எண்ணூரில் பயங்கரம்: தொழில் அதிபர் வெட்டிக்கொலை; ரூ. 8 லட்சம் நகைகள் கொள்ளை

திருவொற்றியூர், ஜன. 22- எண்ணூர் சாஸ்திரி நகர் 1-வது தெருவில் வசித்து வந்தவர் ஜெயசிங் (52). அப்பகுதியில் பிரபலமான தொழில் அதிபரான இவர், எர்ணாவூர் மற்றும் சத்திய மூர்த்தி நகர் ஆகிய இடங் களில் 2 ஓட்டல்களையும் நடத்தி வருகிறார். இவர் தினமும் ஓட்டல்களுக்கு சென்று விட்டு இரவு நேரத்தில் வீடு திரும்புவது வழக்கம்.

நேற்று மாலையில் ஓட்டலுக்கு சென்றவர், பின்னர் வீடு திரும்பவில்லை. இன்று காலையில் எண்ணூர் அனல்மின் நிலையம் எதிரே அவர் கழுத்தை அறுத்து கொலை செய்யப்பட்டு கிடந்தார். அவரது உடலில் பல இடங்களில் வெட்டுக்காயங்கள் இருந்தன.

இதுகுறித்து தகவல் கிடைத்ததும் மாதவரம் துணை கமிஷனர் ஆனிவிஜயா, உதவி கமிஷனர் பால்ராஜ் ஆகியோர் சம்பவ இடத்துக்கு விரைந்து சென்று விசாரணை நடத்தினர். எண்ணூர் போலீஸ் இன்ஸ்பெக்டர் மனோகரன், கொலை செய்யப்பட்ட ஜெயசிங்கின் உடலை கைப்பற்றி பிரேத பரிசோதனைக்காக ஸ்டான்லி ஆஸ்பத்திரிக்கு அனுப்பி வைத்தார்.

ஓட்டலுக்கு சென்று விட்டு வீடு திரும்பிய போது ஜெயசிங்கை பின் தொடர்ந்து வந்த கொலையாளிகள், அவரை வெட்டிக்கொன்று விட்டு அவர் அணிந்திருந்த ரூ. 8 லட்சம் மதிப்பிலான நகைகளை கொள்ளையடித்துச் சென்றுள்ளனர்.

கொலையுண்ட தொழில் அதிபர் ஜெயசிங் எப்போதும் நடமாடும் நகை கடை போல காட்சி அளிப்பார். உடல் முழுவதும் நகைகளை அணிந்து அழகு பார்த்த இவர், 22 பவனில் செயின் அணிந்திருந்தார். 11 பவுனில் “பிரேஸ்லெட்” போட்டிருந்தார். ரூ. 2 லட்சம் மதிப்பிலான வைர மோதிரம், 1/2 கிலோ வெள்ளிக்கொடி ஆகியவற்றையும் ஜெய்சிங் அணிந்திருந்தார்.

இவர் அணிந்திருந்த நகைகள் அனைத்தும் கொள்ளையடிக்கப்பட்டுள்ளன.

நீண்ட நாட்களாக திட்டம் போட்டு கொள்ளையர்கள் ஜெயசிங்கை கொலை செய்திருக்கலாம் என்று போலீசார் சந்தேகிக்கிறார்கள். இது தொடர்பாக போலீஸ் விசாரணை முடுக்கி விடப்பட்டுள்ளது.

கொலை செய்யப்பட்ட ஜெயசிங்கின் மனைவி சுசிர்தபாய் கடந்த ஓராண்டுக்கு முன்னர் இறந்து விட்டார். இவர்களுக்கு குழந்தைகள் இல்லை. பாலாஜி (15) என்ற வளர்ப்பு மகள் உள்ளார்.

இந்நிலையில் கடந்த சில மாதங்களுக்கு முன்பு, பெர்சியா (16) என்ற உறவுக்கார பெண்ணை ஜெயசிங் 2-வது திருமணம் செய்து கொண்டது குறிப்பிடத்தக்கது.

ஜெயசிங்கின் சொந்த ஊர் தூத்துக்குடி மாவட்டம் நாசரேத் அருகே உள்ள மூக்குபீரி ஆகும்.

கொலையுண்ட ஜெயசிங்கின் மனைவி பெர்சியா, தனது கணவர் கொலை செய்யப்பட்டது குறித்து கேள்விப்பட்டதும், கதறி அழுதார். கண்ணீர் மல்க அவர் கூறும்போது, இவ்வளவு நகைகளை அணிந்து செல்லாதீர்கள் என்று பல முறை எனது கணவரிடம் கூறியுள்ளேன். கேட்காமல் நகைகளை அணிந்து சென்ற போது இப்படி கொன்று விட்டார்களே என்று கதறினார்.

இக்கொலை சம்பவம் அப்பகுதியில் பெரும் பரபரப்பை ஏற்படுத்தியுள்ளது

மிக்க கொடுமையான நிகழ்ச்சி அண்ணா மிக வருத்தமாக உள்ளது