பார்லி.,யில் எதிர்க்கட்சிகள் அமளி : எரிபொருள் விலை உயர்வுக்கு கடும் எதிர்ப்பு

பெட்ரோல், டீசல் விலை உயர்வு குறித்து, விவாதம் நடத்த வேண்டும்
என்ற எதிர்க்கட்சிகளின் கோரிக்கை நிராகரிக்கப்பட்டதால்,
பார்லிமென்டின் இரு சபைகளிலும் அமளி ஏற்பட்டது.

பார்லிமென்ட் நேற்று கூடியதும், இரு சபைகளிலும் பெட்ரோல், டீசல் விலை
உயர்வு குறித்து விவாதம் நடத்த வேண்டும் என எதிர்க்கட்சி எம்.பி.,க்கள்,
'நோட்டீஸ்' அளித்து இருந்தனர்.


தவிர, நாடு தழுவிய வேலை நிறுத்தம் நடைபெறுவதால், அது குறித்தும்
விவாதம் நடத்த வேண்டுமென எதிர்க்கட்சிகள் கேட்டுஇருந்தனர்.
ராஜ்யசபா கூடியதும், சபைத் தலைவர் வெங்கையா நாயுடு கூறுகையில்,
''பெட்ரோல், டீசல் விலை உயர்வு மற்றும் பொது வேலைநிறுத்தம் குறித்து
பேச அனுமதி இல்லை.

அதேசமயம், இவை குறித்து, எதிர்க்கட்சி எம்.பி.,க்கள் பின்னர் பேசலாம்,''
என்றார்.

இடையூறு

இதை ஏற்காமல், எதிர்க்கட்சி எம்.பி.,க்கள் அமளியில் இறங்கவே, சபை
ஒத்திவைக்கப்பட்டது.லோக்சபா கூடியதும், இதே பிரச்னைகளை மைய மாக
வைத்து, காங்., திரிணமுல், தி.மு.க., உள்ளிட்ட கட்சிகளின் எம்.பி.,க்கள்,
குரல் எழுப்பினர். திரிணமுல் காங்., கட்சியின் சுதீப் பந்த்யோபத்யாய்,
காங்கிரசின் ஆதிர் ரஞ்சன் சவுத்ரி ஆகியோர் எழுந்து நின்று கோஷமிட்டனர்.

ஆனாலும், கேள்வி நேரத்தை தொடர்ந்து நடத்திய சபாநாயகர் ஓம்பிர்லா,
''கேள்வி நேரத்திற்கு இடையூறு ஏற்படாமல் பார்த்துக் கொள்ள வேண்டியது,
எதிர்க்கட்சி எம்.பி.,க்களின் கடமை. அதை மீறுவது ஏற்கத்தக்கது அல்ல,'' என
கண்டித்தார்.

பொதுமக்கள் பாதிப்பு

கூச்சல் குழப்பத்திற்கு மத்தியில், தி.மு.க., - எம்.பி.,யான டி.ஆர்.பாலு பேசியதாவது:

பெட்ரோல் டீசல் விலை உயர்வால், பொதுமக்கள் பெரிதும் பாதிக்கப்பட்டுள்ளனர்.
மத்திய அரசு நினைத்தால், இந்த விலை உயர்வை கட்டுப்பாட்டுக்குள் கொண்டுவர
முடியும்.

பெட்ரோலியத்துக்கு என சிறப்பு வரி விதிக்கப்பட்டு, ஏராளமான நிதியை எண்ணெய்
நிறுவனங்கள் குவித்தும் கூட, பொதுமக்களின் சுமையை குறைக்க மனம் வராதது
ஏன்?
இவ்வாறு அவர் பேசினார்.

தமிழகத்துக்கு பேரிடர் நிவாரண நிதி

மத்திய உள்துறை இணையமைச்சர் நித்யானந்த் ராய் வெளியிட்டுள்ள அறிக்கை:கடந்த
அக்டோபர் மற்றும் நவம்பர் மாதங்களில், தமிழகத்தில் பெய்த கன மழையால் ஏற்பட்ட
பாதிப்புகளை சரி செய்ய, 6,230 கோடி ரூபாயை, தேசிய பேரிடர் நிதியிலிருந்து தர
வேண்டுமென கோரப்பட்டுள்ளது.பேரிடர் மீட்பு நிர்வாகத்திற்கு, மாநில அரசு தான்
பொறுப்பு.

தேவைப்படும் கூடுதல் நிதியை, தேசிய பேரிடர் மேலாண்மை நிதியில்இருந்து, மத்திய
அரசு வழங்கிட முடியும். அந்த வகையில், 2021 - 22ல், 1,088 கோடி ரூபாய், தமிழக பேரிடர்
நிர்வாகத்திற்கு வழங்கப்பட்டுள்ளது. இதில், மத்திய அரசின் பங்கான 816 கோடி, இரு
தவணைகளாக வழங்கப்பட்டு விட்டது.தவிர, மத்திய குழு நேரில் வந்து பார்வையிட்டு,
அறிக்கை அளித்ததன் அடிப்படையில்,
352.85 கோடி ரூபாயை வழங்க, உயர் மட்டக்குழு ஒப்புதல் அளித்துள்ளது.இவ்வாறு,
அதில் கூறப்பட்டுஉள்ளது.

- நமது டில்லி நிருபர் -தினமலர்