சென்னை மக்கள் நஜிப்பை “புதிய ஹீரோ” என்று வருணிக்கின்றனர்

பிரதமர் நஜிப் அப்துல் ரசாக் நேற்று தொடக்கம் சென்னைக்கு வரலாற்றுச் சிறப்புமிக்க இரண்டு நாள் பயணத்தை மேற்கொண்டுள்ளார். சென்னை அவரைக் கவர்ந்ததற்கான காரணம் என்ன என்று பலர் வியப்படைந்துள்ளனர். இந்தியாவின் தமிழ் நாடு மாநிலத் தலைநகர் சென்னைக்கு அதிகாரத்துவ வருகை அளித்துள்ள முதலாவது மலேசியப் பிரதமர் நஜிப் என்பதும் குறிப்பிடத்தக்கது.

உண்மையில் பெர்னாமா நிருபர் சந்தித்த மக்கள் அனைவரும் நஜிப்பின் வருகையால் மனம் நெகிழ்ந்துள்ளனர். மலேசியாவும் சென்னையும் நீண்ட கால உறவுகளைக் கொண்டிருப்பதால் நஜிப்பின் பயணம் மிகவும் அர்த்தமுள்ளது என்றும் அவர்கள் வருணித்தனர்.

அவர்கள் நஜிப்பை மலேசியாவின் “புதிய ஹீரோ” என்றும் வருணித்தனர். நஜிப்புக்கும் தமிழ் நாடு முதலமைச்சர் மு. கருணாநிதிக்கும் இடையில் நிகழவிருக்கும் வரலாற்றுப்பூர்வ சந்திப்புக்காகவும் அவர்கள் ஆவலோடு காத்திருக்கின்றனர்.

மலேசியத் தலைவரின் வருகையை ஒட்டி தமிழ் நாட்டையும் மலேசியாவையும் சேர்ந்த வணிகப் பெரு மக்கள் கடந்த இரண்டு நாட்களாக சென்னையில் ஒன்று திரண்டுள்ளனர்.

அந்த மாநகரத்தில் உள்ள ஹோட்டல்கள் அனைத்தும் இவ்வார இறுதி வரை முழுமையாகப் பதிவாகி விட்டன. சிங்கப்பூரைச் சேர்ந்தவர்கள் உட்பட பெரும் எண்ணிக்கையிலான மக்கள் சென்னைக்கு வந்திருப்பது அதற்குக் காரணம் ஆகும்.

ஐந்து நட்சத்திர ஹோட்டல்களில் இடம் இல்லாததால் பல வணிகர்கள், நண்பர்கள் வீடுகளில் தங்கியிருப்பதாகத் தெரிய வருகிறது.

தற்போது சென்னையில் இருக்கும் மலேசிய வெளியுறவுத் துணை அமைச்சர் ஏ கோகிலன் பிள்ளை, சென்னைக்கு இரண்டு நாள் பயணத்தை மேற்கொள்வதற்கு எவ்வாறு முடிவு செய்தார் என்பதை அவர் பெர்னாமாவுக்கு விளக்கினார்.

“தொடக்கத்தில் அவரது பயணம் மூன்று அல்லது நான்கு நாட்களுக்கு மட்டுமே திட்டமிடப்பட்டிருந்தது. மலேசியாவுக்கும் சென்னைக்கும் இடையில் நீண்ட கால, சிறப்பான உறவுகள் இருந்து வருவதால் சென்னைக்கு முக்கியத்துவம் கொடுக்க வேண்டிய அவசியத்தை நஜிப்புக்கு தெரிவிப்பதில் நான் வெற்றி அடைந்தேன்”, என்று அவர் சொன்னார்.

“அவை குடும்ப உறவுகள் மட்டும் அல்ல. வர்த்தகம், முதலீடு போன்ற துறைகளிலும் உறவுகள் தொடருகின்றன.”

“இறுதியில் நஜிப்பின் இந்தியப் பயணம் மேலும் இரண்டு நாட்களுக்கு நீட்டிக்கப்பட்டது. சென்னையில் உள்ள மலேசிய மாணவர்களையும் பிரதமர் சந்திப்பதற்கும் ஏற்பாடு செய்யப்பட்டுள்ளது”, என்றும் கோகிலன் பிள்ளை தெரிவித்தார்.

நஜிப்பும் கருணாநிதியும் தமிழ் நாட்டைச் சேர்ந்த தொழிலாளர்கள் வேலை செய்ய மலேசியாவுக்கு செல்வது, வேலை அனுமதிகள், விசா பிரச்னைகள் மற்றும் அரசியல் விவகாரங்களையும் விவாதிப்பர் என்று எதிர்பார்க்கப்படுகிறது.

பெர்னாமா