நாகங்கள் காத்து நிற்கும் சிவபூமி

புதுச்சேரியிலிருந்து 1.5 கி.மீ தொலைவில், பூந்துறை கிராமம் செல்லும் வழியில் ஓர் அதிசயமான தலம் உள்ளது. தென்கயிலாயநாதர் தலம் என்கிறார்கள். வனப் பகுதிபோலக் காணப்படும் இந்த தலத்தில் 1008 சிவலிங்கங்கள் உள்ளன. இந்த லிங்கங்களைப் பாதுகாக்க இங்கே கருநாகங்கள் உலவுகின்றனவாம்!

புதுச்சேரியில் இருந்து பூந்துறை கிராமம் செல்லும்போது லாரி முனையத்திலிருந்து பிரியும் மண் சாலையில், சுமார் 700 மீட்டர் பயணித்தால் இந்த இடத்தை அடைந்து விடலாம். சுற்றிலும் முந்திரி மற்றும் பல மரங்கள் சூழ்ந்த காட்டுப் பகுதிக்கு நடுவேதான் தென் கயிலாயநாதர் கோயில் அமைந்துள்ளது. திறந்த வெளியிலேயே தென் கயிலாயநாதர் அருள்பாலிக்கிறார்.

அந்த ஈசனைச் சுற்றி 1008 சிவ லிங்கங்கள் வைக்கப்பட்டுள்ளன. இந்திய ராணுவத்தில் பணியாற்றிய அன்பர் ஒருவரே இந்தத் தென்கயிலாய நாதரை நிறுவி வழிபட்டு வருகிறார். இவர் ராணுவத்தில் பணியாற்றிய போது இமயமலைப் பகுதியில் கிடைத்த சிவலிங்கம் இது என்கிறார்.

காசி, கயா, ஸ்ரீசைலம், ராமேஸ்வரம் என இந்தியாவின் முக்கியமான சிவத்தலங்களில் எழுந்தருளியிருக்கும் ஈசனின் திருப் பெயர்களோடு அந்தத் தலங்களில் இருப்பதைப் போன்றே லிங்கத்திருமேனிகள் இங்கே பிரதிஷ்டை செய்யப்பட்டுள்ளன.

இந்த சிவலிங்கக் கோயிலைச் சுற்றிப் பாதுகாப்புக்காக எந்த வேலியும் இடப்படவில்லை. காரணம் இங்கே சிவபெருமானின் ஆபரணமாகத் திகழும் நாகங்கள் பல சுற்றி வந்து இந்த லிங்கங்களைப் பாதுகாப்பதோடு வழிபட்டும் செல்கின்றன என்கிறார்கள்.

ஒருமுறை இங்குள்ள சிவலிங்கம் ஒன்றைத் தூக்கிச் செல்ல முயன்றார் ஒருவர். அப்போது நாகப்பாம்பு ஒன்று அவரைத் துரத்தத் தொடங்கியது. செய்வதறியாது அவர் லிங்கத்தை அப்படியே வைத்துவிட்டு ஓட்டம் பிடித்தார் என்கிறார்கள் ஊர் மக்கள்.

இங்கே ஏராளமான நாகப்பாம்புகள் சுற்றித் திரிந்தாலும் அவை இதுவரை பக்தர்களுக்கு எந்தத் தீங்கும் செய்ததில்லை. என்றாலும் பக்தர்கள் ஒரு குழுவாக வந்து வழிபட்டுச் செல்வதே பாதுகாப்பானது என்கிறார்கள். அதுவும் பகலில் வந்து வழிபடுவதே சிறப்பு என்கிறார்கள். மாலை ஆறு மணிக்கு மேல் பாம்புகளின் நடமாட்டம் அதிகரித்துவிடும் என்பதால், பக்தர்கள் அந்த நேரத்தில் வருவதைத் தவிர்ப்பது நல்லது.

இது சித்தர்கள் வந்து வழிபடும் பூமி என்றும் நம்பப்படுகிறது. சித்தர்கள் அரூபமாக வந்து செல்லும்போது நல்ல வாசனை பரவும் என்பது நம்பிக்கை. அப்படி இந்தப் பகுதியில் அவ்வப்போது நல் வாசனை தோன்றிப் பரவும் என்கிறார்கள். எனவே இங்கு வழிபாடு செய்தால் ஈசனின் ஆசியோடு சித்தர்களின் அனுக்கிரகமும் நமக்கு வாய்க்கும்.

இங்கு வந்து வழிபட்ட பக்தர்களின் துயர்கள் உடனே நீங்குகின்றனவாம். கடன் பிரச்னை, குடும்பச் சிக்கல்கள் ஆகியன இந்த ஈசனின் கருணையால் முற்றிலும் நீங்கி நல்வாழ்வு கிடைக்கிறது என்கிறார்கள்.

ஒரே இடத்தில் 1008 சிவலிங்கங்களை தரிசனம் செய்வது பரவச அனுபவம். வாய்ப்பிருப்பவர்கள் ஒருமுறை இந்த இடத்துக்குச் சென்று சிவலிங்கங்களை தரிசனம் செய்து நற்பலன்களை அடையலாம்.

குறிச்சொற்கள் #1008_சிவலிங்கங்கள் #தென்_கயிலாயநாதர்_கோயில் #சிவலிங்கம் #நாகப்பாம்பு #சிவபூமி