தமிழகத்தில் மீண்டும் கொரோனா கட்டுப்பாடு?

சென்னை :
''தமிழக மருத்துவமனைகளில், 40 சதவீதம் கொரோனா நோயாளிகள்
சிகிச்சை பெறும் நிலை வந்தால், கட்டுப்பாடுகள் விதிக்கப்படும்,'' என,
மக்கள் நல்வாழ்வுத் துறை அமைச்சர் சுப்பிரமணியன் கூறினார்.

சென்னை, போரூர் ராமச்சந்திரா மருத்துவமனையில்,
'இன்னுயிர் காப்போம் - நம்மை காக்கும் 48' திட்டத்தின் கீழ் சிகிச்சை
பெறும் 80 ஆயிரமாவது பயனாளியை, அமைச்சர் சுப்பிரமணியன் சந்தித்து,
நேற்று நலம் விசாரித்தார்.

பின், அவர் அளித்த பேட்டி:அரசின் இன்னுயிர் காப்போம் திட்டம்
2021 டிச., 18ல் துவங்கப்பட்டது. இதில், 669 மருத்துவமனைகள் இணைக்கப்
பட்டுள்ளன. விபத்தில் சிக்குபவர்கள் எந்த நாட்டை சார்ந்தவர்களாக இருந்தாலும்,
முதல் 48 மணி நேரத்திற்கு, 1 லட்சம் ரூபாய் சிகிச்சை இலவசமாக வழங்கப்பட்டு,
அவர்களின் உயிர் காப்பாற்றப்படுகிறது.

'இன்னுயிர் காப்போம்'


விழுப்புரத்தைச் சேர்ந்த சக்திவேல், 54, விபத்தில் சிக்கி, ராமச்சந்திரா
மருத்துவமனையில் சிகிச்சை பெறுகிறார். அரசின், இன்னுயிர் காப்போம்
திட்டத்தில் சிகிச்சை பெறும் 80 ஆயிரமாவது நபர். இந்த மருத்துவமனையில்
விபத்தில் சிக்கிய 421 பேர் இந்த திட்டத்தில் சிகிச்சை பெற்றுள்ளனர்.

இந்த திட்டத்தில், ஆறு மாதங்களில், 80 ஆயிரத்து 251 பேர் பயனடைந்து
உள்ளனர். இவர்களுக்கு, அரசு சார்பில் 72.90 கோடி ரூபாய் செலவிடப்பட்டு
உள்ளது.

சமூக பொறுப்பு நிதியின் கீழ், தனியார் மருத்துவமனைகளில் இலவசமாக
'பூஸ்டர் டோஸ்' போட நடவடிக்கை எடுக்கப்பட்டு வருகிறது. அதுவரை
காத்திருக்காமல், இரண்டாம் தவணை செலுத்தி, ஒன்பது மாதங்கள் கடந்தவர்கள்
தடுப்பூசி போட்டுக் கொள்ளலாம்.

தமிழகத்தில் 39.23 லட்சம் பேர் முதல் தவணை; 1.13 கோடி பேர் இரண்டாம்
தவணை தடுப்பூசி போடாமல் உள்ளனர். ஜூலை 10ம் தேதி மெகா தடுப்பூசி முகாம்
நடைபெற உள்ளது.

தமிழகத்தில் மீண்டும் கொரோனா கட்டுப்பாடு போட வேண்டிய அவசியம்
ஏற்படவில்லை.

அறிவுறுத்தல்

மொத்த ஆர்.டி.பி.சி.ஆர்., பரிசோதனை எண்ணிக்கையில், 10 சதவீதத்துக்கு
மேல் தொற்று பாதிப்பு இருந்தாலோ, மருத்துவமனையில் 40 சதவீதத்துக்கு மேல்
அனுமதி இருந்தாலோ, கட்டுப்பாடுகள் விதிக்க மத்திய அரசு அறிவுறுத்திஉள்ளது.
தமிழகத்தில் இதுவரை அந்த சூழல் ஏற்படவில்லை.இவ்வாறு சுப்பிரமணியன்
கூறினார்.

நிகழ்வில், மக்கள் நல்வாழ்வுத் துறை செயலர் செந்தில்குமார், சுகாதார திட்ட
இயக்குனர் உமா, பொது சுகாதாரத்துறை இயக்குனர் செல்வவிநாயகம் உள்ளிட்டோர்
பங்கேற்றனர்.

தினமலர்