உலகின் மிகப்பெரிய SpaceX's Starship rocket சிறப்பம்சங்கள் என்ன?

by **சிவா** Mon Apr 17, 2023 4:28 pm

எலான் மஸ்க்கிற்கு சொந்தமான ஸ்பேஸ்எக்ஸ் நிறுவனத்தின் உலகின் மிகப்பெரிய ராக்கெட் ஸ்டார்ஷிப் சூப்பர் ஹெவி முதல் சோதனை முயற்சிக்கு தயாராக உள்ளது. டெக்சாஸின் போகா சிகாவில் உள்ள ஸ்பேஸ்எக்ஸ் விண்வெளித் தளமான ஸ்டார்பேஸில் இருந்து அமெரிக்க நேரப்படி திங்கட்கிழமை காலை 8 மணிக்கு விண்ணில் செலுத்தப்படுகிறது. விண்வெளி வீரர்களை சந்திரன் மற்றும் செவ்வாய் கிரகங்களுக்கு அனுப்பும் வகையில் வடிவமைக்கப்பட்ட மிகவும் சக்தி வாய்ந்த ராக்கெட் ஆகும்.

ஸ்டார்ஷிப் ராக்கெட் கிட்டத்திட்ட 400 அடி (120-மீட்டர்) உயரம் மற்றும் 33 என்ஜின்களை கொண்டுள்ளது. முன்னதாக கடந்த வாரம் ராக்கெட் ஏவப்பட இருந்த நிலையில் ஏவுதலுக்கான லைசன்ஸ் பெற தாமதம் ஏற்பட்டதால் ராக்கெட் ஏவுதல் ஒத்தி வைக்கப்பட்டது. இந்தநிலையில்
ஃபெடரல் ஏவியேஷன் நிர்வாகத்திடம் இருந்து ஏவுதலுக்கான ஒப்புதல் பெற்ற நிலையில் இன்று ராக்கெட் சோதனை மேற்கொள்ளப்படும் எனக் கூறப்பட்டுள்ளது.

மேலும் இந்த சோதனையில் (டெமோ) ராக்கெட் எந்த விண்கலத்தையும் சுமந்து செல்லாது என்றும் சோதனைக்குப் பின் அனைத்து பாகங்களும் கடலில் விழும் வகையில் தயாரிக்கப்பட்டுள்ளது என்றும் நிறுவனம் தெரிவித்துள்ளது. சோதனையின் போது ராக்கெட் லோ- எர்த் சுற்றுப்பாதைக்கு அனுப்பபடுகிறது.

சூப்பர் சைஸ் ராக்கெட்

ஸ்டெய்ன்லெஸ் ஸ்டீல் ஸ்டார்ஷிப் ராக்கெட் 33 என்ஜின்கள் 16.7 மில்லியன் பவுண்டு உந்து சக்தி கொண்டுள்ளது. மீத்தேன்-எரிபொருள் கொண்ட, முதல்-நிலை எஞ்சின்களில் இரண்டைத் தவிர மற்ற அனைத்தும் ஜனவரியில் ஒரு ஏவுதள சோதனை மேற்கொள்ளப்பட்டது. 250 டன் எடை கொண்ட ஸ்டார்ஷிப் ராக்கெட் செவ்வாய்க்கு 100 பேர் அளவிற்கு சுமந்து செல்லும் திறன் கொண்டது. 6 என்ஜின் கொண்ட விண்கலம்
164 அடி (50 மீட்டர்) உள்ளது.

ஒன்றரை மணி நேர சோதனை

ஸ்டார்ஷிப் சோதனை ஒன்றரை மணி நேரம் (1 1/2 மணிநேரம்) நீடிக்கும் என்று தெரிவிக்கப்பட்டுள்ளது. ஸ்டார்ஷிப் ஏவப்பட்டு நிர்ணயிக்கப்பட்ட மூன்று நிமிட குறியை எட்டிய உடன் பூஸ்டர் பிரிந்து மெக்சிகோ வளைகுடா கடற்பகுதியில் விழும் படி திட்டமிடப்பட்டுள்ளது. விண்கலம் கிழக்கு நோக்கித் சென்று அட்லாண்டிக், இந்திய மற்றும் பசிபிக் பெருங்கடல்கள் கடந்து ஹவாய் அருகே முழுமையாக விழுந்துவிடும் என்று தெரிவிக்கப்பட்டுள்ளது. ஸ்டார்ஷிப் முழுமையாக மீண்டும் பயன்படுத்தக்கூடிய வகையில் வடிவமைக்கப்பட்டுள்ளது ஆனால் சோதனை விமானத்தில் இருந்து எதுவும் சேமிக்கப்படாது.

ஏவுதளம்

டெக்சாஸின் தெற்கு முனையில் போகா சிகா கடற்கரைக்கு அருகில் உள்ள தொலைதூர தளத்தில் இருந்து ஸ்டார்ஷிப் ஏவப்பட உள்ளது. ஏவுதளம் தெற்கு பத்ரே தீவுக்குக் கீழே, பிரவுன்ஸ்வில்லில் இருந்து 20 மைல் தொலைவில் உள்ளது.

by **சிவா** Fri Apr 21, 2023 9:41 pm

எலான் மஸ்க்கின் ஸ்டார்ஷிப் ராக்கெட் சோதனை தோல்வி: நடுவானில் வெடித்து சிதறியது; என்ன நடந்தது?

எலான் மஸ்க்கிற்கு சொந்தமான ஸ்பேஸ்எக்ஸ் நிறுவனத்தின் உலகின் மிகப்பெரிய ராக்கெட், ஸ்டார்ஷிப் ராக்கெட் சோதனை முயற்சி நேற்று (வியாழக்கிழமை) நடைபெற்ற நிலையில் ஏவுதளத்தில் இருந்து ராக்கெட் ஏவப்பட்ட சில நிமிடங்களில் ராக்கெட் நடுவானில் வெடித்து மெக்சிகோ வளைகுடா கடலில் விழுந்தது.

ஸ்டார்ஷிப் ராக்கெட் கிட்டத்திட்ட 400 அடி (120-மீட்டர்) உயரம் மற்றும் 33 என்ஜின்களை கொண்டுள்ள Stainless steel அமைப்பாலான ராக்கெட் ஆகும். டெக்சாஸின் போகா சிகாவில் உள்ள ஸ்பேஸ்எக்ஸ் விண்வெளித் தளமான ஸ்டார்பேஸில் இருந்து ஸ்டார்ஷிப் ஏவப்பட்ட 4 நிமிடங்களில் ராக்கெட் வெடித்தது. சோதனை முயற்சி என்பதால் செயற்கைக் கோள்களோ, மனிதர்களையோ அதில் அனுப்பபட வில்லை.

பூஸ்டர் நிலை பிரிக்கப்பட வில்லை

ஸ்பேஸ்எக்ஸ் அதிகாரிகள் கூறுகையில், “ராக்கெட் ஏவப்பட்ட சில நிமிடங்களில் பூஸ்டர் பகுதி பிரிக்கப் பட வேண்டும். ஆனால் அது நடக்கவில்லை. ராக்கெட் கீழே விழ ஆரம்பித்தது. ஏவப்பட்ட 4 நிமிடங்களில் வெடித்து வளைகுடாவில் விழுந்தது” என்று கூறினர்.

ராக்கெட் ஏவுதலைக் காண போகா சிகா பீச் ஏவுதளத்திலிருந்து பல மைல்கள் தொலைவில் உள்ள சவுத் பேட்ரே தீவில் ஏராளமான மக்கள் குவிந்தனர். ராக்கெட் புறப்பட தயாரான உடன் மக்கள் கூச்சலிட்டனர். “Go, baby, go” என கூச்சலிட்டனர். ஸ்டார்ஷிப் சக்தி வாய்ந்த மற்றும் முக்கியத்துவம் வாய்ந்த ராக்கெட்டாக தயாரிக்கப்பட்டுள்ளது. விண்வெளி வீரர்களை சந்திரன் மற்றும் செவ்வாய் கிரகங்களுக்கு அனுப்பும் வகையில் வடிவமைக்கப்பட்டுள்ளது.

சோதனை முயற்சி தோல்வியடைந்த நிலையில், “தோல்வியில் பாடங்களை கற்று மேம்படுத்துவோம் வெற்றி பெறுவோம்” என எலான் மஸ்க்கின் ஸ்பேஸ் எக்ஸ் நம்பிக்கை ட்விட்டர் பதிவிட்டுள்ளது.

முன்னதாக கடந்த திங்கட்கிழமை சோதனை மேற்கொள்ள இருந்த நிலையில் தொழில்நுட்ப கோளாறு காரணமாக ஏவுதல் தள்ளி வைக்கப்பட்டது குறிப்பிடத்தக்கது.

by **சிவா** Fri Apr 21, 2023 10:26 pm

இந்தியாவின் விண்வெளி நிறுவணம் இஸ்ரோவின் வர்த்தக போட்டியாளராகலாம் என கருதப்படும் அமெரிக்காவின் எலன் மஸ்க் என்பரின் நிறுவனமான ஸ்பேஸ் எக்ஸ் நிறுவனத்தின் ராக்கெட் ஏவிய சில வினாடிகளில் வெடித்திருக்கின்றது.

இது பெரும் அதிர்ச்சியினை ஏற்படுத்தியிருகின்றது, ஸ்பேஸ் எக்ஸ் ராக்கெட்டுகள் வெடித்து சிதறுவது முதல்முறை இல்லை என்றாலும் இது அதிர்ச்சியினை ஏற்படுத்தியிருக்கின்றது.

200 மீட்டர் உயரத்துக்கு மேல் கொண்ட அந்த ராக்கெட் சர்வதேச விண்வெளி நிலையத்தினை தொடர்பு கொள்ள அனுப்பபட்டது என்கின்றன செய்திகள்.

சர்வதேச விண்வெளி திட்டத்தில் அமெரிக்காவின் நாசா எந்த ராக்கெட்டையும் பெரிதாக செலுத்தவில்லை. அங்கு செல்ல ரஷ்யாவின் சோயுஸ் மட்டுமே இப்போது உண்டு.

ஒருவகையில் ரஷ்ய ராக்கெட்டுக்கள் பாதுகாப்பானவை, விபத்து அதிகமில்லா சாதனையினை கொண்டிருப்பவை, எலன் மஸ்க் ரஷ்ய விண்வெளி ஆதிக்கத்தை தகர்க்க உருவாக்கப்பட்டவர் என்பது ஒன்றும் ரகசியமல்ல‌.

இப்போது மறுபடியும் அவர் சறுக்கியிருக்கின்றார், இனி விண்வெளி தேவைக்கு ரஷ்யாவினைத்தான் உலகம் நம்ப வேண்டும், என்னதான் உக்ரைன் தொடர்பாக ரஷ்யாமேல் பல நடவடிக்கை என்றாலும் இன்றும் விண்வெளி அமைப்பில் ரஷ்யாவினை விலக்கி வைக்க யாருக்கும் வழியில்லை.

இந்தியாவின் ராக்கெட்டுகள் நம்பகமானவை என்றாலும் சர்வதேச நிலையத்துடன் இணையும் அளவு இந்தியா அந்த பக்கம் தன் ஆய்வை திருப்பவில்லை, அது வர்த்தக செயற்கை கோள்களை ஏவுவதோடு நிற்கின்றது, விரைவில் இந்த ஆய்வு பக்கம் செல்லலாம்.

2030ல் செவ்வாய்க்கு மனிதர்களை அழைத்து செல்வேன் என சொல்லிகொண்டிருப்பவர் எலன் மஸ்க், அவரின் இந்த சிறிய முயற்சியே சொதப்பிய நிலையில், அடிக்கடி அவர் ராக்கெட் வெடிக்கும் நிலையில் இனி செவ்வாய் கேள்விகுறிதான்

#பிரம்ம_ரிஷியார்

by Sponsored content

உலகின் மிகப்பெரிய SpaceX's Starship rocket சிறப்பம்சங்கள் என்ன?