வேண்டுதல் நிறைவேறவே ரோஜாப்பூ மாலை

-

அக்காவின் உத்தரவுப்படி தங்கை கோயில் கொண்ட தலம்,
திருச்சி கருமண்டபம், தங்கை இளங்காட்டு மாரியம்மன்
அங்கு அருள்புரிவதுபற்றி செவிவழிக் கதை ஒன்றுள்ளது.

தஞ்சைக்கு அருகேயுள்ள ஊர் இளங்காடு இந்த ஊரில்
சரியான தங்கும் இடமில்லாமல் இருந்தாள் அன்னை
இளங்காட்டு மாரியம்மன். தன் நிலை பற்றி மூத்த சகோதரி
சமயபுரம் மாரியம்மனிடம் முறையிட்டாள்.

'பழநிக்கு காவடி சுமந்துகொண்டு உன் ஊர் வழியாக பலர்
செல்வார்கள்.அவர்களுடன் சேர்ந்து நீயும் புறப்பட்டுச் செல்.
மலைக்கோட்டை நகரை நீ கடக்கும் போது உன்னை காளியும்
ஒண்டி கருப்புசாமியும் வழிமறிப்பார்கள் அந்த இடத்திலேயே
நீ தங்குவாயாக!'
என தமக்கைக்கு கூற, தங்கையும் காவடி சுமந்து
சென்றவர்களுடன் புறப்பட்டாள்.

கருமண்டபம் அருகே வந்தபோது தங்கையை காளியும்,
கருப்புசாமியும் வழிமறிக்க, தங்கை அங்கேயே தங்கிவிட்டாள்
.இந்த விவரங்களை கருமண்டபம் பகுதியில் உள்ள ஒரு சிறுமிக்கு
அருள் வந்து கூற, ஊர் மக்கள் ஒன்றுகூடி ஒரு கோயில்
அமைத்தனர்.

ஆரம்பத்தில் குடிசையாய் இருந்த கோயில் காலப்போக்கில்
கற்கோயிலாய் மாறியது. இன்று அழகான ஆலயத்தில் அருள்
பாலித்துக் கொண்டிருக்கிறாள் இளங்காட்டு மாரியம்மன்.

நூறாண்டுகள் பழமையான கோயில், கிழக்கு நோக்கிய
ஆலயத்தில் உள்ளே நுழைந்ததும் இடதுபுறம் கருப்பண்ணசாமி
குதிரை மேல் கம்பீரமாகக் காட்சி அளிக்கிறார்.

மேற்கு பிராகாரத்தில் பிள்ளையார், நாகர்கள் சன்னதியும்.
வடக்கு பிராகாரத்தில் விஷ்ணு துர்க்கையின் சன்னதியும் உள்ளது.
வடகிழக்கு மூலையில் நவகிரக நாயகர்கள் அருள்பாலி்கின்றனர்.

மகாமண்டபம் தொடர்ந்து அர்த்த மண்டப நுழைவாயிலில்
துவாரபாலகிகள் காவலிருக்கு, கருவறையில் இளங்காட்டு
மாரியம்மன் அமர்ந்த திருக்கோலத்தில் நான்கு கரங்களுடன்
அமைதி தவழ அருள்பாலிக்கிறாள்.

ஒவ்வொரு வைகாசி மாதம் வளர்பிறையில் முதல் ஞாயிற்றுக்
கிழமை தொடங்கி, அன்னைக்கு பத்துநாள் திருவிழா
கோலாகலமாக நடைபெறுகிறது.

முதல் நாள் அம்மனுக்கு காப்புக் கட்டுதல் நிகழ்ச்சியும், இரவு
கோரையாற்றிலிருந்து அம்மனுக்கு பூ கொண்டு வருதல், வாண
வேடிக்கை ஒயிலாட்டம், சிலம்பாட்டமும், அடுத்து ஐந்து நாட்கள்
அம்மனுக்கு சிறப்பு அபிஷேக, ஆராதனைகளும் நடைபெறும்.

அன்னை உள்பிராகாரத்தில் வலம் வருவதுண்டு. 7ம் நாள் மாலை
5 மணிக்கு குத்துவிளக்கு பூஜை நடைபெறும். 8ம் நாள்
திருவிழாவாக இரவு 7 மணிக்கு கோரையாற்றிலிருந்து கரகாட்டம்,
நையாண்டிமேளம், வாணவேடிக்கை, சிலம்பாட்டம் இவைகளுடன்
கரகம் ஆலயம் வந்து சேரும்.

9ம் நாள் காலை 7 மணிக்க அக்னிசட்டி, பால்குடம், மயில் காவடி,
அலகு குத்துதல் என பக்தர்கள் கலந்து கொள்ளும் காவடித் திருவிழாவும்,
காலை 8 மணிக்கு தீமிதித் திருவிழாவும் நடைபெறும்.

10ம் நாள் அம்மன் திருவீதி உலா வருவதும், மஞ்சள் நீராட்டு விழாவும்
நடைபெறும். மறுநாள் விடையாற்றி விழாவுடன் உற்சவம் இனிதே
நிறைவுபெறும்.

ஆடிப்பூரம் இங்கு சிறப்பாகக் கொண்டாடப்படுகிறது.
அன்று அன்னைக்கு சுமார் ஒரு லட்சம் வளையங்களால் அலங்காரம்
செய்கின்றனர். மூன்று நாட்களுக்குப் பின் இந்த வளையங்களை
பக்தைகளுக்கு பிரசாதமாக தருவர்.

நவராத்திரி நாட்களில் உற்சவம் அம்மனை தினசரி விதவிதமாய்
அலங்காரம் செய்வர். மார்கழி 30 நாட்களும் அன்னைக்கு விசேஷ
அபிஷேக, ஆராதனைகள் நடைபெறகின்றன. திருக்கார்த்திகை
தீபத்தின் போது ஆலயத்தில் அகல் விளக்குகள் ஏற்றப்பட்டு
சொக்கப்பனை ஏற்றும் வைபவம் நடைபெறும்.

ஆடி மாதம் 28ம் தேதி கருப்பண்ணசாமிக்கு அருகே உள்ள ரெட்டமலை
கோயிலில் சிறப்பு வழிபாடுகள் நடத்தப்படும்.

வௌ்ளிக்கிழமைகளில் அன்னைக்கு ரோஜாப்பூ மாலை அணிவித்து
அர்ச்சனை செய்து மணப்பேறு, மகப்பேறு, நிரந்தரவேலை கிட்ட
பிரார்த்தனை செய்து கொண்டால் வேண்டுதல்கள் விரைவில்
நிறைவேறும் என்பது நம்பிக்கை தங்கள் பிரார்த்தனை பலித்ததும்
அன்னைக்கு புடவை வாங்கி சாத்தி மகிழ்கின்றனர், பக்தர்கள்.

இங்குள்ள விநாயகப் பெருமானுக்கு சங்கடஹரசதுர்த்தி நாட்களிலும்,
விநாயகர் சதுர்த்தியின் போதும், முருகப் பெருமானுக்கு சஷ்டியின்
போதும் சிறப்பு அபிஷேக ஆராதனைகள் நடைபெறுகின்றன.

விஷ்ணு துர்க்கைக்கு வௌ்ளியன்று ராகு கால நேரத்தில் விளக்கேற்றி
வழிபட நினைத்தது நடக்குமாம்.

இந்த ஊர் வழியாக பழநிக்குப் பாதயாத்திரை செல்வோர் இரவு இந்த
ஆலயத்தில் தங்கி ஓய்வெடுத்து காலையில் பயணத்தைத்
தொடங்குகின்றனர்.

எங்கே இருக்கு:
திருச்சி மத்திய பேருந்து நிலையத்திலிருந்து 1 கி.மீ. தொலைவில்
கருமண்டபம் பகுதியில் இந்த ஆலயம் உள்ளது. நகரப் பேருந்து,
ஆட்டோ வசதி உண்டு.

தரிசன நேரம்: காலை 6-12; மாலை 5-9

- ஜெயவண்ணன்
நன்றி: தினமலர்