தயிர், பன்னீருக்கு 5 சதவீதம் ஜி.எஸ்.டி : ஜூலை 18 முதல் அமல்

பேக்கிங் செய்யப்பட்ட அனைத்து வகையான உணவு பொருட்களுக்கும் 5 சதவீதம் ஜி.எஸ்.டி, வரும் திங்கள் (ஜூலை 18 ) முதல் அமலுக்கு வருகிறது.
ஜூன் 28,29ம் தேதிகளில் சண்டிகரில் மத்திய நிதியமைச்சர் நிர்மலா சீதாராமன் தலைமையில் 47வது ஜி.எஸ்.டி., கவுன்சில் கூட்டம் நடந்தது. கூட்டத்தில், பேக்கிங் செய்யப்பட்ட அரிசி உள்ளிட்ட அனைத்து வகை உணவு தானியங்களுக்கும் 5 சதவீதம் வரி விதிக்க முடிவு செய்யப்பட்டது.

இந்நிலையில், ஜி.எஸ்.டி., எனப்படும் சரக்கு மற்றும் சேவை வரியில் செய்யப்பட்டுள்ள மாற்றங்கள் குறித்து மத்திய மறைமுக வரிகள் மற்றும் சுங்க வாரியம் நேற்று வெளியிட்ட அறிவிக்கையில் கூறியிருப்பதாவது :

ஜி.எஸ்.டி கவுன்சிலில் எடுத்த முடிவுகளின்படி, இதுவரை விலக்கு அளிக்கப்பட்ட முன்னரே பேக்கிங் செய்யப்பட்ட தயிர், மோர், பன்னீர், அரிசி உள்ளிட்ட உணவு பொருட்களுக்கு,வரும் 18ம் தேதி முதல் 5 சதவீதம் ஜி.எஸ்.டி அமலுக்கு வருகிறது. மேலும் வாடிக்கையாளர்களிடம், வங்கிகள் வினியோகிக்கும் காசோலை புத்தக கட்டணத்துக்கு, 18 சதவீதம் வரி விதிக்கப்படும்.

மருத்துவமனைகளில் ( ஐ.சி.,யூ தவிர ) நாளொன்றுக்கு அறை வாடகை ரூ.5,000க்கு மேல் வசூலிக்கப்பட்டால் இனி அதற்கும் 18 சதவீத வரி விதிக்கப்படும். எல்.இ.டி பல்புகள் உள்ளிட்ட மின் சாதனங்களுக்கு வரி, 12 சதவீதத்தில் இருந்து 18 சதவீதமாக உயர்கிறது. ஸ்டேஷனரி பொருட்களுக்கான வரியும் 18 சதவீதமாக உயர்த்தப்படுகிறது.
இவ்வாறு அதில் கூறப்பட்டுள்ளது.

வரி குறையும் பொருட்கள் :
தனியார் நிறுவனங்களிடம் இருந்து ராணுவ தேவைகளுக்கு கொள்முதல் செய்யப்படும், ராணுவ உபகரணங்களுக்கு ஜி.எஸ்.டி யில் இருந்து விலக்கு அளிக்கப்பட்டுள்ளது.
ரோப் கார் பயணத்துக்கு விதிக்கப்பட்ட வரி 18 சதவீதத்தில் இருந்து 5 சதவீதமாக குறைக்கப்பட்டுள்ளது. செயற்கை கால், உபகரணங்கள் போன்றவற்றிற்கான வரி 12 சதவீதத்தில் இருந்து 5 சதவீதமாக குறைக்கப்பட்டுள்ளது.

ஆன்லைன் விளையாட்டு, சூதாட்டம், லாட்டரி, குதிரை பந்தயம் போன்றவற்றிற்கு 28 சதவீத வரி விதிப்பது தொடர்பான முடிவை, ஆகஸ்ட் மாதம் நடக்கும் ஜி.எஸ்.டி கவுன்சில் விவாதிக்க மத்திய அரசு முடிவெடுத்துள்ளது.

தினமலர்

இந்த ஜூலை மாதம் பன்னீருக்கு நல்ல மாதமில்லை போலிருக்கு .

மானிடனின் முகத்தில் கவலை வரிகள்!