பயங்கரவாதிகள் ஊடுருவல் தமிழகத்தில் அதிகரிப்பு?

மதுரை,
காஜிமார் தெருவைச் சேர்ந்தவர் முகமது இக்பால், 31. இவர், 2020ல், சமூக வலைதளத்தில், 'துாங்கா விழிகள் ரெண்டு காஜிமார் தெருவில்' என, பதிவிட்டார். இவருக்கு, பயங்கரவாத அமைப்புகளுடன் தொடர்பு இருக்கலாம் என, போலீசாருக்கு சந்தேகம் எழுந்தது.

இதுகுறித்து, மதுரை, திடீர் நகர் போலீசார் விசாரித்தனர். அப்போது, முகமது இக்பால் தலைமையில், தமிழகம் முழுதும் ஒரு கும்பல், ஐ.எஸ்., பயங்கரவாத அமைப்புக்கு ஆள்சேர்ப்பு, நிதி திரட்டுதல், துண்டு பிரசுரம் வினியோகம் உள்ளிட்ட செயல்களில் ஈடுபடுவது தெரியவந்தது.

இதையடுத்து, முகமது இக்பால் உள்ளிட்டோர் மீது வழக்குப் பதிவு செய்தனர். பின், இந்த வழக்கு, தேசிய புலனாய்வு அமைப்பான, என்.ஐ.ஏ.,வுக்கு மாற்றப்பட்டது. அதன் அதிகாரிகள், முகமது இக்பால் மற்றும் கூட்டாளிகள் வீடு என, 16 இடங்களில் சோதனையில் ஈடுபட்டனர்.

சதி திட்டம் தொடர்பாக, 30 புத்தகங்கள், தட்டச்சு செய்யப்படாத வாசகங்கள் அடங்கிய ஆவணங்கள் அப்போது சிக்கின. திருவாரூர் மாவட்டம், மன்னார்குடியில் பாவா பஹ்ருதீன், 35, என்பவர் தலைமையில், ரகசிய கூட்டங்கள் நடத்தியதற்கான ஆதாரங்களும் சிக்கின.

இதன் தொடர் நடவடிக்கையாக, சமீபத்தில் தஞ்சாவூர் மாவட்டம், கும்பகோணத்தில், ஜியாவுதீன் பாஹவி, 35, என்பவரை, என்.ஐ.ஏ., அதிகாரிகள் கைது செய்தனர். விசாரணையில் இவர்கள், 'ஹிஸ்பு - உத் - தர்' என்ற அமைப்பை துவங்கி, ஐ.எஸ்., பயங்கரவாத அமைப்புக்கு ஆள் சேர்ப்பு நடத்தியது அம்பலமானது.

இவரை போல, மாநிலத்தின் பல்வேறு பகுதிகளில், அடையாளம் தெரியாத மர்ம நபர்கள், பயங்கரவாத அமைப்புக்கு ஆள்சேர்ப்பு மற்றும் நிதி திரட்டும் பணியில் ஈடுபடுவது, என்.ஐ.ஏ., அதிகாரிகளுக்கு தெரிய வந்துள்ளது.

தமிழகத்தில் பயங்கரவாதிகளின் ஊடுருவல் அதிகரித்ததாக குற்றச்சாட்டு எழுந்துள்ளதால், இவர்களை கைது செய்ய, என்.ஐ.ஏ., மற்றும் 'கியூ' பிரிவு அதிகாரிகள், தேடுதல் வேட்டையில் ஈடுபட்டுஉள்ளனர்.

தினமலர்