தியானம் - 10 உண்மைகள்

1.தியானம் உடலையும் மனதையும் ஒரு புள்ளியில் நிறுத்தும் யோகமுறை. அதனால்தான் இதனை ராஜயோகம் என்றார்கள். அதாவது, யோகம் எனப்படும் உடலை வலுவாக்கும் பயிற்சிகளுக்கு எல்லாம் ராஜனைப் போன்றது.

2.உடலுக்கும் மனதுக்குமான ஒத்திசைவை மேம்படுத்துவது. கவனக் குவிப்பை அதிகரிப்பது. எந்த செயலிலும் மனம் ஒன்றி இயங்கப் பழகுவது, ஒரே இடத்தில் நாம் வெகு நேரம் அமர்ந்திருப்பதன் மூலம் ஒரு செயலை தொடர்ந்து செய்வதற்கான மனத்திட்பத்தை அதிகரிப்பது ஆகியவை தியானத்தின் பலன்கள்.

3.அமைதியான சூழலில் காற்றோட்டம் இருக்கும் இடத்தில் கண்களை மூடி மனதை இரு நெற்றிப்பொட்டுக்கு நடுவே குவித்து செய்யப்படும் மனக் குவிப்புப் பயிற்சியே தியானம்.

4.மனதை நெற்றிப்பொட்டில் நிறுத்தும் போது ஏதேனும் கடவுள் உருவத்தையோ சிறிய ஒளியையோ கற்பனை செய்யச் சொல்வார்கள் சிலர். ஆனால், இது எதுவுமே தேவையில்லை. மனதை நெற்றிப் பொட்டில் நிறுத்தி எண்ண அலைகளை கவனித்துக்கொண்டிருந்தாலே போதுமானது.

5.ஆழ்ந்த தியானம் உடலில் பல நல்ல மாற்றங்களை உருவாக்குகிறது. எந்த விஷயம் சார்ந்தும் பதற்றமில்லாமல் யோசிக்கும் தர்க்கத் திறனை அதிகரிக்கிறது. மனதைச் சாந்தப்படுத்துகிறது. தெளிவை உருவாக்குகிறது.

6.மன அழுத்தத்தை உருவாக்கும் சைட்டோகின் என்ற சுரப்பியைக் கட்டுப்படுத்துவதில் தியானத்துக்கு முக்கியப் பங்குண்டு.

7.மூளையில் சுரக்கும் டோபமைன் என்ற ஹார்மோனை மகிழ்ச்சிக்கான ஹார்மோன் என்பார்கள். ஒருவர் உடலில் இந்த ஹார்மோன் போதுமான அளவு சுரந்தால்தான் மனதில் நிம்மதி இருக்கும். ஆழ்நிலைத் தியானம் டோபமைன் சுரப்பை மேம்படுத்துவதாக ஆய்வுகள் தெரிவிக்கின்றன.

8.தியானத்தால் மூளை சுறுசுறுப்படைகிறது. மூளைக்குச் செல்லும் ஆக்சிஜன் அளவு மேம்படுகிறது. இதனால் மூளை உற்சாகமாகி வலுவடைகிறது.

9.தினமும் குறைந்தது 20 நிமிடங்கள் தியானம் செய்தாலே உடல், மனம் இரண்டின் இயக்கமும் ஒருங்கிணைவு அடையும். மூளை ஆரோக்கியம் பெற்று சுயக் கட்டுப்பாடும் அதிகரித்து மகிழ்ச்சியான வாழ்க்கை வாழலாம்.

10.காலை நேரமே தியானத்துக்கு மிகவும் உகந்தது. காலையில் செய்ய இயலவில்லை எனில் மாலையில் சூரிய அஸ்தமனத்துக்குப் பிறகு செய்யலாம்.

தொகுப்பு - செளந்தர்
நன்றி குங்குமம் டாக்டர்