நீரிழிவு நோய் கவிதை...(கவிதை கரை -இணையத்திலிருந்து)

உறக்கம் கலைந்த ஒரு
விடுமுறை மதியம்
சோம்பல் மெல்ல
முறித்துவிட்டு,
முகம் கை கால்கழுவி,
மதிய சோறுண்ண,
மந்தமாய் அமர்ந்தேன்..
வெள்ளை சோற்றை
பருப்பில் பிசைந்து
உண்ண முனைகையில்,
"நில்" லென கேட்டது
ஒரு சின்ன குரல்.
சுற்றி பார்த்தேன்
எவருமில்லை..
-
திரும்பவும் முனைகையில்
அதே குரல்
"நில் உண்ணாதே விஷம்!!"
குரல் வந்த திசையை
உற்று பார்த்தேன்..
என் கைப்பிடி சோற்று
பருக்கை ஒன்று
கத்திய சத்தம்
அதுவென்றறிந்தேன்..
-
பருக்கை பேசும்
வியப்பை அடக்கி,
விஷமென கத்திய
காரணம் கேட்டேன்..
அது
சொல்லும் கதைக்கு
காதுகொடுத்தால்,
காரணம் தானே
விளங்கும் என்றது..
சரி சொல்..

வாய்வழி நுழைதலில்
தொடங்குதெங்கள் பயணம்
பின்
உமிழ்நீரில் கலந்து,
உணவுக்குழல் சறுக்கி,
இரைப்பை அடைவோம்..
இரைப்பை அமிலங்கள்
இறங்கிய எங்களை,
சிதைத்து சிறுதுகளாக்கி
கூழாக்கி குழம்பாக்கி,
குற்றமில்லா பொருளாக்கி
பள்ளிக்கு குழந்தையை
பக்குவமாயனுப்பும் தாய்போல
அனுப்பும் மிகஅழகாக
அந்தஇடம் சிறுகுடல்..
சிறுகுடல்..
சிறுமை என்றெண்ணி
சிரித்துவிட வேண்டாம்
இதன் நீளம்
இருபத்தோர் அடியாம்.
-
முன்-இடை-பின் என
மூன்றாக பிரிக்கலாம்,
டியோடினம்-ஜெஜுனம்-இலியம் - எனவும்
ஆங்கிலத்தில் அழைக்கலாம்
சிறுகுடல் நுழையும் எங்களை,
நாள சுரப்பிகளின் ஜீரண சாறு
மால்டேஸ் மாவையும்
ட்ரிப்ஸின் புரதமும்
லைப்பேஸ் கொழுப்பையும்
பிரித்து செரித்து
உயிர்சத்து கொண்டபின்
செத்த உடலாய்
சக்கை உணவு
பெருங்குடல் வழியே,
மலக்குடல் சென்று பின்
மண் தொடும்..
-
இதில்
மாவை செரித்த மால்டேஸ்
மாற்றும் எங்களை குளுக்கோசாய் -பின்
ஏற்றும் அதை ரத்தத்தில்,
சோறாய் பாலாய்,
பழமாய்,
வந்த நாங்கள்,
ஓடையில் மிதக்கும் ஓடம்போல,
ரத்தத்தில் குளுக்கோசாய் இப்போது..
-
ம்ம்ம்....
ஓட ஆட பாட
கண் இமைக்க
கலவி கொள்ள
அத்தனைக்கும்
ஆம் அத்தனைக்கும்
சக்தியது குளுக்கோஸ் தான்
முக்திநிலை எங்களுக்கு
குளுக்கோஸ்தான்...
-
ம்ம்ம்.பிறகு?
பசிக்கழும் செல்களுக்கு
குளுக்கோசை பந்திவைக்க
இன்சுலின் என்றொன்று
இரத்தத்தில் தேவையப்பா -அது
ஊற்றெடுக்கும் உறுப்புக்கு
கணையம் என்று பெயரப்பா..
பசிக்கும் செல்களுக்கு
பாலூட்டல்,
சர்க்கரையின் அளவை
சரிகட்டல் - இவை
இன்சுலினுக்கு
இடப்பட்ட வேலையப்பா..
-
இன்சுலின்தான்
இல்லையென்றால்
என்னாகும் கேளப்பா.
பசிக்கும் செல்கள் -அது
பசித்தே சாகும் ,
செல்வளம் குன்றி
உறுப்புகள் தேயும்..
-
விலைபோகா கடைசரக்காய்,
ரத்தத்தில் குளுக்கோசு,
போகுமிடம் எங்கெங்கும்,
நரம்புகளை சீர்குலைக்கும்-குறு
கண்நரம்பின் வழிசென்று
நன்பார்வை போக்கிடுமே -இதய
மென்நரம்பை தளரவிட்டு
இதயம் காவு கேட்டிடுமே
அளவுஅது மிகும்போது
சிறுநீரில் குடிபுகுந்து
சீரான நரம்புகளை
சிதைத்து விளையாடிடுமே
மொத்தத்தில்,
உயிரோடு இருக்கையிலே,
உறுப்புகள் தானம் செய்யும் ,
உன்னத பிறவியாய்,
உன்னை மாற்றிடுமே
ம்ம்ம்.
-
உடலுழைப்பு
அற்றோர்க்கும்,
வியர்வை அதை சிந்தாமல்
விட்டோர்க்கும்,
கணையத்தின் கருணை அது
கடுகளவும் இல்லையப்பா,
கசக்கியே பிழிந்தாலும்,
கால்சொட்டு சுரக்காதப்பா ..
-
உழைக்காமல் நீ உண்டால்
உய்வில்லை எனக்கப்பா,
மருந்தாகும் உணவப்பா
விஷமாகி போவேனே,
எரிக்காத சக்தியிலே,
எமனாக ஆவேனே,
உயிர் பறித்தான் இவன்என
ஊர்பேச நோவேனே!!!
என விசனகவிதை
பாடியது சோறு..
-
சரி நான் என்ன செய்ய?
மெல்ல கேட்டேன் -சிறுசோறு
அது மேலும்
சொல்ல கேட்டேன்
உழைப்புக்கெற்ற உணவுண்,
பசிக்காமல் உண்ணாதே,
பட்டினியே கிடந்தாலும்,
பழியில்லை நன்றுதான் ..
அளவுக்கு மீறினால் மட்டுமல்ல
உழைக்காமல் உண்டாலும்
அமிர்தம் நஞ்சுதான்..
-
உடல் உழைப்பா,
உடற்பயிற்சியா ,
விளையாட்டா - ஏதோ ஒன்று
உடலை பிழிந்து
வழியும் வியர்வையுடன்
வா என்னிடம்
நான் அமிர்தம்,
உழைக்காத மனிதர் அவர்
அமிர்தமே உண்டாலும்
நான் விஷம்..
-
இதோ உன்கையில்
இருக்கும் நான்
அமிர்தமா விஷமா?
கேட்டது பருக்கை..
விஷம் என்று கூறிவிட்டு
வைத்துவிட்டேன் கைசோற்றை.
அடுத்தமுறை உண்ணும்போது
அமிர்தமாய் இருக்கட்டும் - என
ஆசி வழங்கிவிட்டு,
அதை பசித்திருக்கும்
பாட்டாளி ஒருவனுக்கு
படைத்துவிட கோரியது...
-
சரி..சரி....
செய்கிறேன் ...செய்கிறேன்..
என்னடா சரி சரி!!!
நண்பனின் உலுக்கலில்
கலைந்தது உறக்கம்..
அட கனவு !!!
அதனால் என்ன?
கண் திறந்தால்
கலையும் கனவு,
என்கண் திறந்ததென
உளம் மகிழ்ந்தேன்
உண்ணும் உணவை
அமிர்தமாய்
மாற்றும் வித்தை
கற்று கொண்டேன்
சின்ன சோறு
சொன்ன சொல்லில்
உண்மைஞானம்
விளங்கி கொண்டேன்....
--