பாசஞ்சர் ரயில் இல்லாத தெற்கு ரயில்வே: எல்லாமே எக்ஸ்பிரஸ் தான்!

கொரோனா
ஊரடங்கு காலத்தில் தெற்கு ரயில்வேயில் நிறுத்தப்பட்ட பாசஞ்சர் ரயில்கள்
அனைத்தும் சிறப்பு ரயில் என்ற பெயரில், எக்ஸ்பிரஸ் கட்டணத்துக்குரிய
ரயில்களாக மாற்றப்பட்டுள்ளன.

கொரோனா ஓரளவுக்குக் கட்டுக்குள் வந்தபின், பொதுபோக்குவரத்து மீண்டும்
துவக்கப்பட்டபோது, தெற்கு ரயில்வேயில் இயக்கப்பட்ட பெரும்பாலான பாசஞ்சர்
ரயில்கள் இயக்கப்படவே இல்லை.
சில ரயில்கள் மட்டும், சிறப்பு ரயில்கள் என்ற பெயரில் மீண்டும் இயக்கப்படும்
என்று அறிவிக்கப்பட்டது.


கோவையில் இருந்து மேட்டுப்பாளையத்துக்கு தினமும் ஐந்து முறை இயக்கப்பட்டு
வந்த பாசஞ்சர் ரயில், சிறப்பு ரயில் என்ற பெயரில் மீண்டும் இரண்டு முறை மட்டுமே
இயக்கப்படுகிறது. அதிலும் எக்ஸ்பிரஸ் கட்டணம் வசூலிக்கப்படுகிறது.


இந்த ரயில் உட்பட எந்த ரயிலையும் சிறப்பு ரயிலாக இயக்க வேண்டும் என, ரயில்வே
அமைச்சகம் எந்த உத்தரவையும் பிறப்பிக்கவில்லை. கடந்த மார்ச் 16ல், அனைத்து
ரயில்வே மண்டலங்களிலும் இயங்கும் 111 பாசஞ்சர் ரயில்களை மீண்டும் இயக்குமாறு,
ரயில்வே அமைச்சகம் அறிவுறுத்தியுள்ளது.
இதில் தெற்கு ரயில்வேக்கு உட்பட்ட தமிழகத்தில் மட்டும் 24 ரயில்கள் இடம்பெற்றுள்ளன.



ஊர்ஜிதம்மதுரை - ஆண்டிபட்டி, ஆண்டிபட்டி - மதுரை ரயில் மட்டுமே இதில் புதிய ரயிலாக
அறிவிக்கப்பட்டது. மற்ற ரயில்கள் அனைத்தும் ஏற்கனவே பாசஞ்சர் ரயிலாக
இயக்கப்பட்டவை. இந்த ரயில்கள் அனைத்துமே, இப்போது சிறப்பு ரயில்களாக மாற்றப்பட்டு,
எக்ஸ்பிரஸ் கட்டணத்தில் இயக்கப்படுகின்றன. கட்டணத்துக்காக மட்டுமே, இந்த ரயில்களுக்கு '
எக்ஸ்பிரஸ்' என்ற பெயர் சூட்டப்பட்டு, எண்ணுக்கு முன் ஒரு பூஜ்யம் சேர்க்கப்பட்டுள்ளதே தவிர,
வேகம் அதிகப்படுத்தப்படவில்லை; சிறப்புப் பெட்டிகளும் இணைக்கப்படவில்லை.

ஈரோட்டில் இருந்து கோவைக்கு இயக்கப்படும் பாசஞ்சர் ரயில், இப்போதும் இரண்டே முக்கால்
மணி நேரத்தில் தான் கோவையைச் சென்றடைகிறது. இதே வழித்தடத்தில் இயக்கப்படும்
மற்ற எக்ஸ்பிரஸ் ரயில்களுக்கு ஒரு மணி நேரம் மட்டுமே பயண நேரமாகிறது. இதிலிருந்தே,
கட்டணத்துக்காக மட்டுமே, இந்த ரயில்களுக்கு பெயர் மாற்றப்பட்டுள்ளது என்பது
ஊர்ஜிதமாகியுள்ளது.

தன்னிச்சையாக முடிவு

ஒட்டு மொத்தமாக, தெற்கு ரயில்வேயில் தற்போது ஒரு ரயில் கூட பாசஞ்சர் ரயிலாக
இயக்கப்படவில்லை. தென்மேற்கு ரயில்வே, தென் மத்திய ரயில்வே உள்ளிட்ட அனைத்து
மண்டலங்களிலும் பாசஞ்சர் ரயில்கள் மீண்டும் இயக்கப்படுகின்றன.

தென் மேற்கு ரயில்வேக்கு உட்பட்ட பெங்களூருவில் இருந்து தர்மபுரிக்கு இயக்கப்படும் ரயில்,
இப்போதும் பாசஞ்சர் ரயிலாக, சாதாரண கட்டணத்தில்தான் இயக்கப்படுகிறது. இதனால்
தெற்கு ரயில்வேயில் உள்ள அதிகாரிகள்தான், மத்திய அரசின் உத்தரவை மதிக்காமல்,
தன்னிச்சையாக இந்த முடிவை எடுத்துள்ளனர் என்பது தெளிவாகத் தெரிகிறது.

கட்டணம் உயர்த்த...

சேலம் ரயில்வே கோட்ட உபயோகிப்பாளர் குழு உறுப்பினர் ஜெயராஜ் கூறுகையில்,
''முழுக்க முழுக்க கட்டணத்தை உயர்த்துவதற்காக மட்டுமே, இந்த ரயில்களை சிறப்பு ரயில்கள்
என்று மாற்றி, எக்ஸ்பிரஸ் கட்டணத்தை வசூலிக்கின்றனர். இதுபற்றி பலமுறை மனு கொடுத்தும்,
அதிகாரிகள் மதிப்பதாகவே தெரியவில்லை,'' என்றார்.தெற்கு ரயில்வே அதிகாரிகள் யாரும்
இதற்கு விளக்கம் தர தயாராக இல்லை.

கீழ்நிலை அதிகாரிகளிடம் கேட்டால், 'ரயிலில், அரசு பஸ் கட்டணத்தை விட குறைவான
கட்டணம்தான்' என்று காரணம் கூறுகின்றனர்.

தினமலர்

பொது மக்களுக்கான சேவை என்பது மாறி, வணிகமாகி விட்டது தெற்கு ரயில்வே!
ரயில்வே துறை இதை திரும்பப் பெற வேண்டும்!