முடிகிறது 6 நியமன எம்.பி.,க்கள் பதவி: தமிழக பா.ஜ.,வில் யாருக்கு யோகம்?

by **ayyasamy ram** Thu Apr 21, 2022 6:36 am

-
சென்னை:
சுப்ரமணியசாமியின் நியமன எம்.பி., பதவிக் காலம் முடிவதால்,
அந்த பதவியை பெறும் முயற்சியில், தமிழக பா.ஜ., மூத்த தலைவர்கள்
ஈடுபட்டுள்ளனர்.

ராஜ்யசபாவில் மொத்தம் 245 எம்.பி.,க்கள் உள்ளனர். இது தவிர, மத்திய
அமைச்சரவை பரிந்துரையில், 12 எம்.பி.,க்களை, ஜனாதிபதி நியமனம்
செய்வார். அப்படி, 2016-ல் நியமனம் செய்யப்பட்ட சுப்ரமணியசாமி,
சுரேஷ் கோபி, மேரிகோம், நரேந்திர ஜாதவ், ரூபா கங்குலி,
ஸ்வவன்தாஸ் குப்தா ஆகிய 6 எம்.பி.,க்களின் பதவிக் காலம் வரும் 24-ல்
முடிகிறது.

இதனால், எந்த நேரத்திலும் புதிய நியமன எம்.பி.,க்கள் குறித்து அறிவிப்பு
வெளியாகலாம் என்று கூறப்படுகிறது.

பத்திரிகை, கலை, இலக்கியம், விளையாட்டு, தொழில், கல்வி என, பல்வேறு
துறைகளில் சாதனை படைத்தவர்கள் தான், ராஜ்யசபாவுக்கு
நியமிக்கப்படுவது வழக்கம். ஆனால், சில சந்தர்ப்பங்களில், தீவிர அரசியலில்
இருப்பவர்களும், இந்த முறையில் நியமிக்கப்படுகின்றனர்.

மன்மோகன்சிங் பிரதமராக இருந்தபோது, தமிழகத்தை சேர்ந்த முன்னாள்
மத்திய அமைச்சர் மணிசங்கர் அய்யர், ராஜ்யசபா நியமன எம்.பி.,யாக
இருந்தார். பா.ஜ., ஆட்சிக்கு வந்ததும், 201௬-ல் சுப்ரமணியசாமி நியமன
எம்.பி.,யாக்கப்பட்டார்.

மீண்டும் எம்.பி.,யாக்க வேண்டும் என, கடந்த ஓராண்டாகவே, சாமி
வெளிப்படையாகவே கோரிக்கை விடுத்து வந்தார். பா.ஜ.,வில் இருந்தாலும்
அவர், பிரதமர் மோடி அரசை கடுமையாக விமர்சித்து வருகிறார்.
இதனால், கடந்த ஆண்டு பா.ஜ., தேசிய செயற்குழு உறுப்பினர் பொறுப்பில்
இருந்து நீக்கப்பட்டார்.

சாமியை மீண்டும் எம்.பி.,யாக்க பிரதமர் மோடியும், உள்துறை அமைச்சர்
அமித்ஷாவும் விரும்பவில்லை என கூறப்படுகிறது. இதை தெரிந்து கொண்ட
அவர், 'பொருளாதாரம், எல்லை பாதுகாப்பு, உள்நாட்டு பாதுகாப்பு, வெளியுறவு
ஆகியவற்றில் மோடி அரசு தோல்வி அடைந்துள்ளது' என, கடுமையாக
விமர்சித்துள்ளார்.

இந்நிலையில், நியமன எம்.பி., பதவியை பெறும் முயற்சியில், தமிழக பா.ஜ.,
மூத்த தலைவர்கள் பொன்.ராதாகிருஷ்ணன், எச்.ராஜா, சி.பி.ராதாகிருஷ்ணன்
ஆகியோர் ஈடுபட்டுள்ளதாக, அக்கட்சியினர் தெரிவிக்கின்றனர்.

கடந்த சில வாரங்களுக்கு முன்பு பொன்.ராதாகிருஷ்ணன், பிரதமர் நரேந்திர
மோடியை சந்தித்து பேசினார். தமிழக பா.ஜ.,வில் மூத்த தலைவரான
எச்.ராஜாவின் பெயர், கவர்னர் பதவிக்கு பரிசீலிக்கப்பட்டு வருவதாகவும்
தகவல் வெளியாகி உள்ளது.

பிரபல மலையாள நடிகர் சுரேஷ் கோபி, வங்காள நடிகை ரூபா கங்குலியின்
நியமன எம்.பி., பதவிக் காலமும் முடிவதால், திரைத் துறை சேர்ந்த ஒருவருக்கு
எம்.பி., பதவி கிடைப்பது உறுதி என்கின்றனர்.

இசையமைப்பாளர் இளையராஜா, நடிகர் ரஜனி, 'இஸ்ரோ' விஞ்ஞானி சிவன்,
தொழிலதிபர் ஸ்ரீதர் வேம்பு உள்ளிட்ட பலரின் பெயர்களை, பா.ஜ., மேலிடம்
பரிசீலித்து வருவதாக கூறப்படுகிறது.

-தினமலர்

by **T.N.Balasubramanian** Thu Apr 21, 2022 9:02 am

நியமன MP க்கள் வேஸ்ட்.
ரேகா /சச்சின்/ரூபா கங்குலி இன்னும் பலர் எவ்வளவு நாட்கள் ராஜ்ய சபா வந்தார்கள் ?மக்களுக்கோ /கலை உலகிற்கோ என்ன சேவை செய்தார்கள்.
நம்முடைய வரி பணம் இவர்களுக்கு தண்டமாக மாதாமாதம் போய் சேருகிறது. இதை கேட்பார் யாருமில்லை. பணத்துடன் பணம் சேருகிறது.தொண்டு நிறுவனங்களுக்கு கொடுக்கலாம்.

சோகம்