அரசுக்கு எதிராக போராட்டம் 'ஜாக்டோ - ஜியோ' அறிவிப்பு

சென்னை :
'ஜாக்டோ - ஜியோ' என்ற அரசு ஊழியர் - ஆசிரியர் கூட்டமைப்பு,
அரசின் பள்ளிக் கல்வி அதிகாரிகள் மற்றும் நிதித்துறை அமைச்சருக்கு
எதிராக போராட்டம் அறிவித்துள்ளது.

கடந்த அ.தி.மு.க., ஆட்சி யில், ஜாக்டோ - ஜியோ சார்பில், தொடர்
போராட்டங்கள் நடத்தப்பட்டன. இந்த அமைப்பின் போராட்டம் மற்றும்
கோரிக்கைகளுக்கு, அப் போதைய எதிர்க்கட்சி தலைவர் ஸ்டாலின் ஆதரவு
அளித்து வந்தார்.

இதையடுத்து நடந்த சட்ட சபை தேர்தலில், ஜாக்டோ - ஜியோ அமைப்பினர்,
சமூக வலைதளங்களில் தி.மு.க., வுக்கு ஆதரவாக கருத்து தெரிவித்தனர்.
தி.மு.க., ஆட்சி பொறுப்பேற்றதும், தங்கள் சங்கங்களின் கோரிக்கை
நிறைவேறும் என, நம்பியிருந்தனர்.

ஆனால், ஜாக்டோ - ஜியோ முன் வைத்த கோரிக்கைகளுக்கு,
தி.மு.க., அரசு செவி சாய்க்கவில்லை. இதுகுறித்து, பல முறை அறிக்கை
விடுத்த ஜாக்டோ ஜியோ, ஓராண்டு காத்திருப்புக்கு பின், நேற்று
போராட்டத்தை அறிவித்துள்ளது.

ஜாக்டோ - ஜியோ ஒருங்கிணைப்பாளர்கள் கூட்டம், சென்னையில் நேற்று
நடந்தது. கூட்டத்தில், பல்வேறு தீர்மானங்கள் நிறைவேற்றப்பட்டுள்ளன.
அதன் விபரம்:

 அரசு ஊழியர்களுக்கு மத்திய அரசு வழங்கிஉள்ள, 3 சதவீத
அகவிலைப்படியை, தமிழக அரசு ஊழியர்களுக்கு முன் தேதியிட்டு வழங்க
வேண்டும்.

ஊதியத்துடன் கூடிய சரண்டர் விடுப்பு வழங்க வேண்டும்

 தி.மு.க.,வின் தேர்தல் வாக்குறுதிக்கு முரணாக செயல்படும், தமிழக நிதி
அமைச்சரின் போக்கையும், பள்ளிக்கல்வித் துறையில், ஆசிரியர், அரசு ஊழியர்
மற்றும் பணியாளர்களுக்கு எதிரான அதிகாரிகளின் போக்கையும் கண்டித்து,
வரும் 5ம் தேதி மாவட்ட தலைநகரங்களில் ஆர்ப்பாட்டம் நடத்தப்படும்

 மீண்டும் பழைய ஓய்வூதிய திட்டத்தை அமல்படுத்த வலியுறுத்தி, அடுத்த மாத
இறுதியில், ஜாக்டோ - ஜியோவின் பென்ஷன் மீட்பு மாநாடு நடத்தப்படும் என,
தீர்மானங்கள் நிறைவேற்றப்பட்டன.

-தினமலர்