மன அழுத்தத்திற்கும் உணவுக்கும் உள்ள தொடர்பு என்ன?

மனிதர்களில் அனேகம் பேர் இன்று மன அழுத்தத்துடன் வாழ்கிறார்கள். மன அழுத்தத்தை ஏற்படுத்தும் காரணிகள் நபருக்கு நபர் வேறுபடலாம். இவற்றைத் தாண்டி, காரணமே இல்லாமல் சிலசமயம் மனஅழுத்தத்தை சிலர் உணர்வார்கள். ‘காரணமே இல்லை... ஆனாலும் கடுப்பா இருக்கு...' என்பார்கள். அதெப்படி..? காரணமே இல்லாமல் ஒருவருக்கு மன அழுத்தம் வருமா என்ன?

‘‘உணர்வுகள் பாதிக்கப்படுவதால் மட்டுமல்ல, உணவால் கூட ஒருவருக்கு மன அழுத்தம் உண்டாகலாம்.

சரியான உணவுகளைத் தேர்ந்தெடுத்து உண்ணப் பழகினால் மன அழுத்தம் இல்லாமல் வாழலாம்.

1.காம்ப்ளெக்ஸ் கார்போஹைட்ரேட்:

இதை சிக்கலான கார்போஹைட்ரேட் என அர்த்தப்படுத்திக்கொள்ள வேண்டாம். கார்போஹைட்ரேட் எனப்படும் மாவுச்சத்தில் சிம்பிள், காம்ப்ளெக்ஸ் என இருவகை உண்டு. சிம்பிள் கார்போஹைட்ரேட் எளிதில் செரிமானமாகிவிடும். நார்ச்சத்து உள்ளிட்ட ஊட்டச்சத்துகள் பெரும்பாலும் இருக்காது. அதுவே காம்ப்ளெக்ஸ் கார்போஹைட்ரேட் உணவுகள் மெதுவாகவே செரிமானமாகும். அவற்றில் வைட்டமின்கள், தாதுச்சத்துகள், நார்ச்சத்து அதிகமிருக்கும்.

எந்த உணவுகளில் கிடைக்கும்?

முழுத் தானியங்கள், பாலிஷ் செய்யப்படாத அரிசி மற்றும் சிறுதானியங்கள்.

2. ஆன்டிஆக்ஸிடன்ட்:

மன அழுத்தம் ஏற்படுத்தும் பாதிப்புகளைக் குறைக்க உதவுவதில் ஆன்டிஆக்ஸிடன்ட் உள்ள வைட்டமின் சி அதிகமுள்ள உணவுகள் முக்கியமானவை. எனவே, தினமும் உணவில் நடுத்தர அளவில் ஒரு பழத்தையும், 250 கிராம் காய்கறிகளையும் சேர்த்துக்கொள்ளவும்.

எந்த உணவுகளில் கிடைக்கும்?

கலர்ஃபுல் பழங்கள் மற்றும் காய்கறிகள், முழுத்தானியங்கள், சிட்ரஸ் வகை பழங்கள், முளைக்கட்டிய தானியங்கள்.

3. நல்ல கொழுப்பு:

நல்ல, ஆரோக்கியமான கொழுப்புள்ள உணவுகள் உங்கள் மூளையை அமைதிப்படுத்தக்கூடியவை. அதாவது அத்தியாவசிய கொழுப்பு அமிலமான ஒமேகா 3 என்பது மூளைக்கு மட்டுமல்ல, ஒட்டுமொத்த உடல் ஆரோக்கியத்துக்கும் அவசியமானது. தவறாமல் அதை உணவில் சேர்த்துக்கொள்ளவும்.

எந்த உணவுகளில் கிடைக்கும்?

நட்ஸ், சீட்ஸ், கொழுப்புள்ள மீன்கள்.

4. பி காம்ப்ளெக்ஸ் வைட்டமின்கள்:

உணவிலிருந்து ஆற்றலை வெளிப்படுத்துவதில் இந்த வைட்டமின்கள் பெரும்பங்கு வகிக்கின்றன. புதிய ரத்த செல்களை, மூளை செல்களை உருவாக்கி, ஆரோக்கியமான திசுக்களைத் தக்கவைத்து, உடலின் ஒட்டுமொத்த ஆரோக்கியத்துக்கும் உதவக்கூடியவை.

எந்த உணவுகளில் கிடைக்கும்?

பாலிஷ் செய்யப்படாத தானியங்கள், பால் மற்றும் பால் பொருள்கள், பருப்புகள், கீரை மற்றும் காய்கறிகள்.

5. துத்தநாகம்:

மற்ற எல்லா ஊட்டச்சத்துகளையும் பற்றி அதிகம் பேசும் நாம், துத்தநாகம் பற்றி அவ்வளவாகப் பேசுவதில்லை. பதற்றம் மற்றும் மன அழுத்தத்தில் இருந்து மீட்பதில் துத்தநாகச் சத்து முக்கிய இடம்பெறுகிறது. இந்தச் சத்து உள்ள உணவுகள் தினசரி மெனுவில் இடம்பெற்றாலே மனநலம் ஆரோக்கியமாக இருப்பதை உணரலாம்.

எந்த உணவுகளில் கிடைக்கும்?

அசைவ உணவுகள், நட்ஸ், சீட்ஸ், பால் மற்றும் பால் பொருள்கள்.

இவை தவிர, உடற்பயிற்சிக்கு மன அழுத்தத்தை விரட்டும் தன்மை உண்டு. எனவே ஏதேனும் ஓர் உடற்பயிற்சி செய்யத் தொடங்குங்கள். ஒரு கட்டத்தில் அது வாழ்வின் ஒரு பகுதியாக மாறும். அதற்காக ஜிம்மில் சேர்ந்து, பெரிய பெரிய எந்திரங்களில் பயிற்சி செய்வதும், எடை தூக்குவதும்தான் உடற்பயிற்சி என நினைத்துக்கொள்ள வேண்டாம். நீச்சல், சைக்கிளிங், ஏரோபிக்ஸ், வாக்கிங், யோகா என உங்களுக்கு விருப்பமான எதுவும் செய்யலாம்.

நல்ல பயனுள்ள பதிவு.