சித்திரைப் புத்தாண்டு - தமிழகம் முழுதும் கொண்டாட்டம்

சித்திரை திருநாளாம் தமிழ் புத்தாண்டை வரவேற்று கொண்டாட, தமிழக மக்கள் தயாராகி வருகின்றனர். கோவில்களில் சிறப்பு வழிபாட்டுக்கும் ஏற்பாடு செய்யப்பட்டுள்ளது. தமிழகத்தில் பண்டிகைகள், திருவிழாக்கள் இல்லாத மாதங்களே இல்லை. ஆண்டின் துவக்கமான சித்திரை முதல் நாளை தமிழ் புத்தாண்டாகவும், சித்திரை திருவிழாவாகவும் உலகெங்கும் வாழும் தமிழர்கள் உற்சாகமாக கொண்டாடி வருகின்றனர்.

அறுசுவை விருந்து

வேப்பம்பூ ரசம், மாங்காய் பச்சடி, பானகம், நீர் மோர், பருப்பு வடை, பாயசம் என, இனிப்பு, கசப்பு, துவர்ப்பு, உப்பு, காரம், புளிப்பு என அறுசுவை உணவு வகைகளை சமைத்து, நண்பர்கள், உறவினர்களுடன் விருந்துண்டு மகிழ்வதும், குடும்பத்துடன் கோவில்களுக்கு சென்று வழிபடுவதும் தமிழர்களின் வழக்கம்.

அதன்படி, இந்த ஆண்டும் தமிழ் புத்தாண்டான சித்திரையை வரவேற்று கொண்டாட, தமிழக மக்கள் தயாராக உள்ளனர். வேப்பிலை, மாவிலை, தென்னை ஓலை தோரணங்களுடன் வீடுகளை அலங்கரிப்பது, அறுசுவை விருந்து, கோவில்களில் வழிபாடு ஆகியவற்றுக்கும் ஏற்பாடுகளை செய்து வருகின்றனர்.

கடந்த 2008-ல் தி.மு.க., ஆட்சியின்போது, அன்றைய முதல்வர் கருணாநிதி, தை முதல் நாளை, தமிழ் புத்தாண்டாக மாற்றினார்.

'மறைமலை அடிகள், திரு.வி.க., கி.ஆ.பெ.விஸ்வநாதம், சோமசுந்தர பாரதி உள்ளிட்ட, 500 தமிழறிஞர்கள் ஒன்று கூடி, தை முதல் நாள் தான் தமிழ் புத்தாண்டு என அறிவித்தனர். சித்திரை முதல் நாள் தான் தமிழ் புத்தாண்டு என்பதற்கு, எந்த ஆதாரமும் இல்லை' என்று, அதற்கு கருணாநிதி விளக்கம் அளித்தார்.

மறைமலை அடிகள் தலைமையில் நடந்த தமிழறிஞர்கள் மாநாட்டில், தமிழ் புத்தாண்டு தொடர்பான விவாதம் நடந்ததற்கான ஆதாரங்கள் இல்லை. தை தான் புத்தாண்டு என தீர்மானித்திருந்தால், அதை கொண்டாடியிருப்பர். ஆனால், அவர்கள் தை முதல் நாளை புத்தாண்டாக கொண்டாடவில்லை.

சட்ட மசோதா

கருணாநிதி முதல்வரான பின்னரே, அந்த பேச்சு எழுந்திருப்பதாக, அப்போது தமிழறிஞர்கள், கல்வெட்டியல் ஆராய்ச்சியாளர்கள் சுட்டிக்காட்டினர்.

அ.தி.மு.க., ஆட்சிக்கு வந்ததும், 2011 ஆகஸ்டில், சித்திரை முதல் நாள் மீண்டும் தமிழ் புத்தாண்டாக மாற்றப்பட்டது.

அப்போது, சட்டசபையில் பேசிய அன்றைய முதல்வர் ஜெயலலிதா, 'சுய விளம்பரத்துக்காகவே தமிழ் புத்தாண்டை கருணாநிதி மாற்றினார். ஆண்டாண்டு காலமாக, சித்திரை முதல் நாளை தமிழ் புத்தாண்டாக கொண்டாடும் தமிழக மக்களின் உணர்வுகளை புண்படுத்தும் வகையில், கருணாநிதி சட்டம் கொண்டு வந்தார்' என்றார்.

கடந்த 2021-ல் மீண்டும் தி.மு.க., ஆட்சிக்கு வந்ததும், தை முதல் நாளை மீண்டும் தமிழ் புத்தாண்டாக அறிவிக்க வேண்டும் என, தி.மு.க., ஆதரவாளர்கள் கோரிக்கை விடுத்தனர். இப்போதும், அதற்கான முயற்சிகள் நடந்து வருகின்றன.

ஆனால், அதற்கான சட்ட மசோதா கொண்டு வரப்பட்டால், கவர்னர் ஒப்புதல் அளிக்க வாய்ப்பே இல்லை என்பதால், தி.மு.க., தள்ளி வைத்துள்ளதாக கூறப்படுகிறது.

வாழ்த்து

தமிழ் புத்தாண்டை மாற்ற தி.மு.க., அரசு முயற்சித்தாலும், முதல்வர் வாழ்த்து கூறாவிட்டாலும், சித்திரை முதல் நாளையே புத்தாண்டாக உலகெங்கும் வாழும் தமிழர்கள் கொண்டாடி வருகின்றனர்.

அந்த அளவுக்கு தமிழர்களின் உணர்வில், வாழ்வில் சித்திரை தமிழ் புத்தாண்டு இரண்டற கலந்து விட்டது.

தமிழகம் மட்டுமல்லாது கேரளா, அசாம், மேற்கு வங்கம், மணிப்பூர், திரிபுரா உள்ளிட்ட பல மாநிலங்களிலும்; இலங்கை, நேபாளம், மியான்மர், தாய்லாந்து, கம்போடியா போன்ற நாடுகளிலும், சித்திரையே புத்தாண்டு தினமாக உள்ளன.