நான்கில் ஒருவருக்கு உயர் ரத்த அழுத்தம்

மேற்கு வங்க மாநிலம் கோல்கட்டாவில், இந்திய நோய் தடுப்பு மற்றும் சமூக மருத்துவ கூட்டமைப்பின் மாநாடு சமீபத்தில் நடந்தது.

இந்த மாநாட்டில், எய்ம்ஸ் டாக்டர்கள் மற்றும் நாடு முழுதும் உள்ள நிபுணத்துவம் வாய்ந்த டாக்டர்கள் பங்கேற்றனர்.

மாநாட்டில் சமர்ப்பிக்கப்பட்ட ஆய்வு கட்டுரை ஒன்றில், 'இந்தியாவில் நான்கில் ஒருவர், உயர் ரத்த அழுத்த நோயால் பாதிக்கப்பட்டுள்ளார். நோய் பாதித்தவர்களில், ௭ சதவீதபெண்களும், ௬ சதவீதஆண்களும் மட்டுமே, முறையாக மருந்துகளை எடுத்துக் கொள்கின்றனர்.

மற்றவர்கள் முறையாக மருந்துகளை எடுத்து கொள்ளாததால், பல்வேறு விதமான நோய்களால் பாதிக்கப்படுகின்றனர்' என, தெரிவிக்கப்பட்டுள்ளது.

இதுகுறித்து, மத்திய சுகாதார மற்றும் குடும்ப நல அமைச்சக துணை டைரக்டர் ஜெனரல், சுதர்ஷன் மண்டல் கூறியுள்ளதாவது:

நாடு முழுதும் மருத்துவ கட்டமைப்பை மேம்படுத்தி வருகிறோம். தேவைப்படும் மருத்துவத்தை, மக்களின் இருப்பிடத்திற்கே கொண்டு செல்கிறோம்.

ரத்த அழுத்தத்தை கண்காணிக்கவும், முறையாக மருந்துகள் வழங்கப்படுவதை உறுதி செய்யவும், 'தி இந்தியா ஹைபர்டென்ஷன் கன்ட்ரோல் இனிஷியேடிவ்' என்ற திட்டம் செயல்படுத்தப்படுகிறது.

இதன் வாயிலாக, 2025ம் ஆண்டுக்குள், 25 சதவீதம் உயர் ரத்த அழுத்த நோயை குறைக்க, மத்திய அரசு இலக்கு நிர்ணயித்துள்ளது. உயர் ரத்த அழுத்த நோய்க்கு எந்த அறிகுறியும் இல்லை. அவ்வப்போது பரிசோதிக்கவில்லை எனில், கண்டுபிடிக்கவே முடியாது.

இதற்கான மருத்துவம் எளிமையானது என்றாலும், மருத்துவ முறையை முழுமையாக பின்பற்றுபவர்கள் எண்ணிக்கை குறைவாக உள்ளது.

எனவே, பொது மக்கள் அவ்வப்போது, உயர் ரத்த அழுத்தத்திற்கான பரிசோதனை செய்து கொள்வதுடன், முறையாக மருந்துகளையும் உட்கொள்ள வேண்டும்.

இவ்வாறு அவர் கூறியுள்ளார்.