ஆணையம் எழுதியுள்ள கடிதத்தில், 'அ.தி.மு.க. பொதுச் செயலாளர் எடப்பாடி பழனிசாமி என்றும், இந்த முடிவு நீதிமன்றத்தின் உத்தரவிற்கு உட்பட்டது' என்று தெரிவிக்கப்பட்டுள்ளது.

இதனால், கர்நாடகாவில் போட்டியிடும் அ.தி.மு.க. வேட்பாளருக்கு இரட்டை இலை சின்னம் கிடைக்கும் என்பது குறிப்பிடத்தக்கது.

ஒன்றரை கோடி தொண்டர்களுக்கு தேர்தல் ஆணையம் தண்டனை வழங்கி இருக்கிறது: ஓ.பி.எஸ் தரப்பு

அ.தி.மு.க-வின் பொதுச்செயலாளராக எடப்பாடி பழனிசாமியை நீதிமன்றம் அங்கீகரித்த நிலையில், தற்போது தேர்தல் ஆணையம் அதனை உறுதி செய்துள்ளது. இந்நிலையில், இது குறித்து ஓ.பன்னீர்செல்வத்தின் ஆதரவாளர் மருது அழகுராஜ் தனது கருத்தை தெரிவித்துள்ளார்.

செய்தியாளர்களுக்கு அளித்த பேட்டியில் மருது அழகுராஜ் பேசுகையில், “நீதிமன்றங்கள் தொடங்கி தேர்தல் ஆணையம் வரை எங்கள் இயக்கத்தை வளர்த்தெடுத்த எம்.ஜி.ஆரின் விதிகளையும், எடப்பாடியின் சதிகளையும் சரிவர உள்வாங்கிக்கொள்ளாமல் பாரபட்சமான தீர்ப்புகள் தொடர்ந்து தரப்படுகிறது. தற்போது தேர்தல் ஆணையம் வழங்கியுள்ள அங்கீகாரத்தை 1.5 கோடி தொண்டர்களுக்கு வழங்கிய தண்டனையாக பார்க்கிறேன். தொண்டர்களின் கருத்துகளுக்கு மாறான தீர்ப்புகள் வழங்கப்பட்டாலும் கூட கட்சியின் தலைமை யார் என்பதை மக்கள்தான் முடிவு செய்வார்கள். மக்கள் மன்றம்தான் இறுதியான தீர்ப்பு என்பதில் நாங்கள் உறுதியாக இருக்கிறோம்.

தேர்தல் ஆணையத்திலிருந்து இப்படி ஒரு அங்கீகாரம் வரும் என்பதை நாங்கள் எதிர்பார்த்ததுதான். இருப்பினும் நாங்கள் இதனை பின்னடைவாக எடுத்துக்கொள்ளவில்லை. எடப்பாடியிடம் இரட்டை இலை சின்னம் தரப்படுவதால், அது அவமானமாக மாறிவிடும் என்பதுதான் என்னுடைய கருத்து. ஈரோடு தேர்தலில் என்ன நடந்தது? டெபாசிட் வாங்குவதே சிரமமாக போய்விட்டது. நான் திருச்செந்தூர் கோயிலுக்கு போகிறேன் எனில் முருகனின் வேலை எடுத்து எனது கையில் வைத்துக்கொண்டால் நான் முருகனாகிவிட முடியுமா?

அப்படிதான் எம்ஜிஆரின் கையில் இருந்த இரட்டை இலை சின்னத்திற்கு கிடைத்த மரியாதை வேறு, ஜெயலலிதா கையில் இருந்த இரட்டை இலை சின்னத்திற்கு கிடைத்த மரியாதை வேறு. தற்போது எடப்பாடி கையில் இருக்கும் இரட்டை இலை சின்னத்திற்கு கிடைத்த மரியாதை வேறு. மருத்துவர்கள் கையிலிருக்கும் கத்தி உயிர்களை காப்பாற்றும். ஆனால் கிரிமினல் கையில் இருக்கும் கத்தி உயிர்களை கொல்லும். ஆக எடப்பாடி பழனிசாமி ஒற்றை தலைமைக்கு உகந்தவர் அல்ல. இதனை நாங்கள் மக்கள் மன்றம் மூலம் நிரூபிப்போம்.” என்று கூறியுள்ளார்.

ஒரு வழியாக EPS /OPS ஊஞ்சலாட்டம் முடிந்தது.

EPS சாமர்த்தியம் என்ன என்பது கர்நாடக தேர்தல் ஓரளவு கூறும்.