49 ஓ – சினிமா விமர்சனம்

-
கதாநாயகன்–கதாநாயகி: கவுண்டமணி–கயல்.

டைரக்ஷன்: பி. ஆரோக்கியதாஸ்.

கதையின் கரு: விவசாய நிலங்களை அழித்து கட்டிடங்கள்
கட்டுபவர்களுக்கு எச்சரிக்கை மணி.

திருவோணம் கிராமத்தில் மனைவி, மகளுடன் வசிக்கும்
கவுண்டமணி, கடன், வறுமையில் தவிக்கும் அங்குள்ள
விவசாயிகளுக்கு உதவியாக இருக்கிறார். அந்த கிராமத்தின்
வழியாக தேசிய நெடுஞ்சாலை அமையவிருப்பதை உள்ளூர்
எம்.எல்.ஏ. மகன் முன்கூட்டியே தெரிந்து கொள்கிறான்.
அதிகாரிகளை கைக்குள் போட்டுக்கொண்டு விவசாய
நிலங்களை குறைந்த விலைக்கு வாங்கி வீட்டு மனைகளாக்கி
விற்று விடுகிறான்.

விவசாயிகளுக்கு பேசிய தொகையை கொடுக்காமலும்
ஏமாற்றுகிறான். இதனால் ஒரு விவசாயி தற்கொலை செய்து
கொள்கிறார்.

அரசியல்வாதிகளின் செயல் கவுண்டமணியை ஆத்திரப்பட
வைக்கிறது. பாதிக்கப்பட்ட விவசாயிகளுக்கு நிலங்களை
மீட்டுக் கொடுக்க முடிவெடுக்கிறார். அப்போது அந்த தொகுதிக்கு
இடைத் தேர்தலும் வருகிறது. அதை பயன்படுத்தி விவசாய
நிலத்தை கவுண்டமணி எப்படி மீட்கிறார்? என்பது மீதி கதை.

கவுண்டமணி நீண்ட இடைவெளிக்குப்பிறகு அதே கிண்டலும்,
கேலியுமாக கலகலக்க வைக்கிறார். விவசாயிகள் நலனுக்கு
குரல் கொடுப்பது, அரசியல்வாதிகளின் தகிடுதத்தங்களை
அம்பலப்படுத்துவது, தேர்தலில் சாணக்கியத்தனமாக
காய்களை நகர்த்தி தேர்தல் ஆணையத்தையே கதிகலங்க
வைப்பது, போன்ற காட்சிகள், அழுத்தமானவை.

கவுண்டமணியின் ஆறடி தாய் மடி திட்டமும், அதற்கு
‘நான் கடவுள்’ ராஜேந்திரனை வைத்து விளம்பர படம் எடுப்பதும்
தியேட்டரை குலுங்க வைக்கிறது. வசனங்கள் கை தட்ட
வைக்கின்றன.

அரசியல்வாதி மகனாக வந்து விவசாயிகள் நிலங்களை
அபகரிக்கும் திருமுருகன், கந்து வட்டிக்காரராக வரும்
குரு சோமசுந்தரம், பாலாசிங் ஆகியோர் வில்லன்களாக
மிரட்டுகிறார்கள்.

விளம்பர பட டைரக்டராக வரும் ‘நான் கடவுள்’
ராஜேந்திரன்–சாம்ஸ் கூட்டணி காமெடி ரகளை. கவுண்டமணி
மனைவியாக விசாலினி, மகளாக வைதேகி வந்து போகிறார்கள்.
தேர்தல் பிரசார காட்சிகள் நீளமாக இருப்பது சலிப்பு.

அரசியல் படத்தை வித்தியாசமாக தந்து கவனம் ஈர்க்கிறார்,
டைரக்டர் ஆரோக்கியதாஸ். கிராமமே திரண்டு வந்து வேட்பு
மனு தாக்கல் செய்வது, ரியல் எஸ்டேட்டில் சுடுகாட்டுக்கு மனை
விற்பது முத்திரை பதிவுகள். கே இசையில், ‘‘அம்மா போல
அள்ளித்தரும் மழைதான்’’ பாடல் முணு முணுக்க வைக்கிறது.
ஆதி கருப்பையா கேமரா கிராமத்து அழகை அள்ளுகிறது.
–
——————————————————-
தினத்தந்தி