கோடையிலும் கொட்டும் அதிரப்பள்ளி அருவி

-

-
கேரளாவின் மிகப்பெரிய நீர்வீழ்ச்சியும் இந்தியாவின் நயாகரா என்றும்
அழைக்கப்படும் அதிரப்பள்ளி அருவியில் இந்த கோடையிலும் தண்ணீர்
கொட்டுவதால் சுற்றுலா பயணியர் குவிந்து வருகின்றனர்.

கேரளாவின் திருச்சூர் மாவட்டம் அதிரப்பள்ளி ஊராட்சியில் அமைந்துள்ள
இந்த அதிரப்பள்ளி அருவி 24 மீட்டர் உயரத்தில் மூன்று பிரிவுகளாக விழுகிறது
.மழைக்காலத்தில் வழச்சல் மற்றும் சோலையாற்றில் தண்ணீர்
பெருக்கெடுக்கும் போது மூன்று அருவிகளும் ஒன்று சேர்ந்து ஒரே அருவியாக
பேரருவியாக விழும்.

இந்த அருவிகளில் குளிப்பது என்பது ஆபத்தானது என்பதால் குளிப்பதற்கு
அனுமதி கிடையாது,அருவியை நெருங்க முடியாத அளவு வேலி போட்டு
தடுத்துள்ளனர்.கொஞ்சம் கரடு முரடான கல்பாதை வழியாக சென்று அருவியை
பார்த்து ரசிக்கலாம்.குளிக்க ஆசைப்படுபவர்கள் கொஞ்ச துாரத்தில் அகலமாய்
ஓடும் ஆற்று நீரில் குளித்து மகிழலாம்.
-
மலையாள படங்களில் இந்த அருவி நிறைய இடம் பெற்றுள்ளது
தமிழ் படங்களைப் பொறுத்தவரை இந்த அருவியை இயக்குனர் பாலசந்தர்
தனது புன்னகை மன்னன் படத்தில் மிக அழகாக காட்டியிருப்பார் இதன்
காரணமாக இந்த அருவியை நம்மவர்கள் ‛புன்னகை மன்னன் அருவி' என்றும்
அடையாளப்படுத்தி அழைக்கின்றனர்.
அதன்பிறகு இருவர் படத்திலும் இந்த அருவி அழகுற இடம் பெற்றுள்ளது.

இந்த அருவிக்கு இந்தியா முமுவதும் இருந்து சுற்றுலாப் பயணிகள் வருகிறார்கள்.
கிட்டத்தட்ட ஆண்டுக்கு 7 மில்லியன் சுற்றுலா பயனிகள் வந்து செல்வதாக
ஒரு கணக்கெடுப்புத் தெரிவிக்கிறது.இந்த அதிரப்பள்ளி வனப்பகுதியை
இந்தியாவிலேயே மிகச்சிறந்த யானைகள் பாதுகாப்பு ஸ்தலமாக குறிப்பிட்டுள்ளது.

சர்வதேச பறவைகள் அமைப்பு அதிரப்பள்ளி வனப்பகுதியை ஒரு முக்கிய
பறவைகள் சரணாலயமாகவும் அங்கீகரித்துள்ளது. இருவாச்சி எனும் அருகி
வரும் பறவையினத்தின் நான்கு வகைகள் இங்கு வசிக்கின்றன
-

திருச்சூர்,கோட்டயம் பகுதியை மையப்படுத்தி சுற்றுலா செல்பவர்கள் அவசியம்
இந்த அருவியை பார்க்க வேண்டும் அந்த அளவிற்கு பிரமிப்பையும் அழகையும்
ஒரு சேரதரும்.இயற்கையின் அதிரவைக்கும் தரிசனத்தை அளிக்கும் இந்த
அதிரப்பள்ளி பகுதிக்கு இதுவரை நீங்கள் விஜயம் செய்ததில்லை என்றால், அடுத்து
சுற்றுலாவுக்கான ஸ்தலமாக யோசிக்காமல் இந்த அதிரப்பள்ளி சுற்றுலா தலத்தை
நீங்கள் தேர்ந்தெடுக்கலாம்

பெட்டிச் செய்தி:எப்படி செல்வது
அதிரப்பள்ளி அருவிக்கு 30 கிமீ தொலைவில் சாலக்குடி ரயில் நிலையம் உள்ளது.
54 கிமீ தொலைவிலுள்ள கொச்சி விமான நிலையம் உள்ளது. சாலக்குடியில் இருந்து
பஸ் மற்றும் வாடகை கார்கள் கிடைக்கும்..இந்த அருவிக்கு செல்ல வனத்துறை
கட்டணம் வசூலிக்கிறது.காலை 8 மணி முதல் மாலை 6 மணி வரை மட்டுமே அனுமதி.

-எல்.முருகராஜ்-தினமலர்