ஜூலை 18ல் அடுத்த ஜனாதிபதி தேர்தல்? : வரும் 10ல் அறிவிப்பு வெளியாகிறது!

நாட்டின் அடுத்த ஜனாதிபதி தேர்தலை ஜூலை 10 ல் நடத்த தேர்தல்
கமிஷன் திட்டமிட்டுள்ளது. இதற்கான அறிவிப்பு, வரும் 10ம் தேதி
வெளியாகும் என எதிர்பார்க்கப்படுகிறது.

நாட்டின் 14 வது ஜனாதிபதியாக உள்ள ராம்நாத் கோவிந்தின்
பதவிக்காலம், அடுத்த மாதம் ௨௫ம் தேதியுடன் முடிகிறது.
இதையடுத்து, புதிய ஜனாதிபதி தேர்தலை நடத்துவதற்கான
ஏற்பாடுகளில் தேர்தல் கமிஷன் தீவிரமாக ஈடுபட்டுள்ளது.

இதற்காக, தலைமை தேர்தல் கமிஷனர் ராஜிவ் குமார், தேர்தல்
கமிஷனர் அனுாப் சந்திர பாண்டே ஆகியோர், மத்திய உள்துறை மற்றும்
சட்டத்துறை அமைச்சகங்களுடன் நேற்று ஆலோசனை நடத்தினர்.

இதில், ஜூலை ௧௮ம் தேதி ஜனாதிபதி தேர்தலை நடத்த முடிவு செய்யப்
பட்டுள்ளதாக தகவல் வெளியாகியுள்ளது. இதற்கான முறையான
அறிவிப்பை, வரும் ௧௦ம் தேதி தலைமை தேர்தல் கமிஷனர் வெளியிடுவார்
என எதிர்பார்க்கப்படுகிறது.

பா.ஜ., தீவிரம்

ஜனாதிபதி தேர்தலுக்கான தலைமை தேர்தல் அதிகாரியாக ராஜ்யசபா
பொதுச்செயலர் பி.சி.மோடி நியமிக்கப்பட்டு உள்ளார். இதற்கிடையே,
ஜனாதிபதி தேர்தலுக்கான வேட்பாளரை முடிவு செய்யும் பணியில்,
மத்தியில் ஆளும் பா.ஜ., தீவிரமாக ஈடுபட்டுள்ளது.

ராம்நாத் கோவிந்துக்கு இரண்டாவது முறையாக வாய்ப்பு அளிக்கலாம்
என, சில தகவல்கள் வெளியாகின.

ஆனால், அவருக்கு மீண்டும் வாய்ப்பளிக்க பா.ஜ., தலைமை விரும்பவில்லை.
ஜனாதிபதி ராம்நாத் கோவிந்தை நேற்று முன்தினம் சந்தித்த பிரதமர் மோடி,
இது பற்றி அவரிடம் தெரிவித்து விட்டதாக கூறப்படுகிறது.

அரசியல் சார்பற்ற ஒருவரை ஜனாதிபதி வேட்பாளராக நிறுத்துவது பற்றி,
பிரதமர் மோடி ஆலோசித்து வருகிறார். ஜனாதிபதி தேர்தலில், தங்கள்
வேட்பாளருக்கு ஆதரவு திரட்டும் பிரசாரத்தை பிரதமர் மோடி துவக்கி
விட்டார்.

இது தொடர்பாக, ஒடிசா முதல்வரும், பிஜு ஜனதாதளம் தலைவருமான
நவீன் பட்நாயக்கை, நேற்று முன்தினம் தொலைபேசியில் தொடர்பு கொண்டு
பிரதமர் பேசியுள்ளார்.

ஆலோசனை

ஜனாதிபதி தேர்தலில், பா.ஜ., வேட்பாளருக்கு எதிராக பொது வேட்பாளரை
நிறுத்துவது பற்றி, காங்கிரஸ் அல்லாத எதிர்க்கட்சிகள் ஆலோசித்து வருகின்றன.

தங்கள் வேட்பாளரை காங்கிரஸ் ஆதரிக்க வேண்டும் என அக்கட்சிகள்
விரும்புகின்றன.ஆனால், இதை காங்கிரஸ் ஆதரிக்குமா என்பது சந்தேகம் தான்.
ஜனாதிபதி தேர்தலுக்கான தேதியை தேர்தல் கமிஷன் முறையாக அறிவித்தவுடன்,
நாட்டில் அரசியல் களம் சூடுபிடிக்கும் என்பது நிச்சயம்.

- புதுடில்லி நிருபர் -தினமலர்