ரத்தத்தை பார்த்ததால் வாழ்க்கை புரிகிறது: 'பைக் ரேஸ்' வாலிபர்கள் உருக்கம்

-

சென்னை:
நீதிமன்ற உத்தரவுப்படி, ஸ்டான்லி மருத்துவமனையில் வேலை பார்க்கும்
'பைக் ரேஸ்' வாலிபர்கள், 'தினம் தினம் ரத்தத்தை பார்க்கும் போது வாழ்வின்
அர்த்தம் புரிகிறது' என, உருக்கமாக தெரிவித்தனர்.

சென்னை, ஸ்டான்லி அரசு மருத்துவமனை ரவுண்டானா முதல்
மூலக்கொத்தளம் வரை, கடந்த மாதம் 20ம் தேதி இரவு 'பைக் ரேசில்' ஈடுபட்ட,
பிரவீன் உள்ளிட்ட நால்வரை, பழைய வண்ணாரப்பேட்டை போக்குவரத்து
போலீசார் கைது செய்தனர்.

இது தொடர்பாக, பிரவீன் தாக்கல் செய்த ஜாமீன் மனுவை விசாரித்த நீதிபதி
ஜெயச்சந்திரன், பைக் ரேசில் ஈடுபட்ட வாலிபர்கள், ஸ்டான்லி அரசு
மருத்துவமனை அவசர சிகிச்சை பிரிவில், 'வார்டு பாய்'களுடன் 30 நாள் பணி
செய்ய உத்தரவிட்டார்.

இதைத் தொடர்ந்து, பைக் ரேசில் ஈடுபட்ட 23 வாலிபர்கள், ஸ்டான்லி
மருத்துவமனை அவசர சிகிச்சை பிரிவில், காலை 8 முதல் மதியம் 12 மணி வரை
பணி செய்து வருகின்றனர்.தண்டனை பெற்ற 'பைக் ரேஸ்' வாலிபர்கள்
கூறியதாவது:

நாங்கள் செய்த தவறை உணர்கிறோம்.

தினமும் படுக்கையை சுத்தம் செய்தல், எக்ஸ் - ரே, ஸ்கேன், ரத்த பரிசோதனை
எடுக்கும் நோயாளிகளுக்கு உதவுதல் போன்ற பணிகளை செய்கிறோம்.தினமும்
'பைக்' விபத்தில் அடிபட்டவர்கள், தவறி விழுந்தவர்கள் மருத்துவமனைக்கு
வருகின்றனர்.

அவர்களின் ரத்தத்தை பார்க்கும் போது, எங்களுக்கு பயம் வருகிறது. பைக் ரேசில்
விபத்து ஏற்படுத்தி, எத்தனை பேருக்கு காயம் ஏற்படுத்தியிருப்போம் என
தோன்றுகிறது.தினமும் மரணம் மற்றும் ரத்தத்தைப் பார்க்கும் போது, வாழ்வின்
அர்த்தம் புரிகிறது. நாங்கள் பெற்ற தண்டனை சரியானது.
இனி நாங்கள் 'பைக்'கை மெதுவாக ஓட்டுவோம்
-
-தினமலர்