ஈழத்தை விற்கும் விகடன்

ஈழத்தில் நடந்த துயரங்களைவிட தமிழ்ப்பத்திரிகைகள் அதனைக் கூறுபோட்டு விற்க முயல்வது அதிக வலியை ஏற்படுத்துகிறது. அதுவும் சமத்து முகமூடி போட்டிருக்கும் விகடன் பத்திரிகைகள் கத்துக்குட்டிகளைக் கொண்டு ஈழத்தில் ஆட விடுவது ரணத்தை ஏற்படுத்துகிறது.

எரிகிற வீட்டில் முடிந்தவரை பிடுங்கி லாபம் அடையும் வேலையை வெட்கப்படாமல் செய்து கொண்டிருக்கிறது விகடன் குழுமம். மஞ்சள் நிற விகட வேலைகளைச் செய்து பிழைப்பு நடத்தலாம். அது ஒரு ரகம். அல்லது உணர்வு வந்தால் காசு போனாலும் பரவாயில்லை என உண்மையை எழுதலாம். அது வேறொரு ரகம். ஆனால் விகட வேலையையும் செய்ய வேண்டும் உணர்ச்சி இருப்பது போலவும் காட்டிக் கொள்ள வேண்டும் என்பதற்காக வெந்து போயிருக்கும் புண்ணைக் குத்திக் கிளறி வியாபாரம் செய்வது எவ்வளவு வக்கிரம்?

ஈழத்தில் நடப்பது சென்னையில் முதுகைச் சொறிந்து கொண்டிருக்கும் நிருபருக்கு என்னய்யா தெரியும்? நேரில் உக்கார்ந்து பார்த்தது போல திரைக்கதை வசனமெழுதி கவர்ஸ்டோரி எழுதுவதற்கு அந்த நிருபர் வெத்தையில் மைபோட்டுப் பார்த்தாரா? மேஜையிலேயே ஒரு கதையைச் சமைத்து அதில் முடிந்தவரை மசாலா தடவி சூடாக விற்பதற்கு உங்களிடம்தானய்யா கற்க வேண்டும். நீங்கள் தடவும் மசாலா ஈழத்துக் காயங்களை எரியச் செய்கிறது என்பது தெரியவே தெரியாதா?

புலி கிளப்பும் கிலி என்று ரைமிங்காக டைட்டில் வைப்பார்கள். எது நிஜப்புலி என ஏளனம் செய்வார்கள். அதோ அங்கிருக்கிறார் இங்கிருக்கிறார் என இவர்களது சோர்ஸ்கள் சொன்னதுபோல தலைப்பில் பின்னிப் பெடலெடுப்பார்கள். இதையெல்லாம் நம்பி அப்பாவி தமிழினம் புத்தகத்தை வாங்கிப் படித்தால், மேஜை சமையல் தெரிந்துவிடும்.

உங்கள் சோர்ஸ்களைப் பற்றித் தெரியாதா எங்களுக்கு? தமிழ்நாட்டில் குடும்பத்தலைவிகள் பலர் மாதக் குத்தகைக்கு விபசாரம் செய்கிறார்கள் என்று ஒரு கதை எழுதினீர்களே? அதற்குத்தான் உங்கள் சோர்ஸ் பயன்படும். உங்கள் மேஜை சமையலும் அதற்குத்தான் லாயக்கு. அதை விட்டுவிட்டு வாரம் தவறாமல் ஈழத்தை கூறுபோட்டுக் கூவிக்கூவி விற்று லாபம் அடையவதற்கு உங்களுக்கு கூசவில்லையா?

http://tamildevi.blogspot.com